أتنهدت وروحت بصيت على ملك لقيتها نايمة ومسكا اللابوبو جامد.
رحت للدكتور وقلتله: «هي هتفضل في الحالة دي لحد امتى يا دكتور؟»
قالي وهو بيقلّع النظارة: «بص يا أستاذ يوسف، في الحالة دي مراتك محتاجة دكتور نفسي وبسرعة، علشان ممكن تأذي نفسها. لازم متخصص يتدخل.»
قلتله بضيق: «طب حضرتك ترشحلي حد؟»
قالي وهو بيطلّع كارت من جيبه: «ده كارت دكتور نفسي شاطر. كلمه وحدد معاه معاد وإن شاء الله خير.»
وانا بكلمه سمعنا صوت الممرضة بتصرخ — جِرينا لاقينا ملك بتصرخ وبتقول: «فين اللابوبو؟! أنا هموت نفسي! هاتولي ابني!» وكان وشها أصفر بطريقة بشعة.
الدكتور مسكها جامد لأنها كانت بتحاول تفك الرباط، والممرضة ادتها حقنة مهدئة.
بعد ما نامت والدكتور والممرضين مشيوا، قعدت جنبها أعيط وحاسس إني قليل الحيلة ومش عارف أعمل أي حاجة.
مسحت دموعي وبدأت أدور على اللابوبو — أنا شايفها بعيني كانت في إيدها. دورت تحت السرير وعلى الترابيزة، ما لقيتهاش. بعد ما دوّخت عليها لقيتها على الكرسي في آخر الأوضة. استغربت أوي إيه اللي وداها بعيد كده؟
ندهت على الممرضة وقلت لها: «إنتِ خدتِ منها اللعبة دي وحطيتيها على الكرسي؟»
قالتلي باستغراب: «لا، أنا جيت على صراخها وهي بتسأل عليها.»
خدت اللابوبو وحطيتها جنبها علشان لما تفوق تهدى.
اتصلت بالدكتور النفسي وقلت له: حضرتك دكتور أحمد؟
رد وقال: أيوه يا أفندم، مين معايا؟
قلت له وأنا بتنهد: أنا من طرف الدكتور محمود السيد، هو قالي أكلم حضرتك وآخد ميعاد تيجي المستشفى عنده، علشان مراتي تعبانة وممكن تموت نفسها في أي لحظة.
قعدت أشرح له الحالة بتاعتها علشان يبقى فاهم لما ييجي ويتكلم معاها.
الدكتور جه فعلاً تاني يوم، وقعد مع ملك، بس كانت كل مرة تصرخ ومش قابلة حتى تديه فرصة يتكلم معاها في أي حاجة.
أنا حسيت إني خلاص قربت أيأس،
بس الدكتور قالي: أنا متعود على الحالات من النوع ده، متقلقش، الموضوع بس هياخد وقت طويل شوية علشان اللي حصل صعب عليها.
كنت لما بدخل لملك بحس إن ملامحها بقت غريبة، مش دي ملك اللي أعرفها.
أوقات وشها يبقى أصفر جدًا، وساعات يتحول أزرق.
ولما سألت الدكتور، قالي: قلة الأكل وإنها عايشة على المحاليل ممكن يأثروا عليها، هي بس تعدي فترة العلاج النفسي وكل حاجة هترجع زي الأول إن شاء الله.
وفي يوم لقيت ماما بتتصل بيا وبتعيط: «أختك تعبانة أوي يا يوسف، إحنا في مستشفى الجامعة تعال بسرعة، عايزة تشوفك».
ركبت وروحت بسرعة. لقيت ماما واقفة على باب أوضة بتعيط. جريت عليها وقلتلها: «فيه إيه يا ماما؟ أختي مالها؟»
قالت وهي بتعيط: «بقالها أكتر من أسبوعين تعبانة، وبتطلع لها حبوب في جسمها وبتختفي مرة واحدة، ده غير الترجيع والمغص ومفيش علاج جايب نتيجة، والنهاردة وقعت مني ومن ساعة ما جات وهي ما بطلتش تسأل عنك».
