نعمه وجودِكِ

• للأسف ، هو مش هيقدر يمشي تاني
• ازاي يا دكتور!! اكيد في حل
• يا استاذه رؤي ، الحادثه مكانتش سهله يعني صعب يقدر يمشي تاني ، انا اسف.

لسة فاكر اول مره كلمتك فيها ، وقتها كنت عندي ١٩ سنه ، في يوم من ليالي الشتاء البارده وانا سهران للفجر بشرب النسكافيه بتاعي كالعاده ، فتحت الانستجرام لقيت بنت عاملة لاف علي صورة ليا ، دخلت علي ايميلها بسرعة وعملت متابعه ، عدت دقايق ولقيتك قبلتِ المتابعه ، فكرت اكلمك ، كنت عمرى ما عرفت بنات قبلك ، قولت اجرب اعرف ، وكنتِ اول بنت اعرفها
كتبت رسالة وقولتلك: ازيك؟!

كنت خايف تكسفيني و وقتها شكلي كان هيبقي وحش اوي قدام نفسي ، بس كل خوفي اتبخر لما رديتي عليا وقولتِ: كويسه وانت؟!

بدأنا نتكلم ونتعرف علي بعض اكتر ، عدى ٦ شهور كل يوم بنتكلم ، بقيت عارف كل تفاصيل يومك وانتِ كمان ، حكيتلك عن احلامى وطموحاتى واحزانى وحكتيلي عن كل حاجه وحشه حصلتلك في حياتك وعن الحاجات اللي بتفرحك وان اكتر حاجه بتحبيها هي البسبوسه ، كان بينا حاجات كتير مُشتركة ، كنا بنحب الورد الابيض والشتا والنسكافيه وفيروز ، وبنحب عصير الجوافه ، الحاجه الوحيده اللي كُنا مش متفقين عليها هي اني بحب عمرو دياب بس انتِ مش بتحبي تسمعيه ، كان بينا توافق فكرى كبير وكُنا متفاهمين

لحد ما في يوم كنتِ بتحكيلي عن زميلك اللي بيحبك وعايز يتقدملك ، مش هنكر اني كنت غيران عليكِ ، كان في نار في صدرى ، بس كُنت مُجبر اكتمها جوايا
كنتِ واخده كل وقتي وشاغلة كل تفكيري ، بحب وقتي معاكِ ، بحب كلامك وهزارك ، بحب نبرة صوتك ، بحب كل حاجه انتِ بتحبيها
وبحبك ، بس عمرى ما اقدر اقول

فاكر اول مره قابلتك ، كنت قاعد مستنيكِ في الكافيه ، اول ما دخلتِ شوفت بنت جميلة لابسة نضاره نظر ، غمازاتها بانت لما شافتني وضحكت ، كنتِ وشك احمر من كتر الكسوف ، كنتِ تايهة ومش مركزه في حاجه غير معايا ، كنت باخد بالي وانتِ بتبصيلي بطرف عينيك
كنتِ مجرد تجربه ، كنت واخد قرار اني هصاحب ، بس مش هحب ، مش هعمل حاجه انا مش قدها ، مش هجيب وجع القلب لنفسي ولبنت ملهاش اي ذنب ، بس الحب مش بإيدينا ومحدش بيقدر يتحكم في قلبه ومشاعره ، ومش كل قرار بناخد بنطلع قده وننفذه

و جه اليوم اللي مقدرتيش تخبي مشاعرك اكتر من كدا واعترفتيلي فيه ب حُبك ، كنت مبسوط لانك بتحبيني زي ما بحبك ، بس موجوع عشان الحب بالنسبه ليا صعب ، مش هقدر اخليكِ جنبي سنين عقبال ما اجهز نفسي علي امل اننا نتجوز ، مش هقدر اوعدك بحاجه واطلع مش قدها

في كل مره كُنا بنتقابل فيها كُنت بشوف في عيونك شغف انك عايزه تسمعيها مني ، بس لأ ، مش هقولها غير وكل حاجه متظبطه

عدى ٣ سنين ، كُنت قِدرت اجمع فيهم حق الشبكه والشقه والعفش ، كنت بشتغل شُغلانتين ، تعبت اوي بس انتِ تستاهلي اكتر من كدا

قررت انى اعترفلك بحُبي ، ماهو خلاص مش باقي غير حاجاات قليلة والحاجات دي هنختارها سوا
جهزت قاعده حلوة في المكان اللي بتحبي تقعدي فيه عند النيل ، اشتريتلك سلسلة دهب عليها اول حرف من اسمي ، وجبتلك البسبوسه اللي بتحبيها وجبتلك ورد لونه ابيض زي ما بتحبيه ، صحيت من الصبح بدرى عشان اظبط نفسي ، لبست بنطلون لونه ابيض وعليه شيميز اسود زي ما بتحبي ، كان لازم كل حاجه تبقي متظبطة ، هو اناا كل يوم هقول ل حبيبتى انى بحبها لأول مرة؟!!

