حكاوي أنس

• في عريس متقدملك يا فاتن
• يووووه ، عريس تاني يا ماما
هنتكلم في الموضوع ده تاني!
• اه هنتكلم تاني وتالت وعاشر ، انتِ مش صغيره انتِ بقيتِ عندك ٢٥ سنه
اللي قدك اتجوزوا وخلفوا وانتِ لسة مش عايزه توافقي علي حد
• يا ماما انا لسه صغيره ، انا ماليش علاقه باللي اتجوزوا وخلفوا
كل واحد ليه تفكيره وليه قناعاته وكل واحد برضو حر في حياته
• انتِ هتفضلي تعيدي في كلام علم النفس اللي بتقرأيه دا وتحاولي تقنعيني بيه
• انا مش بحاول اقنعك ، انا بس بقولك ان كل واحد ليه شخصيه وطريقه تفكير
• ما انتِ طريقه تفكيرك غلط
• يا ماما حضرتك مش من حقك تحكمي علي طريقه تفكيري بإنها غلط
• لا من حقي ، عشان انتِ بنتي ولازم لما اشوفك بتعملي حاجه غلط انبهك
• طيب يا ماما انتِ عايزه ايه دلوقتي؟
• عيزاكِ تقعدي مع العريس
• حاضر ، حاجه تاني؟
• وتدي لنفسك فرصه وتفكري كويس
• حاضر
• لما اشوف اخرتها معاكِ

خرجت وسابتني لوحدي ، حسيت احساس غريب ، حسيت اني مش عارفه اقبل حد غيره في حياتي ، انا لسه بحبه ومُعترفه ب دا ، بس مش ذنبي اني حبيته ، الحب مش باختيارنا ، والنسيان برضو مش باختيارنا ، ازاي هقدر انسي كل التفاصيل اللي عشتها معاه بسهوله كدا! ، احنا اللي بينا مكانش قليل
افتكرت اول مره اتقابلنا..
كنا في كافتيريا الجامعه وحد عاكسني وهو بس اللي دافع عني ، ومن وقتها بقينا أصحاب ، قربنا جدا من بعض ، اكتر احساس كنت بحسه معاه هو احساس الأمان ، كنت بمشي جنبه في الجامعه وانا متأكده ان محدش هيقدر يضايقني عشان هو معايا
نزلت قعدت عند البحر ، اول مكان اعترفلي فيه بحبه ليا
عدت سنين ولسه باجي الاماكن اللي كانت بتجمعنا ، عدت سنين وكل يوم بقول اني هتجاوزه ومش بقدر ، كل يوم بقول هتعدي ، ومش بتعدي ، الوقت فات ومقدرتش أنساه..
كنا علاقتنا حلوة اوي كأصحاب ، الحب غير كل حاجه ، مبقتش عارفه العيب في الحب عشان فرقنا عن بعض ، ولا العيب فينا احنا
قد ايه الذكريات مؤلمه ، كل ما تكون الذكريات صادقه كل ما هتكون مؤلمه اكتر ، قد ايه الحب دا شئ مُرهق

عدت عربيه الايس كريم اللي اتردد منها صوت ليندا بيطار وهي بتقول:

حبيت جميل ياريتني ظلهُ
حاز الجمال والحسن دا كُله
لما رأيته ، ملك فؤادي ياعيني
صبرت قلبي ، واتحملت ذُله

نزلت دمعه مني وانا بغني معاها وبقول:
"صبرت قلبي واتحملت ذُله"

عدت الايام وجه معاد المُقابله.

خايفه ، مش قادره استوعب ازاي هقعد مع حد غيره ، ازاي ممكن يحصل نصيب وابقي لحد غيره
هو اتجوز وعاش حياته وقدر يكمل من غيري ، بس انا مش قادره اتجاوزه ، مش قادره اعيش حياتي زيه ، مش عارفه اكمل من غيره

• يلا يا فاتن عشان العريس جه
• حاضر يا ماما

• إزيك يا فاتن
• الحمد لله ، وانت؟
• الحمد لله

سكتنا للحظات ، بعدين قال:
• مش عايزه تعرفي حاجه عني؟
• زي ايه ؟
• اسمي مثلاً

سكت ، كنت مش حابه اعرف حاجه ، كل اللي عايزاه ان الوقت يعدي بسرعه وهو يمشي وارفضه

• طيب يا ستي انا هقولك
انا اسمي أنس ، عندي ٢٧ سنه ، متخرج من كليه حاسبات ومعلومات ، مُنتظم علي الصلاة

سكت للحظات وبعدين قال:

• مش عارف اقولك ايه تاني
انتِ مش عايزه تعرفي حاجه مُعينه؟
• لا

سكت واتنهد بهدوء وبعدين قال:

