اكتب يا ابني يوم الإثنين الموافق ١-١٢-٢٠٠٠ الساعة ١٠ مساءا جالنا بلاغ بإن ريهام محمد السيد قتلت الطفلة حور عبدالله ابراهيم وبالمعاينه اتأكدنا أن الطفلة ماتت مسمومة 

ترد بحزن وصريخ ـ مقتلتهاش والله ما قتلتها هقتلها ازاي بس هي صحيح مش بنتي بس ازاي اقتل طفلة انا اللي مربياها وعايشه معايا ٥ سنين حرام عليكم والله ما قتلتها

قولتلها وأنا متعصب جدا ـ كل الأدلة ضدك يا ريهام محدش بيدخل مطبخ بيتك غيرك وده باعترافك وانتي اللي بتحضري أكلها والأكل بتاع البيت كله اشمعنى السم كان في طبقها هي بس اعترفي لأن الإنكار مش هيفيدك بحاجه

 تصرخ ـ اعترف بحاجه معملتهاش يا ناس حرام عليكم مش عارفه حتى أحزن على نفسي وعلى التهمة اللي اتهموني بيها ظلم ولا على بنتي اللي ربتها حتة من روحي ماتت بين ايديا

ـ أنا أقولك ليه!! بعد ما خدتي البنت من أمها وكبرتيها زي ما قلتي انك كنتي علطول بتدي لامها فلوس علشان بس تسكت وتسيبهالك فحسيتي انها بدأت تطمع فيكي وتطلب فلوس وحجات كتير وكل يوم والتاني تهددك انها عايزة تاخد بنتها من تاني فحبيتي تحرقي قلبها عليها يعني من الاخر ولا تبقى معاكي ولا معاها مش دي خطتك يا ريهام صدقيني الاعتراف هيخفف عنك العقوبة 

 ردت عليا بعياط ـ أنا والله بريئة اثبت برائتي ازاي بس 

 قولتيلها ـ على العموم مفيش قاتل بيقول على نفسه أنه قتل كلهم بيقولوا كده بس بصماتك على الطبق حتى المعلقه اللي البنت واكله بيها عليها بصماتك والتهمه لبساكي لبساكي 

ـ كانت تنقطع ايدي وأنا بأكلها طول عمري انا اللي بأكلها اشمعنى هقتلها دلوقتي 

ـ بصي يا ريهام انتي موقفك صعب جدا والاحسن انك تطلبي محامي لأن أصرارك على الإنكار ده اول خطوة لحبل المشنقة

وهي في حاله ذهول ـ مشنقة حرااااام طب كلموا جوزي يا بيه

اتعدلت كده على الكرسي وقولت ـ صحيح هو فين؟ 

ـ هو مسافر دبي في شغل بقاله اسبوع 

قولتلها وأنا برن الحرس علشان العسكري يدخل ـ هكلمه بس على ما أكلمه فكري كويس أن علشان تخلصي من الاعدام مفيش ادامك غير الاعتراف بالحقيقة 

يا عسكري خدها على الحجز ..

صوت صويت وهي خارجه من غرفة التحقيق

ـ حسبي الله ونعم الوكيل فيكي قتلتي بنتي ربنا ينتقم منك 

بعياط وخنقة في صوتها قالت ـ أنا مقتلتهاش يا نوال أنا قلت انتي الوحيده اللي هتصدقيني انتي عارفه أنا كنت بحبها اد ايه وعمري ما كنت افكر اني أذيها بلاش تظلميني انتي كمان

بصوت مليان غضب ـ بس يا مجرمه أنا مش هسيب حق بنتي وهجيب احسن محامي علشان تتعدمي عملتلك ايه الطفلة الصغيرة علشان تقتليها وايه بالسم ده انا لو يسبوني عليكي كنت قتلتك بإيدي وجبت حق بنتي منك 

ـ انتي بتقولي ايه انتي اكيد اتجننتي أنا ريهام اللي مستحيل اقتل نملة اصلا فيوم ما اقتل تكون طفلة ومين بنتي اللي ربتها

بعصبية وصت عالي قالتها ـ متقوليش بس بنتك هي بنتي أنا وكنت سيباها عندك أمانه قتلتيها وحرقتي قلبي عليها منك لله

ردت وهي غضبانه جدا ـ حرقت قلبك انتي هتمثلي لو أنا فعلا اللي قتلتها دلوقتي فانتي اصلا كنتي عايزة تموتيها وهي لسه في بطنك 

ـ يا عسكري سجل اعترفت أهو انها اللي قتلتها 

العسكري وهو بيحذرهم ـ بس يا ست انتي وامشي يلا من هنا بدل ما اخدك على الحجز معاها متجبيش لينا الكلام 

ـ يا عالم يا هو اعترفت بلسانها أنا والله مش هسيبك وهتشوفي هعمل فيكي ايه مش علشان احنا غلابة حق بنتي هيروح يا مجرمة

أنا لازم اروح لوكيل النيابة واقوله انها اعترفت

لقيت ست كده في أواخر الأربعين لابسه جلابيه وايشارب صغير على رأسها دخلا تجري عليا ـ يا سعادة البيه يا سعادة البيه

قولت وأنا متعصب من دخولها المفاجئ ده ـ فيه ايه وانتي مين وازاي تدخلي كده؟!

ـ أنا نوال يا بيه أم الطفله اللي المجرمة دي قتلتها