• حبتيه؟!
• يااااه، الكلمه دي قليله اوي علي اللي بحسه ناحيته
• طيب ليه سبتيه لما انتِ بتحبيه كل الحب دا؟!
اتنهدت تنهيده طويله بتعبر عن كل الوجع والمُعاناه اللي حسيت بيهم:
اذانى كتير، يمكن اذانى علي قد الحب اللي كان في قلبي له، واكبر أذى سببه ليا انه محبنيش
تعرف! برغم كل الاذى اللي سببه ليا عمرى ما اتمنيت انه يحب حد ميحبوش زي ما عمل فيا، مش عايزاه يحس بالوجع اللي حسيته بسببه
حتى لما عرفت انه بيحب واحده تانيه غيري اتمنيت له الخير معاها، حقيقي بحسدها، هي عرفت تعمل اللي انا معرفتش اعمله، عرفت تخليه يحبها ويكتفي بيها لدرجه انه بِعد عني، قدرت تخلى قلبه يدق لها، قلبه اللي مش بيدق لحد بسهولة
بس السؤال اللي محيرني، لما هو بيحب واحده تانيه ليه كمل معايا ٤ سنين!
ليه كان بيديني ذكريات حلوة!
وليه مكنتش كفاية له!
وليه محبنيش!
ليه حسسني اني قليلة ومتحبش!
هو انا متحبش فعلاً!
كل يوم بفتكر ذكرياتنا الجميله سوا قبل ما انام وبتخنقني، وبفضل اسأل نفسي ليه عمل كدا ! هو انا مثلاً كنت وحشة معاه! او اذيته! طب انا زعلته او ضايقته من غير ما اقصد!
كل حاجه معاه كانت حلوة بشكل ميتوصفش، مكنتش اتمني ابداً يكون لحكايتنا نهاية ولا كنت اتمني ان النهاية تكون بالشكل دا، كنت بمشي في الأماكن اللي كنا بنروحها سوا واتخيل انه موجود فيها وانه معايا، كنت بدور عليه وبتمني اقابله صدفه، لكن حقيقي الصُدف بخيله جداً
كنت بشوفه في وشوش كل الناس، حتي في مره كنت ماشيه و شوفت واحد شبهه جداً عدي من جنبي، عدي و روحي راحت معاه لمجرد انه شبهه
عارف كمان، انا في العادي مش بعرف مش بعرف أبين حنيتي، مش بعرف اسهر عشان حد، مش بعرف اقول كلام حلو، بس هو كان استثناء بالنسبالي
وأصعب حاجه انك تبني أحلامك وطموحاتك علي شخص واحد، انك تبقي ضامن وجوده
انا حتي فاكره كل مره كان بيبصلي فيها، عيونه كانت مليانه حب، بس عمرى ما كنت اتخيل ان العيون دي مليانه حب مُصتنع
• ولسة لحد دلوقتي بتحبيه؟!
• بكل ما فيا، و لو العمر رجع تاني هحبه تاني
بس احب اقولك نصيحه
لما تحب حد حط في بالك انه ممكن يمشي في اي وقت، يعني مينفعش تبني كل أحلامك وطموحاتك عليه، مينفعش يبقي كل وقتك له، مينفعش تبقي ضامن وجوده ومخلي حياتك علي مقاسه وكل حاجه تحطه فيها قبل منه، حب وافرح لكن متخليش الشخص اللي بتحبه يبقي محور حياتك عشان لو مشى متتعبش اكتر من اللازم..
• و لو رجع قالك انه لسة بيحبك وعايزك؟ هترجعي؟!
• لا، صدقني مش هقدر، وانا معاه اتنازلت عن حاجات كتير وكنت بقدم حاجات عكس قناعاتي، حاجات كتير اتغيرت في شخصيتي، كل دا حصل عشان بحبه ومش عايزه اخسره، مع الوقت اكتشفت اني مبقتش جميله بتاعت زمان
ومعتقدش هقدر أنساه واحب غيره وانسي كل الذكريات الجميلة اللي بينا لأنها كانت ذكريات حقيقيه، لكن بالرغم من كل دا هو محبنيش!
• مش هترجعي رغم انك لسه بتحبيه!
• رغم اني لسه بحبه