وصلتِ واستنيتي اني اجى بس مجتش ، قلقتِ عليا اتصلتي بيا كتير لحد ما اختي ردت عليكِ وقالتلك اني عملت حادثه ونقلوني المستشفي

• للأسف هو مش هيقدر يمشي تاني
• ازاي يا دكتور اكيد في حل
• يا استاذه رؤى ، الحادثه كانت مش سهلة والتقارير بتقول انه صعب يمشي تاني ، انا اسف

• رؤى!
• يوسف! انت كويس؟!
• هو انا كدا مش همشي تاني!!
• لا يا يوسف هنحاول وهنعمل علاج طبيعي ونعمل اي حاجه المهم انت تبقي كويس وترجع تمشي تاني

متخيلتش اني في يوم هيحصلي كدا ، وخصوصاً يوم ما اكون ناوي اعترفلك بحُبي ، كل حاجه اتهدت ، أحلامي وطموحاتي واللي كنت ببنيه في ٣ سنين اتهد في لحظة!
استسلمت بس انتِ مستسلمتيش وكنتِ عندك يقين اني هرجع امشي تاني ، كُنت شايف محاولاتك ملهاش داعى لكن كُنت بحاول بعد اقناعك ليا ، كنتِ بتجيلي كل يوم و وشك كُله امل اني هخف وامشي تاني ، كنتِ بتخليني اروح جلسات العلاج الطبيعي ، كتير اوي قولتلك امشي ومتجيش تاني وشوفي حياتك انا واحد حياته انتهت ، ولكن انتِ كنتِ كل مرة بتردي عليا وتقولي "حياتك منتهتش ، ولو في يوم انتهت هنبدأ تاني سوا وحتي لو كل الطرق اتقفلت هنشوف طريق جديد ونبدأ منه"

كنتِ عارفة اني بحب البورتريهات اللي مكتوب عليها اغاني ، وبورتريهات ام كلثوم وفيروز وعبدالحليم فجبتيهم وعلقتيهم في اوضتي ، كنتِ بتقعدي تسمعي معايا عمرو دياب مع انك مش بتحبيه ، كنتِ بتخرجيني ونروح نقعد عند البحر عشان نفسيتي تكون احسن

استمرينا كدا لاكتر من سنه ومفيش تحسن بيحصل في حالتى لحد ما في يوم جيتي البيت وقولتلك اني جبت أخرى ومش هحاول تاني ، خلاص تعبت من المحاولات الفاشله واللي كنت عارف من الاول انها هتفشل
• يعني ايه جبت اخرك!!
• يعني انا تعبت من كتر المحاولات اللي مفيش منها فايده ، عدي اكتر من سنه ومفيش تحسن ، الظاهر اني مش همشي تاني زي ما الدكتور قال يا رؤى ، ارجوكِ متتعبيش نفسك وتتعبيني معاكِ

دموعك اتجمعت في عينك.
لا يا يوسف ، هنحاول ، حتي لو هنحاول سنتين وتلاتة وأربعة بس بس نحاول ، الأمل بيموت مع الإنسان ، وانت لسه عايش ، وطول ما انت عايش يبقي في امل يا يوسف ، هنحاول كتير لحد ما ننجح

زعقت بكل قوتي وانا بقول:
الدكاتره كلهم قالوا اني مش همشي تاني ، هو انتِ هتفهمي احسن منهم ، ارجوكِ يا رؤى امشي ، انا هستسلم خلاص ، مش قادر اكمل

• يوسف انا بحبك ، بحبك لدرجة اني مقدرش اتخيل الحياة من غيرك ، انا مش هفهم احسن من الدكاتره بس عندي ثقة في ربنا انه مش هيخيب ظني وهيستجيب لدعواتي ، انا واثقه في ربنا و واثقه في رحمته يا يوسف

معرفتش ارد ودموعي نزلت غصب عني ، حسيت عقلي وقف ومش قادر افكر ، انا نفسي اكمل بس مش قادر
• انا همشي يا يوسف ، هسيبك تهدي النهارده وبكرة هجيلك عشان نروح جلسة العلاج الطبيعي سوا

عدي ٥ شهور وحالتي بدأت تتحسن ، كانت مُعجزه واهلى واصحابي والدكاترة كانوا مستغربين اني بدأت اتحسن ، ومع الوقت رجعت امشي تاني ، رجعت امشي بعد مُعاناة ولكن كانت مُعاناة جميلة ، كانت رحلة صعبة بس جميلة عشان انتِ جنبي

وفي يوم بعد ما وصلت لمرحلة اني اقدر امشي لوحدي ، ظبطت قاعده حلوة عند النيل تاني وجبتلك البسبوسة اللي بتحبيها وجبتلك السلسلة الدهب اللي عليها اول حرف من اسمي واشتريتلك ورد ابيض تاني زي ما بتحبيه ، وصحيت من الصبح بدرى عشان اظبط نفسي ولبست بنطلون ابيض وشيميز اسود زي ما بتحبي ، كان لازم كل حاجه تبقي متظبطه ، هو انا كل يوم هقول ل حبيبتى اني بحبها لأول مرة؟!!

الدنيا سكتت لما عمرو حسن قال:
"وان النعمه اللى كبيرة علي قلبي هي نعمه وجودك".