• طيب يا فاتن ، انا مبسوط اني عرفتك حقيقي ، بس قبل ما امشي عايز اطلب منك طلب
ممكن؟
• اتفضل
• عايزك تدي لنفسك فُرصه ، ادي لنفسك فُرصه للتفكير ، ادي لنفسك فُرصه يمكن حياتك تتغير و تخرجي من الضلمه اللي انتِ فيها

بعد ما مشي دخلت اوضتي وقعدت افكر في كلامه ، فيها ايه لو سمعت كلامه واديت لنفسي فرصه ، مش يمكن حياتي تتغير وأخرج من الضلمه اللي انا فيها فعلاً زي ما قالي ، مش يمكن كل حاجه تبقي كويسه
ازاي من كلمتين قِدر يغير تفكيري!

عدى اسبوع
دماغى مش موقفه تفكير ، في صراع ما بين اني مش قادره اتخيل حد غير يوسف في حياتي ، وما بين اني من حقي اعيش حياتي زي ما هو عمل واحاول اتجاوزه

• ماما
• نعم يا فاتن
• انا موافقه
• موافقه علي ايه؟
• علي أنس

الفرحه بانت علي ملامح وشها وهي بتقول:

• بجد يا فاتن ، موافقة تتخطبي ل أنس
• اه يا ماما
اخدتنى في حُضنها بكل فرحة:
• الف مبروك يا حبيبتي ، انتِ فرحتيني اوي ، ربنا يفرح قلبك ويريحه زي ما ريحتي قلبي

حاسه براحه غريبة ، بس تفكيري في يوسف مسيطر علي احساس الراحه ، مش متخيله اني ممكن اقدر انسي يوسف ، اللي بينا مش قليل عشان يتنسي بسهولة كدا
رغم اني وافقت بس لسة مُتردده ، احساس القلق والخوف ملازمنى ، هعمل ايه لو مرتاحتش مع أنس ، انا مش قد ان قلبي يوجعني تاني
لحد يوم الخطوبه كنت حاسه بحاجات كتير ، مرتاحه بس خايفه ، بحب يوسف و واثقه اني مش هنساه ، بس مش عارفه ليه وافقت علي أنس لما انا واثقه كدا!
كنت بحاول اصطنع الفرحه في الخطوبه عشان محدش يلاحظ حاجه وخصوصاً أنس ، بس مش قادره ومش عارفه
اليوم خلص علي خير ، دعيت ربنا كتير ان أنس ميكونش لاحظ حاجه

عدى يومين وأنس طلب مني اننا نخرج سوا ، معنديش طاقه اني اخرج معاه ، بس كنت عايزه ادي لنفسي فُرصة زي ما قالي ، يمكن اخرج من الضلمه اللي انا حابسه نفسي فيها بقالي سنين
قعدنا في كافيه.

• بتحبي القهوه؟
• اه
• اجبها لك فرنساوى؟
ابتسمت وانا بقوله:
• شكراً انا مش قادرة اشرب حاجه
• هجبها لك فرنساوي ، انا عارف انك بتحبيها
بصيت له بااستغراب وكنت لسة هقول حاجه بس كان هو سابقنى وطلب القهوة

• لسة بتحبيه؟
سؤاله فاجئني وبان على ملامحى التوتر وانا بقول:
• هو مين؟
• فاتن
من اول ما شوفتك ساعت المُقابله وانا عرفت انك كنتِ بتحبى حد ومحصلش نصيب
• ليه وافقت تُخطبنى طالما عرفت؟
• مش عارف ، حقيقي مش عارف
بس يمكن اكون انا سبب خروجك من الضلمه اللى انتِ فيها دى ، يمكن اكون انا الفرصة التانيه اللى ربنا باعتها ل قلبك عشان يخف من حبه
يمكن تحسى انى بتكلم بنرجسيه شوية ، بس انا بفكر بواقعية اكتر
سكت للحظه ، وبعدين قال:
• ليه سبتيه لما انتِ لسة بتحبيه كل الحب دا ؟
• مقدرتش اكمل ، صدقني حاولت كتير بكل طاقتي بس مقدرتش ، طول الوقت كنت بتنازل وبقدم حاجات عكس قناعاتي عشان بس هو يكون مرتاح
• وايه اللي حصل ؟
• فجأه حسيت احساس غريب ، حسيت اني مبقتش بتاعت زمان واني عشان مخسروش تنازلت عن حاجات كتير جدا وغيرت حاجات كتير في شخصيتي عشان بس هو يبقي راضي ومرتاح ، بس اكتشفت ان انا اللي خسرت نفسي