"حبيت جميل، ياريتني ظِلٌّه
حاز الجمال، والحسن دا كُله
لمَّا رأيت ملك فؤادي ياعيني
صَبَّرت قلبي، وحملت ذلٌّه"

ابتسمت بسخريه في نفس اللحظه اللي قولت فيها:
"صَبَّرت قلبي، وحملت ذلٌّه"
حسيت بوجع غريب في قلبي قبل ما اقول:
• يوسف، يلا نمشي
• ليه ياابنتي! الكافيه هنا حلو اهو
• معلش، تعالى نتمشي في اي مكان
• عند النيل؟!
• عند النيل

بعد دقائق وصلنا، قد ايه النيل جميل وبيسحر، والبصه فيه بتقدر تسحب اي زعل وحزن وطاقه سلبيه من جوانا
• فكي بقي
• ابتسمت_اعمل ايه طيب!
• احكيلي عن طفولتك مثلاً
• ضحكت_بلاش، انا طفولتي كانت متشرده جداً
ضحك وهو بيقول:
جميله انتِ لحد دلوقتي متشرده
احكى يا شيخه احكى
• يعني مثلاً وانا صغيره كنت مش بحب الولاد، فكنت بضرب اصحابي الولاد كل يوم، كنت عامله مشاكل دايماً في المدرسه وخصوصاً ايام اعدادي، ولما كنت بيجيلي استدعاء ولي أمر كنت مش بخلي حد يشوفه معايا وبقطعه وأروح تاني يوم المدرسه عادي، كنت بفرح اوي لما بتفصل من المدرسه، يااااه بجد كانت بتبقي اجمل ايام حياتي، انا افتكر اني قبل كدا كسرت رجل بنت في المدرسه
• كسرتِ رجل بنت!! انا مغلطتش لما قولت عليكِ متشرده
• حبيبي تسلم
ضحك واتنهد تنهيده طويله وهو بيبصلي:
نفسك في ايه يا جميله؟
• يااااه، صدق انا عمرى ما حد سألني السؤال دا حتي انا عمرى ما سألته لنفسي
• انا بسألك اهو
• هتصدقني لو قولتلك مش عارفه!
بس كل اللى نفسي فيه ان الفتره دي تعدي بسرعه وقلبي يتعافى وابقي كويسه واقدر احب تاني بس المره دي يكون حب حقيقي وجميل، حب يدوم وميخذلنيش
• يمكن لو بصيتِ حواليكِ شوية هتلاقي الحب دا
• ازاي؟!
• مش مُهم، متركزيش
• تفتكر يا يوسف لو قلبي اتعافي هبقي عندي طاقه اقدر ادخل بيها علاقه تانية ومشاعر اقدر اديها لحد؟
• افتكر جداً
• انا نفسي قلبي يتعافي
• وانا هفضل جنبك لحد ما تبقي كويسه
ايه رأيك تروحي ل دكتور نفسي؟
• دكتور نفسي!
• ايوا
مش عيب عالفكره، اللي بيروحوا للدكتور النفسي مش مجانين، هما بس فقدوا القدره علي التحمل ومحتاجين لحد يساعدهم يتعافوا
وعالفكره كلنا مرضي نفسيين بس بدرجات متفاوتة
• يعني رأيك اجرب؟!
• جداً
• هفكر
• واياً كان القرار اللي هتاخديه انا هفضل معاكِ وجنبك دايماً
• ربنا يديمك يا يوسف
• ويديمك يا جميله

قضيت وقت جميل مع يوسف، لكن مهما احاول اخرج من دايرة حُزنى واكتئابى فى النهاية مش بعرف، مبقتش بعرف ابقي مبسوطه
فكرت في موضوع الدكتور النفسي وبحثت عنه كتير، لحد ما اقتنعت بالفكره وبدأت ابحث عن دكتور نفسي كويس اقدر اروح له، واخدت معاد
عمرى ما كنت اتخيل اني اروح لدكتور نفسي، انا ازاي وصلت ل هنا!!!

