قالتلي بسرعة:
ـ بص، فيه لعبة كريم بيحبها أوي، من يوم ما جتله هدية في عيد ميلاده وهو متعلق بيها وبيحب ينام وهي جنبه. عايزاك تجيبها معاك تفرحه وتسليه.
قولتلها وأنا مستغرب:
ـ طب إيه اللعبة دي؟
قالتلي:
ـ "لابوبو"، هتلاقيها في أوضته على السرير بتاعه.
قفلت معاها ودخلت أدور عليها في الأوضة وعلى السرير، ملقتهاش. استغربت جدًا… راحت فين؟
لفيت على الشقة كلها، اختفت! وفي الآخر لقيتها على السرير في أوضتنا. خدتها وحطيتها في الشنطة ورحت على المستشفى.
ولما رحت، كانت ملك بطّلت عياط، وكريم قاعد على السرير.
قلتله وأنا ماسك "اللابوبو":
ـ دوّختنا على لعبتك يا سي كريم، بس كله فداك يا حبيبي علشان تبقى مبسوط.
ملك بصّتلي باستغراب وقالت:
ـ دوّخت ليه؟ أنا حطاها على سريره على طول علشان بيحب ينام وهي جنبه.
قولتلها وأنا بلاعب كريم باللعبة:
ـ أنا لقيتها على سريرنا إحنا.
قالتلي وهي بتبوس كريم:
ـ غريبة… أنا متأكدة إني كنت حطاها على سريره.
بصيتلها لقيت ملامح وشها اتغيّرت وكشّرت وقالتلي بعصبية:
ـ إنت كده طول عمرك مش فالح في حاجة!
اتصدمت وبصتلها وقلتلها وانا مستغرب:
ـ إنتي بتقولي إيه؟ وصوتك مالُه عالي كده ليه؟
قامت وقفت فجأة، وصرخت في وشي:
ـ مالُه صوتي؟ ولا الحقيقة بتزعلك؟ أيوه يا سيدي، إنت فاشل، وحياتي معاك كانت غلط من الأول. من يوم ما اتجوزتك وأنا عايشة تعيسة!
حسيت الدنيا بتسود في وشي، حاولت أمسك أعصابي على قد ما أقدر وقلتلها:
ـ إنتي مش حاسّة إنتي بتقولي إيه؟ اعقلي يا ملك، احنا في المستشفى مش ناقصين فضايح، وابننا تعبان!
هجمت عليا وزقّتني جامد لدرجة إني وقعت على الأرض، وهي بتصرخ:
ـ لازم الناس كلها تعرف إني مش عايزاك، وإن عيشتي معاك كانت غصب عني!
فضلت تصرخ بصوت عالي بدرجة الممرضين والدكتور جم افتكروا أن فيه حاجه حصلت لكريم، وأنا وقفت في ذهول مش قادر أستوعب اللي بيحصل. فجأة لقيتها بتقع مره واحده على الأرض مغمى عليها .
رحتلها بسرعة وشلتها وحطيتها على السرير اللي كان جنب كريم
الدكتور قال الممرضه وهو رايح على السرير: بسرعة هاتي جهاز الضغط
وبعد ما الممرضه جابته وقاس الضغط قال: ده ضغطها وطي مرة واحدة، غالبًا من قلّة الأكل والنوم والتوتر.
راح ركب لها محاليل وقاللي:
ـ إن شاء الله تتحسن لما جسمها يرتاح شوية، وضغطها يتظبط
وأنا لسه بكلمه، سمعت الممرضة بتقول بخوف وهي بتبص على كريم:
ـ إلحق يا دكتور… الولد رجّعتله التشنجات!
جريت أبص على السرير، لقيت جسمه كله بيتهز جامد جدا ووشه بقى أزرق، وعينيه مفتوحة نص فتحة وبتقلب للون الأبيض.
2
-2
