اتصال جالي من رقم غريب الساعة ٩ بليل في المركز صوت رجل متوتر جداـ الشرطه 

ـ أيوة نقدر نساعدك في ايه 

ـ يا بيه فيه راجل حلاق ومراته مقتولين في بيتهم ومش عارف مين القاتل تعالوا بسرعة 

ـ طب قولي العنوان بسرعة 

ـ ش يوسف عواد متفرع من الحكمه رقم ١١ تعالوا بسرعة يمكن يكون فيهم الروح لسه

ـ طب اسمك ايه؟ 

هنا الخط اتقفل ومقلناش اسمه 

جمعت الفريق بتاعي ورحنا مكان الواقعه بسرعة لقينا الناس ملمومه فضينا الدنيا ودخلنا نعاين الواقعة

لقينا ست في الأربعينات واقعة على السلم وعلامات الخنق باينه اوي على رقبتها ودخلنا الشقه اللي قصاد السلم والباب كان مفتوح كان زوجها نفس السن أو اكبر شوية تقريبا واقع هو كمان في الصالة وميت وباستدعاء الطب الشرعي بان أنهم ماتوا من ٦ ساعات تقريبا الراجل بضربة على دماغه والست مخنوقة 

ودينا الجثث المشرحة علشان نعرف تفاصيل اكتر ورفعنا البصمات وكمان سألنا الجيران عنهم 

اتضح انهم متجوزين من اكتر من ٢٠ سنه ومعندهمش اولاد وعندهم محل حلاقة صغير جنب البيت 

فكرت أن ممكن تكون الجريمة بهدف السرقة بس واضح أن الباب مفتوح عادي مفهوش اي علامات عنف دليل أن القاتل كان يعرف كويس المجني عليهم فدخل عادي 

غير أنهم معندهمش اي حاجه تخليهم مطمع لأي حد علشان يسرقهم ولما تمت معاينة بقية الشقة ملقناش اي حاجه مكسورة أو منقولة من مكانها فياترى ايه سبب القتل لو مكنش السبب هو السرقة وفيه احتمال أن اللي دخل عارف كويس المكان فكانت السرقة بالنسبة ليه سهلة

كان عندنا أكتر من مشتبه سألنا الاول اذا كان ليهم قرايب أو معارف عرفنا أن الزوج ملوش غير اخ واحد بس متجوز وعنده بنت عندها ١٠ سنين وولد عنده ١٧ سنه وعايش في منطقة قريبه من بيت المجني عليه يعني يا دوب نص ساعه مشي بينهم وبين بعض 

اخو المجنى عليه كان أول واحد استدعيناه 

كان منهار جدا واتمالك نفسه بصعوبةـ مش مصدق يا بيه اخويا يموت وازاي!! مقتول 

ـ قولي يا ريس جابر هو مكنش فيه أعداء خالص لاخوك

ـ أعداء ايه بس يا بيه مكنش فيه اطيب منه 

ـ امتى اخر مره زرته؟ 

سكت شويه كده وبعدين قال ـ يعني من شهر كده 

ـ بس مش مده كبيرة رغم انكم تقريبا ساكنين جنب بعض

ـ يا بيه أنا بشتغل غفير وأغلب شغلي بيكون طول الليل وبنام بالنهار والدنيا تلاهي يعني وهو كان بيقدر ده 

ـ طب كنت فين الساعه ٣ وقت ارتكاب الجريمه 

ـ قولتلك يا بيه أنا بنام طول النهار مش بصحى غير بعد العشاء علشان استلم النبتشيه بتاعتي 

ـ طب مراتك وولادك كانوا فين في الوقت ده 

ـ مراتي كانت في البيت بردو يا بيه هي مش بتشتغل وعيالي بيكونوا في الوقت ده في الدروس 

ـ مراتك وولادك مش بيزورا اخوك ومراته من غيرك 

ـ لا يا بيه رجلي على رجلهم مش بيروحوا من غيري ابدا 

ومع استجواب مراته وعياله قالوا نفس الكلام 

وبعد كده كان دور حد مهم جدا وهو عم فتحي اللي اتصل بينا ومرداش يقول اسمه وبدأت في استجوابه 

