نادرة الوجود

• للأسف، المرض اتمكن منها جداً، خلال شهر بالكتير هيكون انتشر في كل جسمها، ادعيلها ربنا يتولاها
• إزاي يا دكتور! اكيد في حل
• يا دكتور عمر حضرتك عارف ان الكانسر مرض صعب علاجه، ادعي لها ربنا يتولاها ويصبركم

• إزيك يا نادرة!
لفيت وشى، كانت دكتوره فاطمه مشرفة القسم، وكان معاها شاب اول مره اشوفه
ابتسمت: الحمدلله يا دكتور
طمنيني عليكِ
• انا بخير الحمدلله
دي بقي يا دكتور عمر نادره، البنت اللي حكيت لك عنها وقولتلك قد ايه هي كويسه، دي اشطر ممرضه عندنا في القسم
ابتسم: اهلاً بيكِ
كملت وهي بتقول: و دا بقي دكتور عمر يا نادره، لسه جديد معانا في القسم
ابتسمت في نفس اللحظه اللي قولت فيها: اهلاً بحضرتك

كان شاب جميل اوي، شكله جميل، و روحه حلوة، وابتسامته تسحر، اول ما شوفته حسيت احساس غريب، إحساس اول مره احس به
من وقتها مخرجش من دماغي، وطبعاً كنت لازم اعمل ابحاثي واجيب كل حاجه عنه
دكتور عمر، شاب عنده ٣٠ سنه، كان شغال في الكويت ولسه راجع، مش مرتبط
إزاي الجميل دا مش مرتبط!

بدأ تفكيري فيه يزيد، بعد ما كنت مش بحب اروح المستشفي، بقيت بستني النهار يطلع عشان اروح واشوفه، بقيت بتلكك عشان اروح اسأله في اي حاجه في الشغل حتي لو عرفاها

"أمل حياتي يا حب غالي ما ينتهيش
يا أحلى غنوة، غنوة سمعها قلبي ولا تتنسيش
خُد عمري كله بس النهار ده، بس النهار ده
بس النهار ده خليني أعيش، خليني أعيش
خليني جنبك خليني في حضن قلبك خليني".

• ايه الروقان دا !
قاعده في جنينة المستشفي وبتسمعي ام كلثوم، جو عظيم
لفيت وشي وانا مش مصدقه ان دا صوته
• دكتور عمر!!
• مالك اتخضيتِ ليه! تحبي امشي!
ابتسمت:
لا لا مقصدش، انا استغربت بس
• طيب ينفع اقعد معاكِ؟
• اكيد
قعد جنبي، وقال:
ها بقي سرحانه في ايه؟!
• بفكر
• في ايه؟
• موضوع شاغل بالي
• لو حابة تحكي، فاانا حابب اسمعك
• حاسة بمشاعر غريبه ناحيه شخص، مشاعر مش قادره احددها
• قولي اللي جواكِ، يمكن اقدر اساعدك
• من فتره صغيره ظهر في حياتي شخص، اول مره شوفته قلبي دق بشكل غريب وحسيت إحساس اول مره احس به، من وقتها بقي مسيطر علي تفكيري، بقيت عايزه اكون معاه طول الوقت، واكلمه، اوقات كتير بنده الناس بإسمه، ملامحه بالنسبه لي بقت اجمل ملامح بشوفها، كأنه اخد جمال العالم كله له لوحده ومفيش حلوين بعديه، لو في اي وقت تخيلت انه خطب بتضايق، مش عارفه افسر إحساسي، بس اللي اعرفه اني مش عايزه حاجه منه، يكفيني بس وجوده
• بتحبيه
• لا طبعاً مش بحبه
• انا مش بسألك، انا بقولك انك بتحبيه
• بحبه! لا طبعاً، لا اكيد موقعتش لا
غير اني معرفوش شخصياً عشان احبه، ومش عارفاه من زمان عشان الحق احبه
• امال اللي انتِ حاساه دا تسميه ايه!
• مش عارفه، انا تايهة، ومش عارفه أحدد مشاعرى اتجاهه، بس برضو مش عايزه اتسرع واقول اني حبيته
• مش عايزه تتوجعي
• أكيد
• وعشان كدا مش عايزه تعترفي، خايفه تسيبي نفسك لإحساسك، خايفه تصارحي نفسك فتتوجعي
• انا مش قد اي تعب او وجع
• مش عارف اقولك ايه والله، بس كل اللي اقدر اقولهولك، لو خايفه تتوجعي متعلقيش نفسك بإحبال دايبه، وآمال مُزيفة
عارفه يا نادرة،
الحب علي قد ما هو جميل وإحساسه حلو ومختلف وبيخلينا نشوف الحياه بشكل تاني، بيخلينا نشوفها اجمل، وبيقدر يرفع سقف سعادتنا للسما، الا انه مُتعب وممكن في ثواني يوقعنا علي جدور رقبتنا ونكتشف الواقع المرير، نكتشف ان مفيش حاجه حلوة دايمة، وإن الحب مش دايم، الواقع بيفوقنا علي ذكريات صعب ننساها لأنها عايشه جوانا، الواقع دايماً بيكون أشد وأسوأ من اللي بنتوقعه
سكت للحظات، وبص لي وهو بيقول:
بس نصيحه مني لو الشخص اللي بتحبيه مش بيملك مشاعر ليكِ، امشي
امشي عشان هتتعبي اوي لو فضلتِ طول حياتك عايشه علي امل كداب

