شوية جد بقى عشان بصراحة الهري كتر، وأنا ناوية أسمع الكلام وأشرب اللبن الصبح وأبطل هري! 

الطبيعي إن دور من أدوار الدولة، هو تنمية الريف وكل مناطق مصر، التنمية الحقيقية -مش تنمية الفيديوهات، والمسارح، ونجوم ليالي التلفزيون- بتقوم على الصناعة، والزراعة، والتعليم، والصحة.

مش محتاجة اتكلم عن الصناعة، والتعليم، والصحة، لو مش متابعين اللي بيحصل في الصناعة الوطنية والمصانع اللي بتتقفل، على الأقل كل بيت أدرى بما فيه، أدرى بمصاريف العلاج، وحال المسشفيات، وأدرى بمصاريف المدارس، ومستواها، وحجم البيزنس والدروس اللي بقت بتتقنن حتى في المدارس الحكومية، كل واحد أدرى بدخله وسعر الخدمات الرئيسية زي الغاز، والكهرباء، والماية!

آه يا قلبي الماية!????‍♀️ اللي متابع اللي بيحصل في سد النهضة، والاتفاقية اللي اتمضى عليها، وكانت بداية التهاون في حقوقنا.. اللي متابع التسويف، وتضييع الوقت، والفشل في المفاوضات، اللي متابع آثار السد علينا في الزراعة، وفي الوجود أصلا! .. هيعرف مستقبل الزراعة رايح على فين! 

التنمية مش محتاجة مهرجانات وشو إعلامي، يروج له "الشخصيات العامة" على إنه مبادرة غريبة واستثنائية، فيها كرم وإنجاز خاص، بنمنّ بيه على أهل البلد! 

وكأن الريف ده مش حتة من مصر، تنميتها شيء بديهي وطبيعي!! 

وبعدين يتقال تصريحات ما نفهمش منها، منين يودي على فين! ونيجي عند أخطر قضية بتهدد وجود مصر نقول بطلوا هري! ونسقف!! 

كل كاتب، كل فنان، كل أستاذ جامعة، كل محامي، كل سياسي، كل أم، كل أب، كل طالب،.. كل مصري عايز يعيش حياته، ويطنش أخبار المساجين اللي بيموتوا من التعذيب وسوء المعاملة، ومعتقلي الرأي اللي بيضربوا عن الطعام بسبب ظلم الإجراءات وحبسهم من غير محاكمات! مش عارفة هيقدر يعمل ده إزاي؟! بس جايز يقدر! 

لكن يعيش حياته ازاي، وحياته أصلا مهددة بالخطر لو ماهتميناش بمصيرنا إيه في سد النهضة؟! لو ما سألناش، وكتبنا رأينا بوضوح في التسويف، وتضييع الوقت، يبقى إحنا كلنا شركاء في نكبة أسوأ من نكبة العرب في فلسطين! اللي الصهاينة والمطبعين لفقوا لها الأكاذيب، وقالوا زورًا إن الفلسطينيين باعوا أرضهم، وهم بيقاوموا من ساعتها ولغاية الآن! 

دلوقتي التاريخ بيسجل، ومن غير تلفيق، تفتكروا لما نتسئل في يوم عن النيل؟ وعن مصر؟! هتكون الإجابة إيه؟