دخلت الأوضة بسرعة لقيت أختي خست أوي وباصه في السقف بخوف. رحت عندها ومسكت إيديها وقلتلها: «ألف سلامة عليكي يا حبيبتي، ربنا يشفيكي إن شاء الله».
شالت جهاز الأكسجين وقالتلي: «أنا بموت يا يوسف، انا ارتكبت ذنب كبير بس والله مكنتش أعرف إن ذنبي ده هيوصل لكده». أعدت تكح جامد.
جبتلها مية وقلت: «بلاش تتعبي نفسك بكتر الكلام، ارتاحي ونبقى نتكلم لما تتحسني إن شاء الله».
لما هدّت قالتلي: «لا لازم أتكلم، لازم تسامحني ومراتك كمان تسامحني. خليني أشوفها يا يوسف، أنا مش عايزة أموت وأنا شايلة الذنب ده».
قلت باستغراب: «ذنب إيه اللي بتتكلمي عنه؟»
قالت بصوت بيقطع: «سبني أكمل كلامي، عايزة أريح ضميري قبل ما أموت». سكتت شوية، وبعدين قالت: «خالتي كلمتني في يوم وقالتلي عايزاكي تزوري أخوكي وترجعي الود تاني». استغربت لأنها هي اللي كانت بتحرض ماما عليك. لما سألتها إيه سبب التغير، قالتلي: «لازم تتصالحوا. وإنتي روحي الأول من ورا مامتك، وبعدها أنا هقنعها».
بصراحة فرحت — كان نفسي أووي — بس كنت خايفة من ماما. وجيتلك فعلاً. وفي يوم خالتي جت عندنا ولقيتها جايبة لفة كده مش عارفة فيها إيه، وقالتلي: «اللفة دي حطيها في مكان مخفي في شقة يوسف».
سألتها وأنا ماسكها: «عبارة عن إيه دي؟»
قالتلي: «دي فيها أدعية وقرآن، شيخ قاللي هتبقى سبب في صلح أخوكي ومامتك، بس ما حدش يعرف عنها».
قالت بصوت ضعيف: فرحت فعلاً وجيت ومن غير ما تشوفوني حطيتها ورا برواز صور عندكم. وبعد فترة لقيت ماما اقتنعت فعلاً إنها تيجي عيد ميلاد ابنك — فرحت أوي وصدق خالتي. وجينا اليوم ده وكنا مبسوطين وجبنا لكريم هدايا كتير.
لما عرفنا إن كريم تعبان قلت أنا وماما هنعدي على خالتي ونروح سوا نزوركم.
واحنا هناك خالتي دخلت الأوضة وغابت. رحت أشوفها وسمعتها بتكلم بنتها وفرحانة وقالتلها: «اللي عايزينه حصل، وأهو ابنه تعبان وإن شاء الله يموت وبيته يتخرب ويرجع يبوس رجلك علشان توافقي عليه، وإحنا نتشرط زي ما إحنا عايزين».
سمر بنتها ردت: «بس تفتكري مش هيعرفوا إن اللابوبو هي اللي فيها سحر المرض والخراب؟» خالتي ضحكت وقالت: «لا عمرهم ما هيعرفوا، وأهو تأثيره بدأ يظهر».
دخلت عليهم وزعقت: «إزاي تعملوا كده؟ حرام عليكم!»
خالتي كتمت بقي وبعدين قالتلي: «لو اتكلمتي بنص كلمة هقتلك، فاهمة؟ وهقول إنك إنتي اللي عملتي السحر». وشوفي مين يصدقك؟
سكتت شويه ورجعت قالت وهي بتعيط: «أنا سكت وندمانة يومها. كنا هنجيلك بس مقدرتش أبص في وشك، واغمي عليا في الشارع، ومن ساعة ما عرفت وأنا مخنوقة، كأن ربنا بيعاقبني على سكوتي ده. مش قادرة أِسكت أكتر من كده وأقابل ربنا بالذنب ده. سامحني، وقول لملك تسامحني».