بعد يومين كان معادى عند الدكتوره، يوسف صمم ييجي معايا وميسبنيش لوحدي
وصلت العياده وانا فى جزء جوايا بيقولي لا متروحيش انتِ اقوي من كدا يعني هي الدكتوره اللي هتخليكِ تنسي حد بتحبيه وجرحك!
وجزء تاني بيقولي روحي يمكن تتعافي وتبقي كويسه وتقدري تعيشي حياتك طبيعي، واهي تجربه مش هتخسري حاجه
فوقت من شرودي علي صوت يوسف:
• جميلة، يلا يا جميله عشان هتدخلى
• حاضر، انت هتقعد الساعتين هنا!!!
• اه
• لا امشي انت ولما اخلص هكلمك
• لا، هستني
متشغليش بالك بيا وادخلي يلا
• حاضر

دخلت وانا قلبي مقبوض وشئ جوايا بيقولي اهربي متكمليش، ازاي هتتكلمي في حياتك الخاصه مع واحده غريبه! وهي هتعملك ايه اكتر من انها هتقولك شوية كلام سمعتيه من أصحابك!

• إزيك يا جميله!
• الحمدلله
• انا اسمي دكتور مروة، ان شاء الله اقدر اساعدك
قوليلي يا جميله عندك كام سنه وفي كليه ايه او بتشتغلي ايه؟
• عندي ٢٤ سنه
اتخرجت من كليه تمريض
• حلو جداً ماشاء الله، مجالك جميل
• ابتسمت_شكراً ربنا يخليكِ
• قوليلي بقي ليه جيتِ هنا؟!
• بسبب حاجات كتير
• زي؟!
• الحب
• معظم اللي بيروحوا عند دكتور نفسي بيكون دا السبب الأول في تعبهم
احكيلي اكتر
• حبيت شخص، قضينا سوا ٤ سنين، حقيقي كانوا اجمل ٤ سنين مروا عليا، حبيته جداً، كان اكتر شخص غالي عندي، كل حاجه معاه كانت جميله، وقتنا سوا كان حلو بشكل ميتوصفش حتى وقت زعلنا، هو أول حد احبه، انا فى العادي مش بحب بسهوله لكن..
حبيته
اتنازلت عن حاجات كتير وغيرت كتير في شخصيتي وبقيت بقدم حاجات عكس قناعاتي، كل دا عشان هو يبقي راضي ومبسوط، وعشان مخسروش
لكن...
سكت للحظات، افتكرت فيهم ايامي الجميله اللي قضناها سوا، وافتكرت برضو وجعي منه
عيوني دمعت واتنهدت وانا بحاول أخفى حُزنى و دموعى:
• لكن هو محبنيش
• قضيتوا سوا ٤ سنين ومحبكيش؟!
طب ليه؟!
• قلبه مدقش ليا، قلبه مكانش ليا من الاول
• ازاي تفضلوا سوا ٤ سنين وميحبكيش!!!
• ربنا هو صاحب الامر علي القلوب
• طيب لما هو محبكيش، ليه فضل معاكِ كل الوقت دا !!
• دا الغريب، دا السؤال اللي محيرني
ليه فضل معايا وعلقني بيه بالشكل دا !
ليه ساب ذكريات جميلة!
هو انا متحبش!!
دموعى مقدرتش تقاوم اكتر من كدا ونزلت وانا بقول اخر جمله
• مفيش حد ميتحبش يا جميله، كلنا من حقنا نتحب، من حقنا نلاقي حد يشوف جمالنا، مش بس الخارجي لا الداخلي كمان
من حقنا نلاقي شخص واحد مُتقبل وحابب وجودنا، شخص واحد بس يشوف قد ايه قلبنا جميل ويحس جمال روحنا ويحسسنا ان ملامحنا هي أجمل ملامح شافها في حياته