سكت للحظة ، ابتسمت فيها بوجع وبعدين قولت:

• عارف ، انا حبيته اوي ، ومعتقدش هقدر احب غيره او أنساه وانسي كل الذكريات الجميلة اللي بينا لأنها كانت ذكريات حقيقيه جدا ، لكن بالرغم من دا هو محبنيش ، احنا مكناش مناسبين لبعض من الاول بس انا كنت بعافر عشان نكمل ، كل واحد فينا ليه شخصيته وقناعاته ، هو كان بيحاول يغير شخصيتي ، بيحاول يغير حاجات في تكويني اصلا عشان هو يبقي مبسوط ، كان لازم عشان العلاقه دي تكمل اتنازل عن حاجات كتير ، بس كنت هتنازل عن ايه تاني!
هو قدر يخليني اتنازل عن حاجات كتير بحبها ، بس مع الوقت اكتشفت ان الحاجات اللي بحبها دي كانت حاجات في شخصيتي

سكتت للحظة ، اتنهدت فيها بوجع ، وقولت:

• كنت بعافر عشان مخسروش ، بس في الاخر خسرت نفسي

حرك ايده ولمس صوابعي ، ايدي اترعشت للحظه قبل ما اسحبها بالراحه ، وبعدين قال:

• المهم انك عرفتِ دا ، حتي لو متأخر ، بس عرفتِ انك مينفعش تكملوا سوا واخدتي القرار الصح

• يوسف مش مجرد شخص دخل وخرج من حياتي بسهوله كدا ، احنا بينا ذكريات كتير صعب تتنسي ، ذكريات كانت صادقه فعلاً

اتنهدت بوجع قبل ما اقول:

• او يمكن انا بس اللي كنت صادقه زياده عن اللزوم
• لسة بتحبيه؟!

قال جملته الاخيره بحزن مقدرش يداريه.

• لسه.
• رغم كل الاذى اللي سببه ليكِ!
• رغم كل حاجه كسرها فيا

بان علي ملامحه الوجع ، لكن في ايدى ايه اعمله؟!
الحب مش باختيارنا، رغم ان حبى القديم فات عليه سنين الا انى مش عارفه انساه و لسه عايشه علي ذكرياته ، رغم أنى مقتنعه انه مكانش الأنسب ليا ، رغم أنى مقتنعه باستحالة الرجوع..

اتنهدت بوجع في نفس اللحظة اللي قالت فيها ام كلثوم:
"كلموني تاني عنك فكروني ، فكروني .. صحوا نار الشوق ، الشوق في قلبي وفي عيوني.."

نزلت دمعه منى مسحتها بسرعه قبل ما يشوفها ، وبعدين قولت:

• ممكن نمشي؟
• ممكن

بعد ما وصلت البيت وقعدت لوحدى ، حسيت انى مرتاحه اوي بعد ما اتكلمت مع أنس ، احساس بالراحه غريب عمرى ما حسيته قبل كدا
قررت انى هدى ل نفسي و ل أنس فرصة ، هحاول مفكرش في يوسف ، هستبدله بحاجه تانيه زي قراءه القرأن او اني اتكلم مع أنس

موبايلي رن ، كان أنس ، وبعدين رديت وقولت:

• ايوا يا أنس
• عامله ايه ؟
• الحمد لله انت اخبارك ايه؟
• الحمدلله
ها طمنيني عليكِ ، عامله ايه النهارده لسه بتفكرى؟
• بدأ التفكير يقل
• ازاي؟
• زى ما قولتلك قبل كدا بقيت بستبدله بحاجه تانيه
• زي ايه؟
• زي مثلا اني اقرأ قرأن او اني اكلمك

اتنهد براحه قبل ما يقول:

• انا مبسوط بيكِ اوي ، و واثق انك هتتجاوزيه وهتعدي الفتره دي
• و انا مبسوطه انك جنبي

عدت شهور ، أنس معايا كل يوم وفي كل وقت ، عرف يملك قلبي كويس لحد ما عرفت اتجاوز يوسف.
وعلقني بيه ، عرف يعلقني بيه ويخليني انسي كل حاجه حصلت ليا ، في ناس بتدخل حياتنا بتبقي عباره عن فرصة تانيه ، وسبب خروجنا من الضلمه اللي بنبقي فيها ، بيبقوا عباره عن دوا لقلوبنا عشان وجعها يخف ، دلوقتي بس عرفت ان العيب مش في الحب ، العيب فينا احنا ، الحب دا أجمل حاجه ممكن نحس بيها ، حاجه عظيمه ان يبقي جنبنا شخص يخاف علينا ، واقف جنبنا في كل حاجه ، في حُزننا قبل فرحنا ، شخص يكون سند.

