نص مسرحي - الجذر 4

المشهد الرابع 

الديكور: فصل دراسي، ملابس الطلبة عشوائية تمامًا وغير مناسبة للمدرسة 

(علياء واقفة بجانب السبورة، تمسك الموبايل وتتصوّر "سيلفي")

(ليلى جالسة في ركن الفصل حزينة، رأسها بين يديها)

(آدم ومروان يجلسان بالخلف)

آدم (ينظر إلى مروان):

إيه يا بني ده؟ انت نيرم جدًا الصراحة...

إمتى هتبقى كوووول وتعرف إن الـAI بقى أساس كل حاجة؟

مروان (يرد محاولة يبرر):

مين قالك إني مش كووول؟!

أنا امبارح عملت كل الفيديوهات التريندي...

آدم (ساخرًا):

آه... وعملت كمان تريند الكُركم؟ على كده؟

مروان (يتذكر فجأة):

تصدق؟ نسيت!

لما أروّح هعمله...

بس قولي إنت بتجيب followers كتير إزاي؟ مش هتقول السر؟

آدم (يرفع قدمه على الديسك):

أنا قولتلك... هات 50 دولار وأنا أقولك اللي فيها!

(في هذه اللحظة، يدخل "المدرس"رجل في الاربعينات، يرتدي قميصًا وبنطلون رسمي، ونظارة، ويحمل حقيبة جلدية)

(يقف خلف ترابيزة صغيره في منتصف الفصل)

المدرس (يضع حقيبته على الطاولة، يحرك نظارته):

السلام عليكم... عاملين إيه النهارده؟

(آدم يُنزِل قدمه ببطء – لا أحد يرد – الكل مشغول بالموبايل أو بالنظر في مكان آخر)

المدرس (بهدوء):

فين باقي زمايلكم؟

علياء (دون أن ترفع عينها من الهاتف):

هم... don’t care يا مستر.

(ينظر المدرس نحو ليلى، يلاحظ حزنها)

المدرس (بلطف):

مالك يا ليلى؟ مش بتتكلمي زي عادتك؟

(علياء تقترب من المدرس بخفة)

علياء (بصوت فرحان تمثل الحزن):

حصل معاها كارثة يا مستر... علشان كده هي so sad.

المدرس (يقترب من ليلى):

قوليلي يا ليلى... إيه اللي حصل؟ يمكن أقدر أساعدك؟

سارة (بحزن):

Really يا مستر؟ تقدر تساعدني؟

المدرس (بثقة):

طبعًا، فيه إيه؟ قوليلي.

علياء (مقاطعة، بفرح):

تصدق يا مستر... her dad مش راضي يجيب لها الـ"لابوبو"!

المدرس (في حيرة):

إيه الـلابوبو ده؟!

آدم (يضحك):

إنتي بتكلمي مين يا بنتي؟ ده المستر No Contact أصلًا!

(يضحك الجميع ما عدا ليلى )

المدرس: كم مره قولت نبطل ندخل الانجليزي في كلامنا بوظته اللغه 

ليلى (بتوسل متجاهله كلامه):

Please يا مستر...

هديك رقم My dad، كلمه يمكن يقتنع...

أنا نفسي فيها أوي، علياء جابتها وطلعتلها السكرت كمان...

علياء (بتفاخر):

بس متتخيلش يا مستر... هي قد إيه cute!

المدرس (محاولًا أن يفهم):

أنا... مش فاهم حاجة خالص!

يعني إيه اللابوبو؟!

(علياء وليلى في آن واحد، بحماس):

اللابوبو يا مستر! فيه حد ميعرفش اللابوبو؟!

(تبدأ إضاءة الشاشة الخلفية تشتعل)

(تُعرض صور سريعة ومتلاحقة لدمى ملونة)

(يدخل شباب بملابس روبوتية، يرقصون بحركات متكررة كأنهم مربوطين بأحبال يغنون كلمات خالية من المعنى: "لابوبو... )

(تكبر اللابوبو في الخلفيه مع الاستعراض وعند انتهائه يصغر حجمها حتى تنخفض الاضائه كأنه كان حلم ويضئ الضوء، ويعود الجميع لمكانهم)

المدرس (يحرك نظارته):

أنا... أنا ما فهمتش أوي بصراحة...

بس هنخلص الحصة، وأنا هبحث عن "اللابوبو"...

و... هشوف إذا أقدر أساعدك يا ليلى ولا لأ.

ليلى (بفرحة):

Really؟ شكراً يا مستر!

المدرس (يحاول يسيطر عليهم):

يلا نرجع للدرس... هسأل سؤال، اللي يجاوب ياخد درجة الشفوي:

 "بالعِلمِ والمالِ يَبْني الناسُ مُلْكَهُمُ،

لم يُبْنَ مُلْكٌ على جهلٍ وإقلالِ"

مين القائل؟

مروان (بثقة):

عبد الباسط حمودة!

علياء (ساخرة):

عبد الباسط شعبي أصلاً... انت stupid يا مروان!

المدرس (بضيق):

قولي انتي يا علياء!

علياء:

ده أكيد أغنية لــBTS بس مترجمة بالعربي!

آدم (بدهشة):

يا بنت الإيه... انتي بتذاكري من ورانا؟!

(المدرس يقع على الكرسي فجأة من الصدمة)

(يدق جرس الحصة)

(الطلبة ينهضون فجأة يتحركون بسرعة أصوات ضغط أزرار الكيبورد، فلاشات، صوت إشعارات مع ضوء على المدرس ويختفي تدريجيا)

بلااااك