من حقنا نلاقي شخص واحد بس شايف إننا نستاهل كل حاجه حلوة
بس مش معني إننا حبينا الشخص الغلط يبقي خلاص الدنيا اتقفلت في وشنا، مش ضرورى نظره الشخص دا لينا تكون صح
خالص، انتِ اسمك جميله وانتِ فعلاً جميله
مش بقولك كدا مُجامله لكن حقيقي انتِ ملامحك جميله اوي ومُريحه وطيبه قلبك وجماله باينين علي ملامحك، عشان كدا بقولك انك اسم علي مُسمي
لكن هو نظرته ليكِ كانت غلط، هو اللي كان اعمي ومشافش كل الجمال دا
• ابتسمت_شكراً بجد يا دكتور انا حقيقي مبسوطه بكلامك دا اوي ومرتاحه، بس حاسة اني ندمت اني حبيته، غير ان طبعا معروف ان الارتباط حرام وعيب
• بصي يا جميله، متندميش علي غلط انتِ عملتيه، المهم تتعلمي من الغلط دا، دايماً لما تخرجي من اي فتره وحشه حاولي تحطي زعلك علي جنب وتبصي للدرس اللي اخدتيه من الفتره دي وتتعلمي منه
تعرفي ايه اللي بيخلينا نحب!
الاهتمام، انا لو لقيت قطه بتهتم بيا وبتقولي انها بتحبني، انا هحبها
ما بالك بقي لو شاب حليوة كدا لقيته بيهتم بيا وحنين وكلامه ليا جميل، اكيد غصب عني هحبه، وخصوصاً ان احنا بنميل للجنس الاخر اكتر، وهما برضو بيميلوا لينا
وخصوصاً في سن ال ١٧ لبعد العشرينات، وكلنا في الفتره دي بنحب ونرتبط وطبيعي نعدي بتجارب فاشله، طبيعي نتوجع عشان نتعلم، والأهم إننا نتعلم
ومع الوقت بنبقي ناضجين وعاقلين اكتر، مش مُهم الناس شيفانا ايه، المهم احنا شايفين نفسنا ازاي، لازم نبقي شايفين جمال قلوبنا قبل أي حد، ومش مُهم كل الناس تحبنا وتحب وجودنا، يكفينا بس شخص واحد سوي ومُريح يبقي شايف جمال قلبنا و روحنا وحابب وجودنا ومُكتفى بيه
• ياربي علي كميه الراحه اللي حاسة بيها، انا كنت جايه وشايفه اني مش هستفاد حاجه لكن حقيقي ارتاحت اوي، انا مبسوطه جداً
• وانا مبسوطه اني قدرت اخليكِ مرتاحه كدا
واخيراً احب اقولك حبي نفسك لأنها تستاهل حُبك ليها، حاولي تشوفي جمال قلبك، حبي ملامحك و روحك عشان انتِ حقيقي جميله
هو للأسف معاد الجلسه خلص، كنت نفسي اقعد معاكِ اكتر من كدا
نتقابل الجلسه الجايه؟
ابتسمت ابتسامه سعيده بتعبر عن الراحه اللي حاسة بيها:
• هنتقابل اكيد
•اتفقنا

خرجت من العياده وقلبي مرتاح، اتجهت ناحيه يوسف:
• يلا يا يوسف
بصلي بنظره كلها سعاده:
• ملامحك مرتاحه
• دا حقيقي، ارتاحت جداً ومندمتش اني جيت هنا
• مش انا قولتلك
• ابتسمت_الحمدلله
• تعالي نتمشي عند النيل ونشرب كوبايتين حمص الشام في الشتا دي وانتِ بتحكيلي عملتِ ايه
• يلا بينا