 ـ كنت فين يا عم فتحي وقت الجريمة؟

ـ يا بيه أنا كل يوم بفتح الدكان الساعة ١٠ وبيكون عم محمد بيفتح معايا محل الحلاقة بتاعه وبيصبح عليا وساعات بنفطر ونشرب الشاي سوا 

وسكت عن الكلام واعد يعيط 

ـ معلش يا عم فتحي البقاء لله بس معلش ممكن تكملي اللي حصل علشان كل كلمة بتقولها هتقربنا اكتر من الجاني ونعرف وقتها نجيب حقه 

رد وقال ـ يا بيه ده كان راجل طيب معرفش بس اللي عمل كده استفاد ايه 

ـ هنعرف كل حاجه بس انت كملي ايه اللي حصل اليوم ده وياريت بالتفصيل علشان أقل معلومة ممكن توصلنا للقاتل 

ـ يومها يا بيه ملقتوش فتح استغربت اوي مش عادته يعني وبعدين قولت ممكن يكون متخانق مع مراته وسابت البيت وسافرت البلد اصل يا بيه كانت خناقتهم كتير بسبب الخلفة وكده فكانت لما تسيب البيت وتمشي كان بيتأخر في فتح الدكان شويه لأنه معتمد عليها انها تصحيه وتعمله الفطار وكده 

ـ أهلها عايشين يا عم فتحي

ـ لا يا بيه هي ملهاش غير جدتها ست كبيرة في السن عايشة في بلد ارياف جنب طنطا كانت بتزورها من وقت للتاني ولما كانت بتتخانق كانت بتروح تعد عندها كام يوم وترجع

ـ تمام ها وبعدين كمل عملت ايه اليوم دم

ـ أنا بقفل الدكان الساعة ٣ اروح اتغدى واريح ساعة وارجع افتح الدكان تاني بس بصراحة قلقت لانه كل ده مكنش فتح 

ـ في الوقت ده رحت بقى تطمن عليه؟!

ـ بصراحة يا بيه لا انا قولت اروح ويمكن لما ارجع الاقيه فتح ولا حاجه 

ـ ولما رجعت لقيته فتح؟ 

ـ لا بردو أنا فتحت الدكان وكان فيه ناس كتير بتيجي تسألني عليه علشان يعني الحلاقه وكده فكنت برد أنه هيفتح كمان شويه على أمل يعني أنه يفتح

ـ وده مخلكش تشك أن فيه حاجه وتروح تشوفه مش يمكن كان عيان أو محتاج مساعده بحكم يعني زي ما بتقول انكم أصحاب 

ـ ما أنا مكنتش هعرف يعني اسيب الدكان ما هو اكل عيشي بردو يا بيه 

ـ وبعدين عرفت امتى باللي حصل 

ـ جيت على الساعة ٩ كده قفلت الدكان وقولت اعدي عليهم اشوف فيه ايه ومع عياطه واتصدمت يا بيه من المنظر لما شوفت مراته وقعا على السلم حتى مدخلتش الشقة جريت اتصلت بيكم علطول

ـ وانت بالعادة بتقفل المحل الساعة ٩ يعني 

ـ أنا سعات بقفل ٩، سعات ١٠ حسب الزباين يعني واليوم ده كانت الرجل خفيفة فقلت اقفل 

ـ انت ليه مقولتش من الاول انك انت اللي اتصلت بينا 

ـ خفت يا بيه الصراحه لحسن رجلي تيجي في القضية وانا غلبان مليش في الحوارات دي 

ـ تمام يا عم فتحي تقدر تمشي دلوقتي بس ياريت متسافرش لحد ما نقفل القضية 

ـ ليه يا بيه أنا متهم ولا حاجه

ـ لا دي إجراءات كل اللي ليهم علاقه بالمجني عليهم هتنطبق عليهم لحد ما القضية تخلص 

ـ طب يا بيه سلام عليكم

رحت للظابط اشرف مكتبه المسؤول معايا عن القضية وحكتله على كل حاجه والحوار اللي حصل بيني وبين عم فتحي وبين اخوه 

