فيه شخصيتين في الحياة بكره التعامل معاهم جدًا:

أول شخصية هي اللي طول الوقت بتبتزك عاطفيًا. 

بتكون ودودة وبتحبك، لكن بتخليك تفكر مليون مرة قبل ما تقول أي كلمة. كل كلمة بتقولها لازم تتحول لقصة ومشكلة، ويفسرها بشكل يخليك تشك في نفسك، وتبدأ تسأل: "هو أنا فعلًا غلطان؟ هو إزاي فهم الكلام كده؟" رغم إنك كنت بتتكلم بعفوية.

 وده بيخليك تتعامل معاه بحساب شديد، وتفكر مليون مرة قبل ما تتكلم.

 شخص مرهق وقماص، بتحس إنك كل مرة بتتكلم معاه، كأنك داخل امتحان لازم تخرج منه من غير خسائر، ومن غير ما يتفهم كلامك بشكل تاني.

الشخصية التانية بقى أسوأ بكتير. 

لأنه لما تقول حاجة أو تتصرف بطريقة مش على هواه، ومن غير أي قصد منك، مش هييجي يقولك أو يواجهك، لا. هيتجاهلك. فجأة تلاقي معاملته اتغيرت، بيرد عليك بالعافية، وممكن ميردش أصلًا. وساعتها أنت اللي مطلوب منك تقعد تفكر: "هو في إيه؟ أنا غلطت؟ ولا هو مضايق من حاجة تانية؟ ولا إيه اللي حصل؟" وتفضل تعيد شريط كل المحادثات والمواقف اللي حصلت بينكم علشان تحاول تفهم. وحتى لو قررت تسأله، هتلاقيه بيعمل عادي جدًا ويقولك "مفيش حاجة"، مع إن كل تصرفاته بتقول العكس. وساعتها يا إما تكتشف لوحدك، يا إما تفضل تلف في دايرة التفكير اللي ملهاش نهاية.