بدأت كتابة وانا في اعدادي، كنت قبلها مدمنة قراءة، وحبي للكتابة بدأ لما مدرس العربي قالنا ممكن تختاروا كلمات لها نفس النهايه زي زين، عين، فين وهكذا وتحطوا الكلماتي في اخر السطر ورا بعض وتكونوا جمله مناسبة زي مثلا أحببتك حتى سكنت الوتين.
فأنت بأعماق قلبي يا نور العين.
طبعا فرحت يومها اوي بالطريقه واعدت طول الوقت اجرب واعمل جمل مختلفة
واول حاجه عملتها جريت على أمي، وقريت اللي كتبته ليها بما انها كانت بتشجعني على القراية، بس في الكتابة كان ليها رأي آخر، لقيتها بتقولي لمين الكلام ده؟!
وهنا خدت الصدمه قولتلها مش لحد، ومن يومها بقيت اكتب كتير جدًا يومياتي، وخواطر وشعر زي ما المدرس قالنا اللي اكتشفت بعد كده أن كتابة الشعر مش كده خالص.
وبدأت اكتب في مواقع مخصصه كتير أوي وكنت بلاقي التشجيع من أصدقائي، باخد مراكز وبكسب في مسابقات القصه والخواطر، لحد ما كان ليا صديقة في الشغل وقصتها كانت شرارة انها تحرك جوايا مشاعر متضاربة هي صح ولا غلط، ظالمه ولا مظلومه، مقدرتش اسكت وبدأت اكتب اول رواية ليا اللي أعدت ١٠ سنين على ما عرفت انشرها كانت رحلة طويله اوي، جالي احباط واكتئاب لأن مش لقيا حد يساعدني، وعلشان مكنش حد حواليا اصلا يعرف اني بكتب من اعدادي، فلقيت نظرات الاستهزاء ومحدش مصدق اني بكتب أو حتى اعرف اكتب، سبت الكتابه سنين لحد ما جه في يوم كنت بتكلم مع حد ليه علاقه بالمسرح حسيت أن نفسي الروايه تتعمل على مسرح أو مسلسل حتى ولما سألت ده ممكن، قالي لازم تبقى ورقيه بعدها تتحول، ومن هنا رجعت أسعى تاني بس بعيد عن كل اللي اعرفهم، وبعت لأكثر من دار نشر وكانوا بيطلبوا مبالغ خياليه، ونظام باقات مش فاهمه منه حاجه، لحد ما في يوم فكراه كويس رغم مرور ٣ سنين عن نشر اول روايه، الساعة كانت ٢ الصبح وفيها مبروك لقد تم قبول عملك، حرفيًا طرت في الهوا، من كتر فرحتي كنت عايزه كل حاجه تتم بسرعه، وطبعًا كان سبب اني وقعت في بعض الأخطاء، اول حاجه اني وافقت على الغلاف وانا مش مقتنعه بيه من ناحيه علشان مستعجله وتاني حاجه اتكسفت اقول لا مش عاجبني وده قلل من الروايه كتير؛ لأن اللي بيقراها بيقولي الروايه حلوه اوي بس الغلاف ظلمها للأسف ودي نقطه اهتميت بيها جدا في الروايتين اللي بعدها وتاني غلطه اني وزعت منها كميات كبيره هدايا ونصهم مهتمش أنه يقراها اصلا والنص التاني قرأ ومفكرش يعملي ريفيو علشان الناس تعرفني، وخسرت ومخدتش طبعا جنيه، وكل ده عوضته في الروايات اللي بعد كده وفرق معايا جدااا ومبيعاتي بقت احسن.
2
-2