وقالي بعد ما خلصت

ـ انت شاكك في حد فيهم 

قولتله ـ اخوه مش اوي بس الشك الأكبر فعم فتحي 

ـ اشمعنى يعني 

ـ فيه كام نقطة كده مخليني اشك فيه واحطه تحت الميكروسكوب 

ـ زي ايه 

ـ هو بيقول إن المجني عليه متعود كل يوم يفتح معاه الساعه ١٠ غريبه أنه مفتحش ورغم كده مرحش يشوف السبب أو يطمن غير ٩ بليل 

ده غير أنه عارف تفاصيل كتير اوي عنهم امتى ييزعلوا ولما بيتخانقوا بيعملوا ايه يعني ممكن يكون عارف تفاصيل اكتر من كده ويكون عنده سبب مقنع أنه يرتكب الجريمة 

تفصيله يعرفها عنهم مثلا عندهم فلوس أو دهب مخبينها في حته كده يعني 

ـ بس ده مش سبب كافي أنه يكون متهم 

ـ فيه سببين مهمين جدا غير كده

ـ ايه هم 

ـ اول حاجه من اول مره قفل فيها الساعه ٣ كانت وقت ارتكاب الجريمة تقريبا هو بلغنا ٩ والجريمة حسب الطب الشرعى حصلت الساعة ٣ 

ـ وتاني سبب؟!

ـ لما فتحنا التحقيق معاه قال إنه لما راح يطمن عليهم لقى مراته مقتوله ومن خوفه مدخلش الشقه ومشفش الراجل وبلغ علطول واحنا معانا المكالمه متسجله البلاغ اللي قدمه قايل فيه أن اتنين مقتولين عرف ازاي وقتها مش يمكن جوزها عايش 

ـ طب مواجهتوش ليه بالكلام ده

ـ مستني بس شويه بعت وراه مراقبة علشان نشوف تحركاته الاول علشان يبقى معانا دليل اقوى من ده 

الباب خبط فدخل علينا العسكري يبلغنا أن إبراهيم جلال جار المقتولين جه بره 

اداله أمر بالدخول وانا اتفقت معاه اني هحضر معاه التحقيق 

دخل شاب في نص الثلاثينات اسمر طويل وبدقن قصيرة وموطي في الأرض وشكله متوتر اوي 

ـ اسمك ايه وسنك ايه وحالتك الاجتماعية وتقرب ايه للمقتولين

بصوت بيرتعش ـ اسمي إبراهيم جلال ٣٦ سنه ومش متجوز وليا اخ معاق اعد معايا واهلي ميتين والمقتولين جيراني يا بيه 

ـ كنت فين وقت الجريمة يا ابراهيم 

ـ أنا يا بيه مش بخرج من البيت غير للضرورة علشان اخويا العيان مش بعرف اسيبه لوحده لانه ممكن يئذي نفسه 

ـ انت مش بتشتغل يا ابراهيم 

ـ بشتغل يا بيه ببيع هدوم اون لاين والمندوب بيجيلي بنزله الأوردر في الثبت وياخده ويمشي وسعات يجيبلي طلبات للبيت بردو بنفس الطريقة 

ـ واخوك مش بينزل من البيت خالص 

ـ لا يا بيه مش بننزل 

ـ طب الساعة ٣ محستش بأي حركة غريبة في البيت بما أن البيت مفهوش غير دورين جيرانك اللي اتقتلوا تحتك وانت 

ـ لا يا بيه الساعة ٢ ونص كنت في البلكونه بنزل للمندوب اوردر وبعدها دخلت نمت شويه مصحتش غير الساعة ٦ مسمعتش اي حاجه 

ـ يعني اليوم ده منزلتش خالص واخوك منزلش 

ـ لا يا بيه أنا علشان بس اجي النهاردة سفرت اخويا البلد عند ستي ام ابويا علشان مش بعرف اسيبه لوحده 