الدموع ظهرت في عينيا، في نفس اللحظه اللي قولت فيها:
عندك حق، شكراً يا دكتور علي نصيحتك
عن إذنك

بالرغم من ان كلامه وجعني، لكنه فوقني لانه حقيقي، فوقني وعرفني انه مش حاسس بيا، ولا شايفني
قررت اسمع كلامه وابعد، و بالرغم من إن البعد كان مش حل مُريح، لكن القرب كان مؤذى بشكل اكبر
فكرت كتير ازاي حبيته بالرغم من انى معرفوش شخصياً، ازاي حبيته من اول مره شوفته، ازاي قلبي اتعلق به بسرعه كدا وحِلف ما يخرجه منه!
فكرت كتير لكن ملقتش اجابه كالعادة
اخدت اجازه من المستشفي علشان اقدر ابعد، يمكن ارتاح، لكن التعب كان بيزيد كل يوم اكتر من اليوم اللي قبله، مش بس التعب النفسي هو اللي بيزيد، لا دا التعب الجسماني برضو بيزيد، زي الصداع اللي مش بيخف تقريباً، والدوخه، وصعوبة المشي وكأني لسه طفله بتتعلم المشي
كنت بقول ان كل دا بسبب ان نفسيتي مش متظبطه، لحد ما في يوم دكتور عمر جه يزورني، و لما شافني تعبانه بالشكل دا صمم ياخدني المستشفي عشان نتطمن
و بعد وقت قصير غِبت عن الوعي، فوقت علي صوت الدكتور بيقول:
للأسف، المرض اتمكن منها جداً، خلال شهر بالكتير هيكون انتشر في كل جسمها، ادعيلها ربنا يتولاها
• ازاي يا دكتور! اكيد في حل
• يا دكتور عمر حضرتك عارف الكانسر مرض صعب علاجه، ادعي لها ربنا يتولاها

دموعي نزلت في نفس اللحظه اللي افتكرت فيها اول مره شوفته، اللحظه اللي قلبي اتخطف فيها ومقدرش يرجع تاني، اللحظه اللي فيها بس قِدرت اعرف معني الحب

