• وبعد ما تنتحري! تفتكرى هترتاحي؟!
• كنت واقفه عند حافة الجبل ، بصيت له.
كان شاب وسيم وقمحاوي وشعره اسود وعريض حبتين
• افندم؟! وعرفت ازاي اني عايزه انتحر! ما يمكن واقفه بشم هواء
• انا عارف الوقفة دي كويس ، وعارف انك عايزه تنتحري
• عرفت ازاي؟! اكيد مش هتعرف من نفسك
الا بقي لو جربت قبل كدا!

بص في الأرض وسكت ، والحزن اللي في قلبه ظهر علي ملامح وشه
• انا عارف ان الشخص مش بيوصل لمرحلة الانتحار غير بعد حاجات كتير اوي ، بعد مُعاناة ، عارف ان اكيد جت عليكِ لحظه وحسيتِ ان كل حاجه بقت تقيلة علي قلبك ، الأشخاص بقوا مؤذيين وكأنهم حالفين يدمروكِ ، وحتى أقرب الناس ليكِ بتبقي مش حاسة باللي جواكِ ، مهما اتكلمتِ ومهما شرحتِ ليهم وقولتِ انك قد ايه تعبانه ، برضو محدش هيحس بيكِ وهيفضلوا شايفين ان اسباب حزنك تافهة لان مهما عملتِ محدش هيحس باللي جواكِ غيرك ، انتِ وبس ، عارف انك حالياً بتنهارى وجبتِ اخرك من كل حاجه ، بس دايماً في امل ، صدقيني مش بقولك كدا كنوع من التحفيز ، بس دايماً في امل ، انا متأكد من كدا ، ومش هتشوفي الأمل وانتِ فى الحاله دي ، ولكن يمكن لو حكيتِ لشخص تاني عن اللي جواكِ ، هو هيلفت نظرك للنور ، صدقيني

سكت للحظات ، رجعت خطوتين لورا وبعدت عن حافة الجبل بهدوء
ابتسم وهو بيمد ايديه ليا وبيقول:
ولو مش عندك شخص يسمعك ويلفت نظرك للنور ، انا موجود ومستعد اسمعك
سكت للحظات ، كأن ايد بتتمد ليا وتحسسني بالامان وباب بيتفتح عشان ابدأ حياة جديده ونظرتي للحياه تتغير من نظره تشاؤم لنظرة كلها امل

روحنا قعدنا عند النيل ، فضلنا ساكتين كتير ، كنت بعيط بس وهو مضغطش عليا ، سابني اخرج كل اللى جوايا في العياط
عدت ساعه واحنا علي نفس الحال ، لحد ما ما هديت ، وارتاحت.
• حابة تتكلمي؟!
........ •
سكت للحظات ، وقال:
لو مش حابه بلاش ، ولو حابه فاانا موجود
انا مُستمع كويس عالفكره

سكت شوية ، واخدت نفس عميق قبل ما اقول:
أهلى كويسين جدا وانا بحبهم اوي ، بس... بس محدش فيهم فاهمني ، دايماً شايفني وحشه وفاشله وشخصيه متتحبش و الله يكون في عون اللي هيتجوزني وان انا اللي دايماً غلط
وانا صغيره مكنتش ليا أصحاب، مكانش في حد بيحبني
وانا في الحضانه محدش بيحبني ودايماً بيتنمروا عليا ، وانا في ابتدائى مش بيحبوا يصاحبوني ، وانا في اعدادي برضو محدش بيحبني ولو حد صاحبنى بيكون عشان مصلحته بس ، وانا في ثانوي كانوا كلهم بيبعدوا عني كأني عندي مرض معدي.
حتي الشخص الوحيد اللي حبيته كان بيحسسني اني وحشه ودايماً جاية عليه وبظلمه واني شخصية وحشه ، كان بيوصل بيه الامر لدرجه انه بيتكسف مني ويقلل مني دايماً
خلوني افقد الثقه في نفسي تماماً ، وصلوني لدرجه اني بقيت اكره نفسي ، عملت حاجات كتير عشان يشوفوني كويسة ويحبوني ، بس برضو محبونيش!
بيبقي صعب اوي لما تلاقي كل الناس شايفينك نكرة
لحد ما في يوم فكرت وقولت هو انا للدرجه دي وحشه!! لدرجه ان محدش يحبني وكلهم بينفروا مني بالشكل دا ، ليه دايماً مضطره اتغير عشانهم ولو متغيرتش مش هيحبوني ، ليه!
حسيت كل حاجه بقت تقيله ، كلهم خذلوني بشكل بشع
نزلت اتمشي لقيتني جاية عند الجبل وعايزه انتحر ، انا مش عايزه اموت ، انا عايزه اخلص من الاحساس البشع اللي جوايا ، عايزه اريحهم
وارتاح.
ليه يوصلوني للدرجه دي؟!