اتمشينا كتير وحكينا اكتر وقضينا وقت لطيف سوا، حكيتله عن كلامي مع الدكتوره وقد ايه هي جميله وكلامها ريحني جداً وخلاني مبسوطه و زرع جوايا يقين اني هتعافي وهرجع كويسه تاني
• جميله، مش نفسك تعملي اي مشروع
• زي ايه؟
• مش عارف، بسألك اهو
• اممم، عارف
نفسي جداً اشترى فيلا واخليها زي ملجأ كدا لأطفال الشوارع، كل اللى مالوش مأوي ييجي يعيش فيها، واكلهم وشربهم ولبسهم هيبقوا متوفرين، غير أن كل شهر ليهم رحله وهدايا، بس طبعاً المشروع دا هيكبر بالتبرعات
ومع الوقت نعمل جزء للكبار، وكل اللى مالوش مأوى ييجي يعيش في الفيلا دي ونساعد الكبار اللي قادرين يشتغلوا بإننا نوفرلهم شغل، واللي مش قادر يشتغل هيراعي الأطفال الصغيرين، والستات نوفرلهم شغل يدوى ونبيعه
• فكره كويسه جداً، وهتبقي ساعدتي ناس كتير
• ايوا بجد حاسه اني اتحمست للفكرة اوي يا يوسف
• إن شاء الله نعمل المشروع دا سوا
• إن شاء الله
• انتِ جميله اوي يا جميله
بصيت في الأرض بكسوف:
• شكراً يا يوسف ربنا يخليك
يلا نروح
• يلا

عدى ٦ شهور، عدوا زي الهوا بس خلال ال ٦ شهور دول انا ويوسف قربنا من بعض اوي، يوسف بيهتم بكل تفاصيل حياتي، بيقلق و بيخاف عليا من الهوا، اوقات بحس انه لو يطول يحبسني هيعمل كدا عشان بس يحميني من اي حاجه ممكن تحصل ليا، حُبه باين في تصرفاته وكلامه لكن معترفش، دايماً كنت بخاف اوصل للدرجه دي مع يوسف عشان خايفه معرفش ابقي كويسه ومحبوش، خايفه اجرحه، يوسف جميل اوي، اجمل من انى اجرحه او اسببله ولو ١% وجع
اوقات بقول لنفسي انا ازاي محبتوش رغم كل حاجه بيعملها معايا، راجل وحنين جداً وجدع وبيخاف عليا ومُستعد يحميني من اي حاجه ويعمل عشان خاطرى اي حاجه، زعلي مش بيهون عليه ودايماً بيراضيني، ولو بقيت معاه هيحافظ عليا ويصوني ويصون قلبي
مكنتش عايزه نوصل لمرحله الحب، انا حباه يوسف صاحبي الجدع اللي بيقف معايا في كل حاجه، مش عايزه اخسر حتي الصاحب الجدع
دايماً يقولي يا جميله قلبك هيتعافي بس انتِ افتحيه تاني وشيلي الخوف من قلبك وهتلاقي اللي بيتمني تديله فُرصه، هي فُرصه واحده وبعدها هيصونك ويصون قلبك ويكون سندك وحماكِ، ببقي عارفه انه يقصد نفسه بالكلام دا
لكن هرجع و اقول ربنا هو صاحب الامر علي القلوب
وبعدها بفتره تانيه كل شئ بدأ يتغير، بدأت احب كلامي معاه اكتر من الاول، بقي اليوم اللي ميكلمنيش فيه بيبقي غريب، كأن حاجه ناقصاه، حاجه جميله اوي
كلامه الحلو اللي كنت بشوفه تلزيق، بقيت بحبه، بحبه يقولي وحشتيني، بحبه يقولي انه بيحب ملامحي البسيطه، ملامحه اللي كنت بشوفها عاديه بقيت بحسها اجمل ملامح شوفتها، بحبه يقولي اني انضف شخص هو قابله في حياته واكتر شخص ارتاحله، بدأت اتطمن وانا مش سهل اني اتطمن، بيلفت نظرى كل مره كأنها اول مره، بدأ خوفي يقل وثقتي فيه تزيد، بدأ تفكيري فيه يزيد، يا ترى رايح بيا علي فين ياسي يوسف

النهارده إفتتاح المشروع اللي كنت بتمني اعمله، مشروعنا
مشروعنا اللي اجتهدنا و تِعبنا لحد ما وصلنا له، فيلا لأطفال الشوارع
صحيت بدرى وانا مُتحمسه جداً ومبسوطه بمشروع عمرى اللي بيتحقق، ومبسوطه اكتر بشريكي، يوسف
لبست فستاني الأبيض وعليه الطرحه النبيتي، وميك اب خفيف، ركزت في ملامحي اللي دايماً يوسف يقولي انها جميله اوي وبسيطه، لأول مره احس نفسي جميله فعلاً