• دكتور عمر!
• نادره! انتِ كويسه؟!
ابتسمت والدموع في عيني:
خلصت خلاص يا دكتور
• هي ايه اللي خلصت؟!
• حياتي، خلصت خلاص
• لا يا نادره متقوليش كدا، انتِ هتخفي وتقومي بالسلامة
• كل دا كلام طبيعي تقوله في الوقت دا
• لا دا مش مجرد كلام يا نادرة، دا حقيقه
• هو اللي بيجيله المرض دا بيخف يا دكتور!
• بيخف بإرادة ربنا وإراده الشخص وعزيمته، بيخف بثقته في ربنا، ربنا قادر علي كل شئ، انتِ هتقومي وهتاخدي الكيماوي وهنعدي الفتره دي سوا لحد ما تبقي كويسه
• سوا؟!
• سوا
ابتسمت بضعف وانا ببص له:
فاكر لما قولتلك اني عندي مشاعر ناحيه شخص، و وقتها قولتلي اني كدا بحبه
• ايوا، فاكر
• الشخص اللي كنت بتكلم عنه كان انت، انت اول شخص احس ناحيته كدا، اول مره اصلاً احس كدا في حياتي، اول مره اعرف معني الحب كان منك، ومعاك
اول مره اعرف الإنسان لما بيحب بيحس باإيه
• بيحس بإيه؟!
• بيحس انه تايه ومتلخبط، بيكون مبسوط، بس برضو بيكون خايف، بيكون مبسوط بإحساسه و بوجود حبيبه جنبه، وبكلامه معاه حتي لو بسيط او قليل، قلبه بيطير من الفرحه لما حبيبه يبتسم بس، بيكون مبسوط وهو سرحان في ملامحه اللي محبش قدها، كنت دايماً بقول ازاي شخص ممكن يفرح بمجرد ضحكه، او كلمه، او نظره، او حتى صوره له، ازاي سعادتنا مرتبطه بوجود شخص!
ازاي ابتسامته بس قادره تقولنا ان الحياه كدا جميله وان مفيش حاجه حلوة بعد ابتسامته! لحد ما عِرفت معني الكلام دا
هو الحب كدا.. جميل، بس بيوجع القلب
• ليه مقولتليش من زمان؟!
• فكرت كتير اقولك، بس خوفت، قولت يعني هو دكتور وهيبصلك انتِ، هو تعليمه احسن مِنك وناجح في حياته، قدامه ناس كتير في نفس مستوي تعليمه، اكيد مش هيسيبهم ويحبك
مع اني مقتنعه ان تعليمي كويس، وإن الناس مش بتتقاس بمستوى تعليمها ولا بالكام لغه اللي تعرفهم، بس خوفت، خوفت اجيلك و ارجع خاطرى مكسور اكتر
لما بعدت كنت كتير بقول ل نفسي هو انا ناقصني ايه يعني! حواليا أهلى واصحابي وناس بيحبوني، الدنيا مش هتقف عليه، بس الدنيا وقفت عليك، كان ناقصني وجودك
سكت للحظات وهو بيبص في عيوني بااهتمام، وبعدين قال:
انا عمرى ما فكرت بالشكل دا يا نادرة، وعمرى ما هيهون عليا تعبك و زعلك، عمرى ما هيهون عليا اني اكسر بخاطرك، لما اخدتِ اجازه من المستشفي استغربت، ومع الوقت تفكيري فيكِ بدأ يزيد، و مع الوقت برضو لقيتِك بتوحشيني، وجيت لِك علشان وحشتيني يا نادرة، علشان اقولك اني مشوفتش طعم الحب إلا في عينيكِ
ابتسمت بقلة حيله:
بعد ايه يا دكتور! انا خلاص ايامي في الدنيا قصيره ومعدودة، بس بالرغم من كدا، انا مبسوطه
• متقوليش كدا، انتِ هتاخدي الكيماوي وتخفي وتبقي كويسه، وانا جنبك، ياستي علي الاقل إدينا فرصه تانيه، هتخسرى ايه يعني!
• حاضر
ابتسم ابتسامه سعيده قبل ما يقول:
طيب انا همشي دلوقتي عشان الوقت اتأخر، واجيلك بكرا الصبح
• اتفقنا

"ياما الحب نده على قلبي، ما ردش قلبي جواب
ياما الشوق حاول يحايلني، واقول له روح يا عذاب
ياما عيون شاغلوني لكن ولا شغلوني
ياما عيون شاغلوني، شاغلوني لكن ولا شغلوني
إلا عُيونك إنت دول بس اللي خدوني، خدوني
وبحُبك أمروني
إلا عُيونك إنت دول بس اللي خدوني، خدوني
وبحُبك أمروني".