• كلهم خذلوكِ بشكل بشع!
ابتسم بسخريه قبل ما يقول:
تعرفي ان انا كمان خذلوني بشكل بشع ، وتعرفي كمان ان حكايتك شبه حكايتي اوي ، وبرضو حاولت انتحر من نفس المكان ، يعني انا مش احسن واحد يهون عليكِ و ينصحك لانى بائس زيى زيك.
بس اللي حابب اقوله ليكِ ان مفيش حد وحش ، ربنا خلق كل واحد ليه جماله الخاص به ، احنا مش بنتولد وحشين ، يمكن هما مش قادرين يشوفوا الجمال اللي جواكِ ، مش قادرين يشوفوا جمال قلبك ، بس اللي متأكد منه انك جميلة ، انا واثق من كدا
• بس هما مش شايفين كدا
• مش مهم هما شايفينك ازاي ، المهم انتِ شايفة نفسك ازاي ، وانتِ لازم تكوني عارفه ومتأكده انك جميلة وقلبك جميل
• طب ازاي اشوف نفسي جميله؟!
• لما تلاقي نفسك بتعملي حاجات كويسه من غير ما تكوني مضطره ساعتها هتعرفي انك جميلة ، مثلا لما حد بيحتاجك بتقفي جنبه ، لو لقيتي حد محتاج مساعده بتساعديه حتي لو مطلبش ، لما بتخافي علي شخص واقع في مشكله وبتبقي عايزه تحليها له مع انك مش قريبه من الشخص دا اوي ، لما متعرفيش تأذى الناس اللي كانت سبب في اذاكِ ، ساعتها اعرفي ان قلبك جميل
ابتسمت وانا بقول:
شكرا يااا...
• نُهاد ، اسمي نُهاد
• شكرا بجد يا نُهاد مش عارفه اقولك ايه
• انا اللي متشكر بجد ، انتِ خلتيني اكتشف حاجات فيا كويسه
• ابتسمت قبل ما اقول:
انا لازم امشي دلوقتي ، في حاجه لازم اعملها
• ينفع اجي معاكِ وانتِ بتعملي الحاجه دي؟!
فكرت لثواني قبل ما اقول:
اه ينفع ، تعالي معايا

اخدته و روحنا اكتر مكان بيخليني مبسوطه وكل لما اكون متضايقه بروح هناك ، دار الايتام ، اشتريت هدايا للاطفال زي ما متعودة وكالعاده فرحوا لما شافوني وعرفتهم علي نُهاد وحبوه اوي
قعدنا واكلنا ولعبنا سوا ، قد ايه الأطفال دي جميله بجد ، بيحبوا من غير سبب او شرط ، بيقدروا يدخلوا السعاده قلوبنا من غير مجهود

• عرفتِ بقي انك جميله زي ما قولتلك!
• ليه بتقول كدا
• عشان انتِ جميله بجد ، مش بقول كلام وخلاص بس دي حقيقه
• اتبسط؟
• فوق ما تتخيلي
• وانا كمان مبسوطه اوي
• هو انتِ بتعملي كدا علطول؟!
• اه ، لما بكون متضايقه باجي هنا ، علي الاقل لقيت حد يحبني من غير سبب
• صح احنا يعتبر قضينا اليوم سوا ولحد دلوقتي معرفتش اسمك
ضحكت قبل ما اقول:
اسمي نور

قضينا يوم جميل اوي عكس ما كنت متخيله وعكس ما كنت ناوية اعمل ، رجعت بيتي مبسوطه وانا حاسه اني جميلة بجد ، بقيت حاسة اني عايزه امشي اقول لكل الناس اني جميله ومش وحشه زي ما هما شايفين

وصلت ليا رسالة علي الواتساب ، كانت من نُهاد:
• فاضيه؟!
• اه
• تيجي ننزل؟!
• يلا ، ساعه واكون جاهزه ، هستناك عند النيل في نفس المكان اللي قعدنا فيه قبل كدا
• تمام جداً

مش هنكر اني استغربت لما قالي ننزل ، بس حاجه جوايا قالتلي انه ممكن يكون متضايق ومحتاج حد يسمعه
زيى.
لبست الهاى كول الأزرق والجيبه البيج والطرحه البيج ، مهتمتش اني احط ميك اب زي ما متعودة احط وانا خارجه ، كنت مزاجي مش حلو ومش عندي شغف لأي حاجه
وصلت بعد نص ساعه ، كان قاعد مستنيني وباين علي وشه انه متضايق

