أمهات كتير جدًا بتهتم بولادها اهتمام فوق العادي،

تأكلهم أكل صحي، وتعمل جمعيات علشان تعلمهم تعليم محترم،

وتتداين علشان يفضلوا في مستوى اجتماعي معين،

وتشتري لهم أغلى الماركات والموبايلات.

وفي الآخر؟

تلاقي علامة تعجب كبيرة مرسومة على وشها:

"إزاي بعد كل ده العيال متربوش؟!"

"ولادي طلعوا جاحدين كده ليه؟!"

"إزاي يتعاملوا معايا، أنا أمهم، بالطريقة دي؟!"

اللي كنت بستخسر أشتري لنفسي طقم جديد علشان أوفر لهم لبس ماركات غالية،

ليه دلوقتي بيردوا عليّ بتعالي؟

وأبوهم اللي بيشتغل بدل الشغل شغلتين،

بيتشد عليه في الكلام عادي؟

وإحنا اللي كنا بنسهر ليالي ونحرم نفسنا من كل حاجة علشان هما!

ليه؟!

وتبدأ الأم والأب يسألوا:

"إحنا قصرنا في إيه؟!"

"معقول كل تعبنا ده، وفي الآخر ولادنا يطلعوا مش متربين؟"

آه، قصرتم...

والأسوأ إنكم ما ربيتوش أصلاً!

عملتوا كل حاجة إلا التربية.

للأسف، لو كانت التربية بالأكل والشرب،

كنتوا جبتوا قطة أو كلب…

كانوا هيطلعوا أوفى ليكم بكتير لما تطعموهم وتشربوهم.

اتعلموا إزاي تربوا،

وبعد كده ابقوا اشتكوا،

وقولوا: "ولادنا ليه مش متربين؟"