رنيت الجرس للشاويش وطلبت منه يدخلي الاب ضروري وفعلا دخل الاب
قولتله وانا لسه ببص على الورق ـ تعالي يا عم جمال
قالي بصوت متوترـ فيه حاجه جديده يا بيه لقيتوا بنتي
قفلت الاوراق بعد ما حطيت دايره على اسم ماجد وقولتله ـ عايزك تحكيلي شويه عن ابنك ماجد بس بصراحه
قالي باستغراب ـ ليه يا بيه في حاجه واحكيلك عنه ازاي
قولتله ـ يعني أخلاقه معاكم عامله ايه وعلاقته بسميرة وكل اخواته وعلاقته بيكم عامله ايه ؟
سكت شويه وبعدين قالي ـ ماجد طيب وحنين على كل اخواته ده اعد من الشغل علشان يدور معانا على أخته هو بس ..
قومت وقفت ادامه وقولتله ـ بس إيه اتكلم
قالي بتردد ـ هو اتخانق معانا الشهر اللي فات كان عايز يخطب بنت بس انا موافقتش لأن مش معانا فلوس بناكل بالعافيه لولا اخويا ربنا يكرمه بيساعدنا كنا هنموت من الجوع
بس يا بيه بيحب اخواته اوي
بصيتله وانا مقرر أن لازم ماجد ده يتحط تحت الميكروسكوب
قولتله وانا برن الجرس ـ تمام تمام تقدر تمشي
دخل الشاويش واستنيت لما عم جمال يمشي قولتله - شوف مخبر ضروري يراقب ماجد ٢٤ على ٢٤ ودخل الشيخ علوان
دخل الشيخ راجل بدقن بيضه ولابس طقيه وجلييه وماسك عصايه بيسند عليها
اول ما دخل رمى السلام واعد على الكرسي
ولعت سيجارة وقولتله ـ وعليكم السلام ورحمه الله وبركاته يا شيخنا
ياريت بقى تقولنا اسمك وسنك ومن امتى وانت بتحفظ قران؟!
أعد يكح شويه وبعدين قالي ـ اسمي علوان البنا وعندي ٥٥ سنه وبحفظ الاطفال من ١٥ سنه
طفيت السيجاره علشان كل شويه كان بيكح وقولتله ـ وسميرة بتديها من امتى ؟
قالي بعد ما سند أيده على المكتب - من حوالي سنتين كده
قولتله وانا بسند ضهري على الكرسي ـ كلمني عن سميرة وياترى شوفتها اليوم اللي اختفت فيه ؟
رجع مسك العصابه وقالي - سميرة كانت حبا تتعلم وتحفظ بس مكنش حد بيساعدها من أهل بيتها فكانت يوم تيجي حافظه وعشره لا بس كانت بتحاول واليوم اللي اختفت فيه مشفتهاش خالص بس على ٦ لقيت الباب بيخبط وكان ابوها بيسأل عليها بس عرفته انها مجتش اصلا
قولتله باستغراب ـ هي أول مره تغيب
قالي ـ لا كانت بتغيب قبل كده وكانت لما تيجي المره اللي بعدها تقولي أن أمها كانت تعبانه معرفتش تيجي
قولتله وانا بكتب كلامه ـ مفيش حد تشك فيه ممكن يكون خطفها
قالي وهو بيلعب بدقنه وبيفكر ـ لا معرفش بس دول ناس غلابه اللي هيخطفها هيعمل بيها ايه ؟
اتنهدت وقولتله ـ تمام تقدر تمشي
قام ومشي وبعد تفكير شويه رنيت الجرس على الشاويش وقولتله ـ بعت المخبر ورا ماجد زي ما قولتلك
هز رأسه وقالي ـ ايوه يا افندم
