رديت عليها وانا مخضوضه ـ فيه ايه يا بنتي حد من العيال جراله حاجه اهدي بس وبطلي عياط علشان افهم

قالتلي وهي لسه بتعيط ـ أنا حامل يا ريهام حامل في الطفل الخامس 

 قولتلها ـ طب اهدي بس معلش دي إرادة ربنا هتعملي ايه يعني؟!

كنت بقولها كده وانا من جوايا مقهورة اوي وبحسدها يعني نوال اللي مش لقيا تاكل عندها ٤ عيال والخامس في السكه وانا اللي عندي فلوس ملهاش عدد مش عارفه اجيب ضفر عيل كنت هموت من الغيظ وفي لحظه اتمنيت اكون مكانها وبعدين اتصدمت اكتر لما قالتلي 

ـ أنا لازم انزل العيل ده احنا سعات بنام من غير عشا هجيب عيل كمان يتعذب ويتبهدل معانا لالالا لازم أنزله 

 اتصدمت وقولتلها ـ تنزليه ايه بس حرام عليكي دي روح بردو غير ما العيل بيجي برزقه يا نوال

ـ والأربعة اللي معايا ملهمش رزق ليه يا ريهام وانتي اهو عندك فلوس يعني اد كده ومش معاكي عيال بصي أنا عايزة منك خدمة 

قولتلها باستغراب ـ خدمة ايه؟! 

كنت متوقعه انها هتقولي عايزة فلوس زي ما كانت بتقولي دايما بس لقيتها بتقولي حاجه مكنتش أتوقعها 

ـ أنا عايزاكي توديني لدكتور شاطر انتي ياما لفيتي على دكاترة علشان الحمل واكيد تعرفي دكتور كويس ينزلي العيل ده 

صوت في التليفون ـ عيل ايه اللي تنزليه بطلي جنان بقى وارجعي عن اللي في دماغك ده  

ـ مفيش ادامي غير الحل ده ولو مجتيش معايا عن دكتور أنزله هنزله لوحدي وممكن سعتها اموت ويبقى ذنبي في رقبتك 

قفلت معاها بعد ما وافقت اني هقابلها تاني يوم واروح معاها وانا مخنوقة اوي ازاي حد في الدنيا مهما كانت ظروفه وأمكانياته يقدر يفرط في ضناه بالشكل ده واعدت طول الليل اعيط على حالي واني نفسي في عيل واحد واحد بس يا ربي من اللي عندها وهي مش عايزاهم 

جوزي كان مسافر اليوم ده اتصلت بيه علشان احكيله وافضفض معاه شويه كان باين جدا على صوتي اني مش كويسه ولما رد عليا قالي

ـ مالك يا ريهام صوتك مش عاجبني في حاجه حصلت أنا معرفهاش 

ـ تصدق يا نبيل أن نوال حامل 

قالي باستغراب ـ تاني!!

ـ قول خامس لا وايه مكلماني علشان اروح معاها لدكتور علشان تنزل الطفل ده

ـ وانتي هتعملي ايه هتروحي فعلا

ـ مش عارفه لسه مقررتش انت ايه رايك؟!

ـ لا طبعا دي روح هتشيلي ذنبها انتي كمان ملكيش دعوه 

ـ بس هسيبها لوحدها كده

ـ تاخد جوزها ولا اي حد من قرايبها 

قولت بصوت مليان استعطاف ـ نبيل ممكن اطلب منك طلب أنا جتلي فكرة كده يعني وهناخد ثواب 

ـ فكرة ايه؟!

ـ يعني بدل ما تنزل الطفل ده اعرض عليها أننا ناخده نربيه ايه رايك؟! 

ـ تفتكري هي هتوافق 

قولتله بصوت كده مليان حماس ـ وترفض ليه بس هي كده كده هتنزله يعني مش عايزاه فناخده احنا علشان خاطري وافق انت عارف اد ايه نفسي في طفل وهتجنن وابقى ام ويمكن ربنا عمل كده علشان تبقى فرصه أننا نراعي الطفل ده وننقذه من الموت هاااا قولت ايه 

نبيل كان متردد ومش مرحب بالفكرة خالص بس مع زني وعياطي وافق

كنت خايفه اوي بعد ما اتعذبت في إقناع نبيل تيجي نوال بعد كل ده وهي اللي ترفض كلمتني تاني يوم على أساس نتقابل ونروح للدكتور وتنزل البيبي وفعلا رحت قابلتها 

وطلبت منها نعد في أي مكان وبعد ما روحنا كافيه قولتلها بتردد

ـ نوال مش عايزة تتراجعي عن فكرة أنك تنزلي الطفل ده

ردت بعصبيه ـ انتي جيباني هنا علشان كده بصي يا ريهام لو مش عايزه تساعديني قولي بس بيكي من غيرك هنزل الطفل ده احنا مش لاقين ناكل

رديت ـ طب اهدي اهدي مش قصدي حاجه والله بس جوزك عارف يعني

ـ ايوه يا ستي عارف ونزول العيل كان اقتراحه اصلا خلصيني هتوديني لدكتور من اللي تعرفيهم ولا لا

بصيتلها ومسكت ايدها وقولت ـ طب ايه رايك في اللي يقولك فكره متنزليش الطفل ده وفي نفس الوقت تقدري تصرفي عليه عادي

بصيتلي باستغراب كده وقالت بتريقة ـ فكرة ايه دي هتلاقي المصباح السحري