= مقابلتش واحد سوري زعلان ... ملقتش صفحة واحد سوري خائف من النظام الجديد ... هما اصحاب الارض والقضية .. هما اللى اتفجروا بالبراميل واعتقل منهم تلاتمائة الف واحد .. ومات مليون واحد منهم عشرات الالاف اتقتلوا في السجون وتحت مبني المخابرات الجوية وفي اروقة الأكاديمية العسكرية ...
= تفتكر انك انت وحدك عارف اللى هما مش عارفينه وتقعد تكرر ان سورية ضاعت وان الفصائل دى اتجمعت على كره النظام وبكرة حتضرب في بعض وانها حتتقسم .. الخ الخ الخ ... تفتكر هما مش عارفين المعلومة الرهيبة اللى انت عارفها دي ؟
= خلينا في الوقائع وبلاش يتضحك علينا بالشعارات .. من بداية المعارك من اسبوعين لم يتم قتل اي مدني على الاطلاق حتى من مسئولي النظام السابق (وبالتالي لم يقاومهم اي مدني اطلاقا) .. وتم تحرير جميع السجناء وهما بعشرات الالاف دون تمييز ومنهم غير سوريين (طلع منهم واحد لبناني مسجون بقاله اربعين سنة لانه اتخانق مع ضابط الجوزات السوري تخيلوا ) ...
= حتقولي حينفذوا اجندة تركية اسرائيلية امريكية اوروبية وان في واحد من المعارضة (مذكروش اسمه) قال إنهم حيتعاملوا مع إسرائيل .. يا راجل .. ده نظام الاسد سقط في ساعات بمجرد تخلى روسيا وتدمير حزب الله وتحجيم ايران .. نظام مكروه من شعبه ومحمي بالخارج .. نظام لم يطلق طلقة واحدة على اسرائيل رغم الضربات اليومية الاسرائيلية .. يا راجل ده اكتر حد بيحمي إسرائيل هي الانظمة العربية كلها فبلاش نصدق شعارات الوطنية اللى بترفعها كل الانظمة العميلة.
= حتقولي ان تركيا اديت لهم سلاح وذخيرة ... حقولك هات لي حركة تحرير مسلحة لم تتسلح من الخارج .. مصر نفسها بعتت سلاح لتحرير الجزائر (هل اصبحت الجزائر تابعة لنا) ... الصين بعتت سلاح لتحرير فيتنام (هل فيتنام تابعة للصين) .. وغيرها الكثير من الامثلة .. واخرها ايران اللى بتسلح حماس ...
= البيان اللى اصدره النظام الجديد اكد على وحدة ارض سورية وانها للجميع ولا مكان للطبقية والانتقام والطائفية ... حتقولي ده مجرد كلام .. حقولك ده اللى عملوه في ادلب.
= مش بقول ان النظام الجديد سكر وعسل .. محدش عارف لسه حيعملوا ايه ... بقول ان اصحاب الشأن فرحانين لانتهاء مجازر استمرت ١٤ سنة مات فيها مليون واتهجر نص الشعب واتدمرت البلد كلها .. مش حنبقى سوريين اكتر من السوريين .. اعطوهم وقت وخلينا نشوف.
2
-2
