مستغربين ليه بنتك اللي عندها ١٠ سنين بتشتمك؟

ومهما عاقبتيها ما بتخافش،

وترجع تشتم تاني بكل جرأة؟!

مضايقة من ابنك اللي لسه مكمل ١٥ سنة،

وبيزعق ويبجح،

وممكن يمد إيده على أمه وأبوه؟

ومحدش عارف يسيطر عليه؟!

ما تستغربوش...

دي نتيجة الزرع اللي زرعتوه فيه من وهو لسه بيبي.

فاكرين لما كان بيضرب أمه برجله؟

والكل كان بيضحك 

ولا فاكرين لما شتم أبوه وهو لسه بيتعلم الكلام؟

والكل كان بيضحك أكتر،

وكل ما يكرر الشتيمة، تضحكوا وتقولوا: "شاطر؟!"

هو ده الحصاد!

ولما حد ينصحكم ويقولكم:

"عيب تضحكوا على الحركات دي، غلط!"

فتردوا: "ما هو لسه بيبي، ومش فاهم حاجة!"

لأ…

فاهمين وواعين كويس جدًا لكل حاجة!

أنتم اللي مش فاهمين إن ضحككم وانبساطكم من تصرفاتهم دي

بيعزز عندهم السلوك ده.

الطفل بيتعلم إن الشتيمة والضرب حاجة حلوة،

بتخلي الناس تضحك وتنبسط،

وبيفضل يكبر على المفهوم ده،

ولما يكبر شوية، وتيجوا تقولوا له:

"عيب، وغلط، وميصحش!"

مش هيفهمكم…

هيفتكر إنكم اللي اتغيرتوا،

مش هو اللي غلطان.

صدقوني…

طالما الطفل مدرك إن دي "ماما" وده "بابا"،

وأول ما تنادي عليه بيبصلك،

وبيميز اسمه من وسط أسامي الأطفال التانيين،

يبقى بيفهم، وبيتعلّم.

وهنا بالضبط لازم تبدأوا تِرَبُّوا…

ويعرف العيب، والغلط، والحرام كمان.