قولتله وانا بقوم ـ تمام عايز تقرير مفصل على مكتبي بالمراقبة وبلغ اتنين عساكر علشان هنطلع على بيت عم سميرة في زياره مفاجأه نشوف الجو هناك ونتكلم معاهم
وفعلا على ما نزلت على عربيه الشرطه لقيت اتنين عساكر مستنين ركبنا روحنا العنوان اللي قالوا عليه بتاع جدة سميرة وعمها، اول ما دخلنا الشارع لقينا اولاد بتلعب سألتهم عن البيت فين بالظبط وكان في نص الشارع
وانا نازل لقيت راجل طويل اسمر في أواخر التلاتين داخل البيت
نزلت بسرعه ووقفته وقولت ـ انت عم سميرة
قالي وهو بيبص على عربيه الشرطه ـ انتوا الحكومه صح لقيته سميرة ولا لسه؟
ربعت ايدي وقولتله ـ لسه، محتاج بس اتكلم معاك شويه انت ومراتك ووالدتك
دخل وشورلي بإيده علشان ادخل ـ دخلت كان الشقه دور ارضي صاله ضيقه يا دوب وخدا كنبه وكرسين بالعافيه واوضتين
بصلي وقالي هدخل اعرف أمي علشان تبقى فاهمه انت عايز منها ايه
دخل في اوضه منهم وغاب شويه وبعدين رجع قالي ـ اتفضل
دخلت كانت الاوضه مفهاش غير سرير وتربيزة جنبه عليها شويه ادويه وميه، جابلي كرسي خشب علشان اعد عليه
بصيتلها كانت تقريبا في الستين لابسه نضاره وفيه عكاز جنب السرير
وقبل ما اتكلم قالتلي ـ انت صحيح يا ابني اللي هترجع سميرة
قولتلها ـ أن شاء الله يا حجه بس قوليلي امتى اخر مرة شوفتي سميرة
قالتلي بصوت مليان عياط ـ اليوم اللي ضاعت فيه جتلي وقالتلي أنا جعانه يا تيتا قولتلها اصبري لما عمك أو مراته يجوا من الشغل بس كانت مستعجله علشان درس القرآن
بصيت على عمها وقولتله ـ صحيح انت اسمك ايه و بتشتغل ايه
قالي وهو بيعدل من وقفته ـ اسمي عبد الرحيم وبشتغل رئيس العمال في مصنع ملابس
قولتله باستفهام ـ ومراتك ؟
قالي ـ بتشتغل في سوبر ماركت
قمت وقفت قدامه وقولت ـ بس غريبه انت بتيجي قبلها
بصلي بتوتر وقالي ـ أنا باخد راحه الساعه ٣ باجي اكل لقمه واريح جسمي شويه وبرجع المصنع على ٥ لو فيه ورديه مش بتكون كل يوم وهي بتيجي على ٤ كده
قولتله باستفهام ـ يعني يوم ما سميرة اختفت أنت كنت هنا؟
قالي وهو بيبص على أمه ـ لا مشفتهاش اليوم ده اتأخرت فيه شويه، أنا جيت مكنتش موجوده
رجعت بصيت لأمه قولتلها ـ هو ابنك مكنش موجود يا حجه
حسيتها اتوترت وقالتلي ـ لا مكنش هنا
قولتلها ـ يعني هي اليوم ده مشيت من غير ما تاكل
قالتلي وهي بتتنهد ـ هي كانت مستعجله فصعبت عليا تمشي من غير اكل فقولتلها ادخلي اوضه عمك خدي خمسه جنيه من الدرج وهاتيلك ساندوتش
لقيتها سكتت فقولتلها ـ هااا كملي جابت الفلوس
قالتلي ـ ايوه جابت الفلوس ومشيت بس معدتش عليا أصلها كانت مستعجله
أعدت مستني شويه لحد ما مراته جت ودخلت أعدت على حرف السرير كانت لبسه عبايه وطرحه
سألتها في الاول ـ اسمك ايه وسنك
