الغنوة أصلا غنوة نجاة

ناديتها..وَعَدتَّها ان جات

تصبح لنبضي عشق ونجاة

وأغنيها صبح وعشية 

اللحن قام قوام وهَمّ

سألني وازاي رغم الهمّ

عايزاني أَوْصِل هُنّ بهُم

ونَغَمِي مسافر آخر الدنيا 

بيني وبينه بعاد وبَرْد

سكاكين مش بتبطل بَرْد

مساجين تناديني.. وبَرُدّ

فتغطي آهاتي الأغنية 

كما الحبيبة تقول.. يا رَجُلي

يا بعضي.. ومن صار جُلّي

قلت:. يا نغمي يا رِجلي..

إنت خَطوي للحرية

سندة ضهر ف زمن القلب

وَتَرِي ونَسجُه العود م القلب

نغمُه العالي سر القلب

بيجلجل.. ويجدد نية

إنت القبلة ف صلاة عيني

وإن غابت نُوتّك.. آه يا عيني

صوتك وِرْدي.. نبعي.. وعيني 

كعبة ف غربة..ساكنة عنيا 

******************* 

الغنوة أصلا غنوة نجاة بقت ليك: 

قمري يا قمري يا حبيبي ياقمري

اسأل على ليلي على ليلي وسهري

ليلي غير طعم ولون لياليك

ليلي ع الجنة مستنيك

افتح أحضان الحب وقول

يا هوى يا هوى يا هوى

على طول يا حبيبي.. نشوف الجنة سوى 

#غنوتي_من_غنوة (دبنا يا حبايبنا)