نزلت و قابلته في المكان اللي اتفقنا عليه، كان لابس قميص لونه زيتي بارز عضلاته وبنطلون اوف وايت، كان جميل فعلاً
وصلنا الفيلا، كان في أطفال كتير وناس كتير، منهم أهلنا واصحابنا اللي مبسوطين بينا وبنجاحنا والابتسامه مش عايزه تروح من وشهم من كتر فرحتهم، ومنهم مُتبرعين
عدي وقت قُليل، ويوسف قالي انه عايزني في موضوع مُهم
• خير يا يوسف، في ايه؟
اتنهد تنهيده طويله في اللحظه دي وباصلي وعيونه فيها لمعه وابتسم وقال:
• جميله، انا بحبك
حاولت، صدقيني حاولت كتير ابعد لكن مقدرتش، كل يوم حبي ليكِ بيزيد، واحساسي بإني عايزك ليا ومعايا بيزيد، انا عارف ان قلبك لسه متعافاش بالكامل، عارف انك خايفه وقلقانه، لكن عايز اقولك اتطمني انا عمرى ما هجرحك ولا هوجعك بكلمه واحده حتي، اسندي عليا ومتخافيش، اسندي بكل حِملك وانا هشيل، انا معاكِ لحد ما تتعافي وتبقي كويسه، معرفش اذا كنتِ بتحبيني ولا لا بس هفضل معاكِ لحد ما تحبيني، وحتي لو محبتنيش علي الاقل تبقي حاولتِ، بس صدقيني مش هتلاقي حد يحبك زيى، ولا يخاف عليكِ زيى
بصيت له وانا متفاجأه و مكسوفه، مبسوطه بس خايفه، خايفه عليه اكتر ما خايفه علي نفسي
• يوسف، انا مقدره كل مشاعرك وكلامك بس انا خايفه انت اللي تتعب في الاخر
• متخافيش عليا
• يوسف انا تعبانه، وفيا عيوب كتير مش هتقدر تتعايش معاها
• مع اني مش شايف اي عيوب فيكِ، بس انا قابلك، قابلك بكل حاجه، قابلك وحابك و رايدك، انا مش بقولك نرتبط والكلام دا، انا عايز اتجوزك، وهبقي اسعد واحد في الدنيا لو وافقتِ
جربي ومش هتخسرى
سكت للحظات، هلاقي فين حد يحبني كل الحب دا، هلاقي فين حد يبقي حنين عليا وبيخاف عليا بالشكل دا، هلاقي فين شخص جميل كدا
فيها ايه لو اديت لنفسي فرصه، لو فتحت قلبي مره واحده للشخص الصح، اهو جالي اللي يصون قلبي ويعوضني عن أي حاجه وحشه زي ما كنت بتمني، يبقي اول ما ييجي ارفضه!!!
• متأكد يا يوسف انك بتحبني وعايزني، وهتستحملني؟!
• انا مش عايز ولا رايد غيرك
اتنهدت تنهيده طويله، قبل ما اقول:
• وانا موافقه

شئ جميل لما نلاقي ناس حنينة نحس معاها بالأمان، نتطمن جنبهم ومعاهم، ناس قابلنا بكل حاجه، شايفين عيوبنا وقابلينها وعارفين، ناس ميهونش عليهم زعلنا، ناس مُريحه وقلبها جميل، ناس شايفين جمال قلبنا و روحنا، ناس حابه وجودنا ومُكتفيه بيه، ناس تشبهنا ونرتاح معاهم وجنبهم، ناس يكونوا سند، و ونس.♥️

"بس انا ملقتش ملقتش ونس للعمر احسن منك، ملقتش صديق وحبيب وقريب وسنين تتعاش غير وانا وياك
كان عُمرى يضيع واخسر نفسي لو يوم موافقتش ابقي معاك."