قمت ووقفت وأنا بعيط وقلت لها: «اتكلمتي متأخر أوي، أسامحك إزاي؟ ابني مات بسبب المرض اللي جاله، وملك بتموت كل يوم ألف مرة».
جريت بسرعة بره وهي بتحاول تنادي عليا. مكنتش عارف أعمل إيه ولا أروح فين. رحت أقرب مسجد وبعد ما صليت العصر رحت للشيخ وقلتله على كل اللي حصل.
الشيخ جه معايا للمستشفى ودخلنا أوضة ملك اللي كانت نايمة وجنبها اللابوبو. أديتها للشيخ، قعد وحطها على الأرض وبدأ يقرأ قرآن.
وبعد ما خلص لقيت ملك فاقت، فكيت الرباط وحضنتها — كان جسمها زي التلج.
الشيخ سأل وقال: «عايز ولاعة؟»
بعد ما اديته، لقيت ملك بتبص على اللابوبو وصرخت: «هو هيعمل إيه ؟ دي لعبة كريم!» حاولت تشدها علشان تاخدها.
مسكتها جامد وقلت لها: «دي سبب موت كريم يا حبيبتي، لازم تتحرق زي ما قلوبنا اتحرقت على ابننا».
قالت وهي بتعيط جامد: «لا، دي أكتر لعبة هو بيحبها، سيبوها، هيعيط ومش هيعرف ينام».
الشيخ ولع في اللابوبو وملك كانت بتحاول تمسكها. بعد ما النار اطفت واللعبة بقت رماد، ملك اغمى عليها.
بعد ساعة فاقت ووشها رجع للونه الطبيعي لكنها كانت منهارة.
بقيت بوديها للدكتور النفسي بانتظام.
بعد تلات شهور عرفنا إن أختي ماتت. مكنتش قادر أسامحها، بس في نفس الوقت مقدرتش أقول لملك. بس ماما عرفت بكل حاجة.
ولما ماما واجهت خالتي أنكرت وقالتلها: «إنتِ تصدقي إني أعمل كده؟ ده ابنك بيفترِي عليا علشان يوقع بينّا».
ماما مصدقتهاش وقطعت معاها خالص. وكانت كل ما تشوفني تقولي: «سامح أختك يا حبيبي علشان خاطري».
مكنتش برد لأن وجع خسارة ابني كان كبير أوي. مؤمن إن ده قَدَر ونصيبي وإن مفيش ساحر أو سحر يقدر يضر حد غير بأمر ربنا، بس الغدر وسكوتها عن الحقيقة كان أمر صعب — مقدرتش أسامحها عليها.
ومؤمن كمان إن كما تدين تُدان، وده اللي حصل.
بعد خمس سنين عرفت إن بنت خالتي اتجوزت وابنها لما تم سنة تعب فجأة وجاله مغص، ومكنوش عارفين السبب. فضل شهرين في المستشفى لحد ما مات.
خالتي وقتها اتصلت بيا وهي بتعيط وقالت: «سامحني يا ابني، الشيطان وسوس لي من يوم ما فكرت وعملت لكم السحر، وأنا عايشه في ضنك. أنا وبنتي وابنها مات في نفس عمر ابنك. ربنا بيخلص حقك، سامحني».
قلت لها بضيق: «عمري ما هسامحك ولا دنيا ولا آخره، ومتتصليش بيا تاني أبداً».
وقفلت السكة وأنا حاسس براحة إن ربنا مش بيرضى بالظلم أبداً.
ولأول مرة من سنين دخلت، خدت ملك في حضني ونمت مرتاح من غير كوابيس.
2
-2