ـ واخوك ميعرفش يجاوب على اي اسئلة لو حابين نستجوبه 

ـ لا يا بيه مش هيعرف ممكن لو حد غيري كلمه يصرخ جامد ومش مدرك لاي حاجه لان عنده إعاقة ذهنية جامدة جدا 

ـ فيه حد بتتعامل معاه جالك يوم الحادث أو بيجيلك عموما غير المندوب

ـ لا يا بيه هو المندوب بس 

ـ طب ياريت تسيبلنا رقم المندوب ومتسافرش ولا تروح في حته 

ـ طب يا بيه أنا كنت هسافر علشان اجيب اخويا محدش بيستحمله غيري 

ـ سافر هاته وتيجي علطول علشان لما نحتاجك في أي وقت تكون موجود 

ـ امرك يا بيه بس ..

ـ بس ايه فيه حاجه عايز تقولها 

ـ هم خدوا الموبايل بتاعي قبل ما ادخل يعني ممكن تقولهم يدهولي 

ـ تمام اطلع كده كده هيدهولك وانت طالع 

خرج ابراهيم وبعدها بصلي وقالي 

ـ هااا ايه رايك ممكن يكون مشتبه بيه ولا نبعد نظرنا عنه 

ـ قولتله بصراحه مش عارف هي لغة الجسد بتاعته بتقول أنه مخبي حاجه بس ممكن يكون بردو من الارتباك والخوف بس هيبان 

الباب يخبط ويدخل الشاويش

ـ ها يا عطية عملت اللي قولتلك عليه

ـ ايوه يا فندم حطيت على موبايله هكر واي مكالمة هيعملها هنسمعها وهنعرف تحركاته كلها 

ـ تمام اوي واوعى تكون نسيت تخلي المخبر يراقبه 

ـ لا يا فندم منستش اول ما مشي راح وراه علطول 

ـ كويس يلا روح انت 

خرج الشاويش وشغلنا التسجيلات علشان نشوف بعد ما خرج كلم حد ولا لا 

والمفاجأة أنه اتصل فعلا اول ما خرج من القسم وكانت المكالمة غامضة جدا 

ـ بقولك يا اسطى مش عايزك تجيلي خالص اليومين دول ولا تتصل بيا ولا تحاول تقابلني فاهم 

ـ ليه يعني انت عايز شغلنا يقف ولا ايه ولا شوفت حد غيري وبصوت متعصب اوي ده انا ارتكب جنايه 

ـ يا اسطى صحصح كده معايا انت واخد ربعايه ولا ايه على الصبح فيه شوشرة عندنا في المنطقة والبوليس عامل قلق 

ـ اوعى نكون اتكشفنا أو حد بلغ عننا 

ـ لا لا احنا بعيد عن العين هفهمك بالتفصيل لما اشوفك انت بس متجيش ولا تتصل بيا الفترة دي لما بس رجل البوليس تخف على المنطقة أنا هكلمك 

ـ متعوقش عليا انت عارف الحالة ناشفة ومش هستحمل المدة تطول

ـ هو اخرنا اسبوع وهتلاقيني بكلمك يلا سلام يا اسطى 

وقفل الخط على كده

بصيت لأشرف وقولتله باستغراب اوي

ـ مش قولتلك شكله مخبي حاجه بس تفتكر اللي مخبيه ده ليه علاقة بالجريمة ولا حاجه تانيه 

ـ بص هي حته أنه بيقوله اتكشفنا دي لما جاب سيرة البوليس يبقى اكيد فيه مصيبة مخبينها ولو اتعرفت هيروحوا في داهيه المصيبة بقى دي ليها علاقة بالجريمة أو لا ده هنعرفه ونتأكد منه لما يجيلنا تقرير المراقبة 

ـ التقرير بتاعه وبتاع عم فتحي هيجي النهاردة بليل ونشوف مين فيهم هيقع ويتكشف لينا