صحيت من النوم بسبب صوت الاغاني، فتحت عيني كان عمر قاعد قدامي، ابتسم في نفس اللحظه اللي قال فيها:
"ياما عيون شاغلوني، شاغلوني لكن ولا شغلوني
إلا عُيونك إنت دول بس اللي خدوني، خدوني".
صباح الخير
قومي يلا عشان ورانا حاجات كتير النهارده
ابتسمت وانا ببص له بحب، وبقول:
صباح النور، ورانا ايه؟!
• ورانا فطار، ورانا جلسه، ورانا مفاجأه، ورانا مشوار كبير بدأ وهنمشيه سوا
يلا هسيبك تجهزي نفسك عقبال ما اجيب الفطار واجي، يلا قومي

سابني ومشي في نفس اللحظه اللي قومت فيها دخلت الحمام وخرجت وغيرت هدومي وصليت، وبعد وقت قصير عمر جه تاني وقعدنا نفطر سوا

بصتله بهدوء قبل ما اقول:
تعرف! علي قد ما المرض صعب والعيشة في المستشفي صعبه، إلا ان وجودك مهون حاجات كتير، وبالرغم من ان المشوار طويل ومش سهل بس برضو وجودك مخليني عندي استعداد امشيه، وجودك جميل اوي يا عمر، ربنا يديمه
ابتسم في نفس اللحظه اللي قال فيها:
نادرة انتِ وجودِك بيطمني، وانا نفسي أفضل متطمن علطول

ابتسمت:
طب ايه هي المفاجأه
• شوية وهتعرفي

عدى وقت قصير وكانوا كل اللى بحبهم موجودين عندي، اصحابي و أهلى، عمر جابهم كلهم عشان ابقي مبسوطه، واللي كان مخليني مبسوطه اكتر انه بيحاول يخليني مبسوطه بأبسط الطرق

عدت سنه، سنه كامله بنحارب سوا المرض، سنه كامله مليانة تعب ويأس وخوف ومشاعر سلبية كتير اوي، لكن وجوده كان مهون كل دا، استسلمت كتير بس هو مستسلمش، كان دايماً عنده يقين انى هبقي كويسة، اوقات كتير كنت بشوف محاولاتنا ملهاش داعى لكن كنت بحاول، كان بيجي لي كل يوم و وشه مليان امل وتفاؤل، كتير كنت اقوله يمشي ويسيبني انا واحده حياتها انتهت، يرد ويقول حياتِك منتهتش ولو انتهت هنشوف طريق جديد ونبدأ منه، كان عارف انى بحب اغاني ام كلثوم وكان كل يوم يصحيني علي اغنيه ليها
لحد ما حالتى بدأت تتحسن، كانت مُعجزه، كانت مُعاناه، لكن مُعاناة جميله، كانت رحلة صعبه و طويلة لكن كانت جميله بوجوده، يكفيني بس وجوده عشان ابقي كويسه

في يوم دخل عليا وهو مبسوط والدموع في عينيه، بص لي وابتسم ابتسامه سعيده وهو بيقول:
انتهوا خلاص، المشوار الطويل والرحله الصعبه انتهوا خلاص، الدكتور قالي انك اتعافيتِ بالكامل، بقيتِ كويسه
كنت مش مصدقه، حضنتنه بعفوية ودموعي نازله بغزارة، كنت مبسوطه، مبسوطه اوي

عدي وقت قصير، بصيت له بحب وانا بقول:
• بتحبنى؟ لسة عايز تكمل معايا؟!
• انا بتطمن معاكِ، هو في حب اكتر من ان الواحد يبقي متطمن!