موبايلي رن ، رديت وقولت:
• ايوا يا أنس
• عامله ايه؟
• الحمد لله بخير ، انت اخبارك ايه؟
• بخير طول ما انتِ بخير
ابتسمت في نفس اللحظة اللي قولت فيها:
• يارب دايماً اشوفك بخير
• طب ايه رأيك نخرج النهارده؟
• يلا بينا
• هستناكِ كمان نص ساعه تحت البيت عندكم
• حاضر ، هقفل بقي عشان الحق اجهز
• ماشي ، سلام
• سلام

لبست فستان ابيض فيه كرانيش من تحت وحزام عند الوسط ولبست طرحه نبيتي وحطيت روج نبيتي خفيف
كنت قاصده ابقي احلى واحده في عيونه

عدت النص ساعه ونزلت ، كان واقف تحت البيت
اول ما شافني بصلي بصة حلوة اوي ، بصة انبهار ، كأنه عايز يقولي انا قد ايه جميله
وبعدين قال:

• شكلك حلو اوي النهارده

ابتسمت قبل ما اقول:

• شكراً ربنا يخليك
انت اللى شكلك حلو اوي
مش مُجامله ، ده حقيقي

ابتسم والفرحه بانت علي وشه في نفس اللحظه اللي قال فيها:

• طب ايه هنروح فين؟
• انت عايزنا نروح فين؟
• اي مكان حلو طالما انتِ معايا

ابتسمت بخجل في نفس اللحظة اللي قولت فيها:

• تعالي نروح نقعد عند البحر
• يلا

المكان دا اكتر حاجه بتفكرني ب يوسف ، بس في مقوله بتقول ان الاماكن اللي لينا فيها ذكريات ممكن تتنسي بأشخاص تانيه بيحبونا وبنحبهم
وممكن ننسي الأشخاص بس مننساش الذكريات ، بس الذكريات بتتنسي بذكريات تعوضنا عن اللي فات

وصلنا وقعدنا عند البحر ، وبعدين قال:

• انا هروح اجيب حاجه من هنا بسرعه ، خليكِ قاعده عقبال ما اجي
• هتتأخر طيب؟
• لا هاجي علطول
• ماشي

"الورد اتنقي بالواحده عشان خدها"

• ايه دا الله
انا بحب الورد اوي يا أنس
• وانا بحبك
• وخصوصاً الورد الأبيض دا ، بحبه اوي
• وانا بحبك
• وعارف ، بحب كمان الورد الاحمر اوي
• وانا بحبك اوي

ابتسمت والكسوف بان علي وشي وانا بقول:

• أنس
• يا عيون أنس
• ايه اللي انت بتعمله دا!
• بحبك
• تقوم تعمل كدا!
• واعمل اكتر من كدا كمان
ومش هرتاح غير لما تقوليها
• اقول ايه؟
• فاتن ، احنا عدينا بحاجات كتير اوي سوا ، انا بحبك من قبل ما اتقدم لك ، بس كنت مستني ابقي جاهز عشان اعرف اجي لك ، كنت جنبك لحد ما نسيتي يوسف ومتعرفيش كنت بتألم قد ايه كل ما تتكلمي عنه او اشوفك بتتألمى بسببه ، بس كنت مستعد اعمل اي حاجه عشانك ، كنت حابب اكون جنبك ، كنت حابب اكون أنا الشخص اللي يمسك ايدك ويخرجك من الضلمه دي ، كنت واثق من انك هتحبيني ، كنت بحاول اعمل اي حاجه عشان توافقي عليا ، عشان انتِ تستاهلي احسن حاجه يا فاتن ، تستاهلى تاخدي احسن حد في الدنيا ، تستاهلي حد يحبك من قلبه بجد ، حد يبقي مش شايف غيرك وكل همه في الدنيا هو انه ازاي يخليكِ مبسوطه ، ومستعد يعمل اي حاجه عشان تكوني مبسوطه
انا بحبك ، وقابلك بكل حاجه ، انتِ اصلا مفيش حاجه فيكِ وحشه او متتقبلش
انتِ جميله وانا بحبك يا فاتن

قال جملته الاخيره وهو ماسك ايدي وباصص في عيوني بااهتمام

عيطت ، مش عارفة عيطت ليه بس كل اللى اعرفه انى مبسوطه اوى
اخدت نفس عميق ومسكت فى ايده اكتر وانا بقول:

• وانا كمان بحبك اوى يا أنس

اتنهدت بفرحه في نفس اللحظه اللي قالت فيها ام كلثوم:
" العيب فيكم يا في حبايبكم..أما الحب يا روحي عليه"