جريمة الحلاق الجزء الثالث 

على العموم اللاب توب هنا مع الحجات اللي جبناها من الشقة وهنشوف 

فتحنا اللاب وكان فعلا فيه عمليات ابتزاز لبنات أغلبهم مراهقات وفي العشرينات وواهد منهم مبالغ خرافية 

بصيت لأشرف وكنت مخنوق اوي الصراحة من اللي شوفته 

وبعد ما قفلنا اللاب بصلي اشرف وقالي 

ـ احنا كده رجعنا لنقطة الصفر بعد ما كنا خلاص حسينا أننا قفلنا القضية 

رديت وقولت ـ لسه فيه ادامنا عم فتحي أنا شاكك فيه من البداية واتفقت معاه أننا هنرجع نحقق مع عم فتحي ونعرف ايه سبب زيارته لاخو المجني عليه وكمان ايه الظرف اللي ادهوله لما راحله الدكان 

تاني يوم استدعينا فعلا عم فتحي 

ـ خير يا بيه جبتوني تاني ليه 

ـ التحقيق هيفضل مفتوح لحد ما القضية تتقفل ولازم تتعود أننا نستدعيك للتحقيق في أي وقت 

ـ ايه اللي حصل يا بيه فيه جديد طيب عرفته القاتل

ـ هنعرفه متقلقش بس قولي ايه علاقتك بأخو المجنى عليه 

ـ معرفوش اوي يا بيه شوفته كام مره بس كان بيجي يزوره كل فين وفين هو وعياله ومراته 

ـ مرحتش زورته بعد ما مات 

ارتبك شويه وبعدين قالي ـ بصراحة يا بيه رحت علشان تعزيه واطيب بخاطره 

ـ عرفت عنوانه منين ادام متعرفوش اوي

ـ أنا يا بيه كنت اعرف من عم محمد أن اخوه ساكن في الترعة في شارع كده جنب طابونة عيش فرحت هناك وسألت وفيه ناس دلتني على البيت 

ـ بقولك يا عم فتحي لازم تفهم أن كل حاجه اتعرفت وأننا مراقبين كل حاجه كويس جدا وعرفنا انك زورته وهو الساعة ٥ في نفس اليوم جالك ادالك كيس اسود ملفوف فياريت بقى تبطل إنكار وتقولي جالك ليه واتفقتم على ايه وياترى انت عملت الجريمة لوحدك ولا باتفاق مع اخوه

 رد بتوتر ـ جريمة ايه يا بيه أنا فعلا روحتله وكانت أول مره اروحله والله وبعد ما عزيته 

عم فتحي سكت كده ومكملش رحت قايله 

ـ ما تكمل عملت ايه 

ـ اصل يا بيه الصراحة عم محمد كان واخد مني ألف جنيه سلف يعني وقالي أنه هيردهم ولما مات أنا بصراحه كنت محتاج الفلوس أنا عندي ٤ عيال يا بيه فرحت عزيت اخوه وطالبته بالمبلغ

ـ هااا وبعدين كمل

ـ هو بصراحة رفض في الاول يعني وطلعني كذاب ومرداش يديني فلوسي 

ـ امال ازاي اقتنع ورجع جالك الدكان وادهملك 

ـ اصل يا بيه بصراحه هو عمر ما كانت علاقته حلوه بأخوه وكان دايما يتخانق معاه وكان بيقاطعه بالشهور ووصلت مره أنه ضربه وشتمه في وسط الشارع وقاطعه سنتين وكل مره يتصالحوا ميكنلوش كام شهر ويرجعوا يتخانقوا تاني 

ـ وايه علاقة الكلام ده بالفلوس اللي وافق وادهالك

ـ بصراحة يا بيه أنا قولتله انه لو مدنيش حقي هاجي أبلغكم بالكلام ده واعمله شوشرة في الاول مستجبش وقالي اعمل اللي تعمله وبعدين لقيته جايلي الدكان واداني ٥٠٠ جنيه وقالي أنه صاحب عيال وعنده بنت ومش ناقص شوشرة يعني وأن ده آخره ومش معاه فلوس تاني وانا خدتهم أهو احسن من مفيش 

ـ انت كده يا عم فتحي حجبت عننا معلومات ولو كان هو القاتل يبقى انت هتتعاقب بالتستر على مجرم

ـ يا بيه أنا غلبان وكل الحكايه اني كنت عايز حقي واديني قولتلك اهو كل اللي اعرفه ومخبتش حاجه خالص 

ـ مقولتليش ايه سبب خلافاتهم الكتير دي 

ـ هو دايما كانوعايز ياخد منه فلوس لأن البيت ده بتاع ابوهم الله يرحمه فشايف أن من حقه نص البيت وكل شويه يجي يتخانق معاه علشان البيع وعم محمد مكنش عايز بيبع ويفرط في بيت ابوه ده كل اللي اعرفه يا بيه 

ـ طب عم محمد كان عنده فلوس أودهب شايلهم 

ـ معرفش والله يا بيه بس بقولك سالف مني ألف جنيه وكان بيستلف مني باستمرار لو كان معاه مكنش استلف يعني حتى الشقة اللي فوقه إيجار قديم يعني اللي بيطلع منها قليل وكان سعات علشان يسكت اخوه يديله ايجارها كله 

ـ طيب يا عم فتحي أنا هسيبك تمشي دلوقتي بشرط لو افتكرت اي معلومة تانيه بخصوص المجني عليهم تيجي تعرفنا ومش عايز مخلوق يعرف انك قولتلنا حاجه وعايز منك تطلب بقية المبلغ وترجع تهدده انك هتبلغنا بكل حاجه عايز اشوف آخره معاك ايه