قالتلي ـ اسمي نعمه وعندي ٣٠ سنه
سندت ضهري على الكرسي قولتلها ـ شفتي سميرة اليوم اللي اختفت فيه
قالتلي وهي بتعدل طرحتها ـ لا انا مشفتهاش اليوم ده خالص
رحت باصص لعم سميرة قولتله ـ صحيح مش بتشك في حد يكون عمل كده
هزلي راسه بالرفض وقالي ـ لا مفيش حد احنا ناس في حالها
لقيت مراته بتهز راسها موافقه على كلامه
رجعت بصيتلها وقولت ـ مفيش مره زهقتي مثلا انها بتيجي تاكل عندكم اضايقتي منها زعقتيلها
كشرت كده وقالت ـ لا طبعا ادام ربنا مدينا والاقربون اولى بالمعروف
قولت وأنا بقف ـ تمام اي معلومه تفتكروها صغيره او كبيرة ياريت تبلغوني اي حاجه ممكن تفيدنا أننا نلاقيها بسرعه
طلعت بره وكان عمها بيوصلني قولتله ـ هي سميرة بس اللي كانت بتيجي تاكل عندكم واخواتها مكنش حد بيجي
قالي وهو بيحط أيده على دقنه ـ كانوا بيجوا بردو بس سميره كانت بتيجي اكتر علشان ولادي من سنها بتلعب معاهم
قولتله امال هم فين ـ قالي اشرف وسعاد بيلعبوا بره في الشارع وطلع معايا ونده عليهم
كانوا فعلا قريبن من عمر سميرة
قولتلهم وانا حاطط ايدي على كتفهم ـ قولولي فاكرين اليوم اللي سميرة اختفت فيه
رد عليا اشرف وقالي ـ ايوه هي جت بس قالت إنها هتدخل تسلم على ستي
قاطعته سعاد وقالت ـ ايوه وقالت انها متاخره ومش هتلعب معانا زي كل يوم هتروح القرآن علطول
قولتلهم - وانتوا مش بتروحوا معاها؟
قالوا في نفس الوقت ـ لا
بصيت كده على البيوت اشوف لو فيه كاميرات وقولتلهم ـ طب هي اتأخرت جوا
رد اشرف ـ أنا مشوفتهاش كنا بنلعب ومخدناش بالنا مشيت امتى
قولتله باستغراب ـ وهي في العادي لما بتكون مشيا مس بتكلمكم
ردت سعاد بانفعال ـ لا هي كانت متخانقه معايا يومها ومتخاصمين علشان كده ممكن تكون مشيت من غير ما تكلمنا
وطيت علشان اكون على اد طولها وقولت ـ ومتخانقين ليه بقى؟
قالتلي ـ كنت عايزاها تلعب معانا وهي مش عايزه خايفه من الشيخ لو اتأخرت يضربها
قولتلها وانا برجع اقف ـ هو كان بيضربها
قالتلي ـ ايوه ده عنده عكاز كبير بيضرب اللي مش بيحفظ أو يتاخر
قولتلها - ماشي يا حبيبتي
وبصيت لابوها وقولتله ـ زي ما قولت لو افتكرت اي معلومه لازم تبلغني بيها
هز رأسه بالموافقه
وطلبت من العساكر يسبقوا هم بالعربيه ويستنوا على اول الشارع وانا هجيلهم
وفعلا مشيت اشوف اذا كان فيه كاميرات ولا لا وكان فعلا فيه صيدليه مركبه كاميرا
دخلت وعرفت الصيدلي اني شرطه ومحتاج تفريغ الكاميرات ضروري وخصوصا اليوم اللي اختفت فيه سميره وخدت الكاميرات فعلا
ورجعت القسم طلبت من الشاويش ياخد الكاميرات للمختص يعملها تفريغ ويجبهولي على فلاشه
وعلى بليل جالي تقرير مراقبه ماجد والفلاشه كمان
2
-2