• باين كدا ان اليوم النهارده حزين
ابتسم ابتسامه باهته وهو بيص ليا ويقول: ليه بتقولي كدا؟!
• انت مبصتش في المرايا قبل ما تنزل ولا ايه
ضحك المره دي قبل ما يقول:
باين عليا اوي كدا!!
ضحكت وانا بقول: انت وشك بيطلع بؤس ياابني
ابتسم في نفس اللحظه اللي قال فيها:
حسيت اني عايز اتكلم ، وبصراحه حسيتك مُستمعه كويسه زيى وهتسمعيني من غير ملل
• اممم يعني احساسي طلع صح
• احساس ايه؟!
• لا متشغلش بالك
يلا يا سيدي انا سمعتك
اتنهد وبص علي النيل قبل ما يقول:
من وانا صغير ابويا بيفرق بيني وبين اخواتي البنات ، كان بيجبلهم كل حاجه حلوة وانا لا ، لحد ما كبرت وهو كدا برضو ، معاملته كويسة مع كل الناس الا انا ، دايماً يقل مني وييجي عليا عشان اي حد ، دايماً بيضربني حتي وانا شاب ، سبت البيت ، ملقتش قدامي غير الحل دا ، انا بحبه اوي والله رغم كل حاجه عملها معايا ، بس مش عارف ليه بيعمل معايا كدا
استقليت بنفسي واخدت اوضة قعدت فيها ، بقيت بروح ل أهلى زيارات كل فتره ، في كل مره كنت بروح كنت بحس بلهفة امي واخواتي عليا ، بس هو لا ، حتي السلام كان بيبقي من غير نِفس ، كنت بتغاضي عن كل دا واقول مش مهم مهما عمل هو ابويا ، عملت كل حاجه عشان يحبني ، بس كل مره كنت مش بلاقي منه كلمه واحده حلوة يجبر خاطرى بيها ، ومكنتش بيأس وبحاول تاني ، لحد ما زهقت بعد محاولات كتير اوي معاه
• طب ليه محاولتش معاه؟!
• اتكلمت كتير اوي ، وماما واخواتي كلموه كتير ، وهو برضو مش بيتغير
اتنهد تنهيده طويله ظهرت كل الحزن اللي في قلبه:
قررت ابعد ، واطلع كل اللى في قلبي علي الورق ، انا بحب الكتابه اوي ، بدأت اكتب كل احساس وحش حسيته علي الورق في هيئة حكاية صغيره توصف اللي جوا قلوبنا وتعبر عنه ، عمرى ما هنسي اني اول ما بدأت اتعرضت لنقد كتير واستهزاء حتي اصحابي القريبين كانوا شايفين اني مش بكتب حلو ، اخواتي قالولي مع الوقت مستواك هيتحسن
بص بصة طويله للنيل قبل ما يقول:
البنت اللي كُنت بحبها قالتلي بالنص كدا "كتابة ايه ياابني بطل تفاهة بقي ياعم احمد شوقي"
• كنت؟!
• اه كُنت ، احنا مكملناش
• ليه؟!
• مش بحب اتكلم عن الموضوع دا ولا اقول عنها حاجه وحشه
بس هحكيلك
كنت بحبها اوي ، بعمل كل حاجه عشان تبقي مبسوطه ، بس هي كانت دايماً معاملتها معايا ناشفة ، مكانتش بتعاملني حلو غير لو عايزه مني حاجه ، كانت بتستغلني ، كنت بعتبرها ركني الهادي اللي بلجأله في وقت حُزنى وفرحى ، وهي كانت بتعتبرني ماكنه فلوس مش اكتر ، رغم كل الحاجات اللي كنت بعملها عشان تبقي مبسوطه ، هي برضو كانت مش بتشوفني اكتر من كدا
• طب محاولتش تعاتبها
• حاولت طبعاً ، واديتها فرص كتير بس هي مستغلتهاش
كانت دايماً شيفاني قليل ، من الاول محبتنيش
بص للنيل تاني وهو بيتنهد تنهيده طويلة بتعبر عن الحُزن اللي مالى قلبه وابتسم بسخريه وهو بيقول:
كلهم خذلوني بشكل بشع ، زيك!
• عشان كدا حاولت تنتحر قبل كدا؟!
• اه
بصتله واخدت نفس عميق قبل ما اقول:
عارف ، انا احترمتك اوي
• ليه؟!
• عشان رغم مُعامله والدك ليك انت مكنتش قاسي عليه ، معملتش زي ما بنشوف الايام دي ، انا مش عارفه هو ليه بيعمل كدا بس مقدرش اقول حاجه غير أن ربنا هيهديه اكيد وهيحبك ، هي حكاية وقت بس مش اكتر
انت نسيت البنت اللي كنت بتحبها؟!
• اه نسيتها ، هي مكانتش تستاهل ذرة حب من اللى اديته ليها ، مكانتش تستاهل تفضل جوايا يوم واحد ، مكانتش تستاهل حبي ليها ولا تفكيري فيها ، في الاول تعبت شوية بس حاولت اتجاوز كل دا لحد ما تجاوزته فعلاً
• جدع بجد ، واكيد ربنا هيعوضك عن كل حاجه وحشه شوفتها ، طبعاً انا مش احسن واحده تهون عليك ومش بعرف اقول ايه في المواقف دي ، بس عايزه اقولك ان كل دي بتبقي اختبارات من ربنا ، وبعدها ربنا بيهون وبيجبر قلوبنا
وعالفكره انا بحب القراءه اوي ، وبقرأ روايات وكتب ، ابقي ابعتلي اللي بتكتبه عشان حابة اقرأ ، ومن قبل ما اقرأ انا متأكدة انك بتكتب حلو اوي
ضحك ضحكة جميله اوي ، اخيراً
وقال:
وانا هستني رأيك.
• فك بقي وافرد وشك دا ، دا انت حياتك بائسه جداً
ضحك قبل ما يقول: مش قولتلك
بالمناسبه ، انتِ شكلك حلو اوي من غير ميك اب ، شكلك احلى من غيره
• بجد!
• اه والله
ابتسمت في نفس اللحظه اللي قولت فيها:
شكراً بجد
• علي ايه؟!
• على انك كل مره لما بتشوفني بتحسسني اني جميله
• عشان دي الحقيقه فعلاً
ابتسمت بكسوف وانا ببص في الأرض
سكتنا للحظات ، قطع صوته لحظات الصمت وهو بيقول:
تيجي نقوم نتمشي؟!
• يلا

كنا مبسوطين اوي ، ولأول مره من فتره طويله نقدر نقول اننا مبسوطين ، اتكلمنا كتير وضحكنا اكتر من قلبنا وكان باين فرحتنا بالوقت اللي قضناه سوا علي وشنا لدرجه ان البنت اللي بتبيع ورد افتكرتنا حبايب!
كأننا بنتشعلق في اي سبب يخلينا نرجع نضحك تاني بس المره دي من قلبنا بجد

عدت شهور ، قربنا من بعض اوي وبقينا أصحاب مُقربين ، كل يوم بنتكلم ، كان بيشاركني كل تفاصيل حياتي ، كل حاجه بتضايقني وكل حاجه بتفرحني ، بقي بيحب الاماكن اللي بحبها وييجي معايا فيها ، بقي دايماً بيحاول يثبتلي اني جميله ، واحاول اثبتله انه شخصيه تتحب وانه كاتب شاطر جداً
مستواه اتحسن في الكتابه بشكل ملحوظ ، كتب رواية، واخيراً تم إصدار اول رواية له والنهارده حفلة توقيع روايته الاولي في معرض الكتاب

لبست فستاني النبيتي وطرحه بيج ، وقفت قدام المرايا ، ركزت في ملامحي وافتكرته لما قالي ان شكلي حلو اوي ، حسيت اني فعلاً مش محتاجه ميك اب ، واكتفيت بأني احط روج خفيف

نزلت وقابلته في المكان اللي اتفقنا عليه ، كان لابس قميص نبيتي بارز عضلاته ، وبنطلون لونه بيج ، مكناش متفقين نلبس زي بعض والموضوع جه صدفه بس كانت صدفه حلوة اوي
كان شكله حلو اوي ، اول مره الاحظ انه جميل كدا

وصلنا المعرض ، كان في ناس كتير بيقولوله انهم متشوقين جداً يقرأوا الرواية فعلاً ، لحد ما في بنت قالتله:
حلو اوي الاهداء اللي في أول الرواية ، حضرتك كاتبه لحد معين؟!

فى اللحظه دي باصلي وعيونه في لمعة وابتسم في نفس اللحظه اللي قال فيها:
كتبت الاهداء دا لصديقتي ، وشريكتي في همومي وكل اللحظات اللي بكون مبسوط فيها ، كاتبه ل نور
نُهاد كان طول الوقت مش عايزني اقرأ الرواية ولا حتى الاهداء ، كان بيقولي في الوقت المناسب هتقرأيهم ، بس مكنتش اتوقع انه كاتب الاهداء ليا
بصيت له وانا متفاجأه ومكسوفه وفي نفس الوقت مبسوطه ، واخدت الكتاب بسرعه وشوفت الاهداء:
"كُنت تائه ، حتى التقيت بكِ"
"احبك يا جميلتي."
وكتب في الاخر جزء من قصيده الشاعر عمرو حسن:
" حتى جمالِك السر وراه انك عملاه من غير مجهود
مش محتاجه لمكياج ولا لون
ولا محتاجه لوقفة مرايات"

والدنيا سكتت لما الست قالت:
"وقابلتك انت لقيتك بتغير كل حياتي..معرفش ازاي حبيتك معرفش ازاي يا حياتي"