الوشم الجزء 5

قلتله وأنا ماسك القلم وبكتب:

– "عمرك ما شفت أي بنت من اللي قلت عليهم يا إبراهيم؟ تقولنا مواصفاتها مثلاً؟"

قال بتوتر:

– "لأ يا بيه... عمري كنت بسمعه بيتكلم بس في الموبايل. غير كده عمري ما شفت حاجة."

قلتله وأنا لسه بكتب:

– "تمام يا إبراهيم، تقدر تمشي. بس أي معلومة تفتكرها، مفيش داعي إنّي أقولك تيجي... تعال وبلغنا علشان نوصل للي عمل كده في أسرع وقت."

قال وهو ماشي:

– "حاضر... ويارب توصّلوا للي عمل كده. ربنا ينتقم منه."

وبعد ما مشى قعدت أفكر: يا ترى القهوجي ده ليه علاقة بالجريمة؟ مش عارف أحدد هل توتره ده خوف إنه ينكشف ولا عشان الموقف نفسه مخوفه. على العموم، كله هيبان لما نخلص التحقيقات.

رنيت على العسكري علشان يدخلي صاحب القهوة اللي كل كلامه كان شبه كلام القهوجي بالضبط. ياترى متفقين ولا فعلاً كلامهم حقيقي؟

وبعدها دخل صاحب الحضانة، وكان راجل كبير. شاورته يقعد وقلتله:

– "اسمك وسنك إيه؟"

قال وهو بيعدل النظارة:

– "اسمي جمال محمد، وعندي ٥٢ سنة."

قلتله وانا بشمر القميص:

– "قولي يا أستاذ جمال، تعرف سامي محمد؟"

قال وعينه مدمعة:

– "أيوه... أعرفه. هو كان بيشتغل في الحضانة عندي فترة، وبعدين، الصراحة، طردته."

قلتله باستغراب:

– "اشتغل قد إيه وطردته ليه؟"

قال بضيق:

– "الله يرحمه بقى... مكنش بتاع شغل. وحذرته أكتر من مرة. أنا يا باشا مش بحب أقطع رزق حد، بس هو كان طول الوقت بيتأخر، وأولياء الأمور اشتكوا إنهم بيدفعوا فلوس العربية اللي بتوصل أولادهم، وهو يوم يروح وعشرة لا... حتى في اليوم اللي بيروح فيه بيتأخر."

قلتله:

– "ما قلتش اشتغل أد إيه عندك؟"

قال وهو بيفكر:

– "٦ شهور تقريبًا. وحذرته كتير، وكل مرة يقولي 'آخر مرة وارجعه، ومفيش فايدة."

بصيت له وقلتله:

– "طب بالنسبة لأخلاقه، مفيش حاجة لاحظتها؟ علاقاته باللي حواليه كانت عاملة إزاي؟ محدش مثلاً اتخانق معاه؟"

قال:

– "لأ يا بيه... مشفتش أي حاجة تسيء لأخلاقه أبدًا. كلمة حق لازم أقولها: هو بس ماكنش ملتزم بالشغل، وده سبب طردي له. أي حاجة تانية تخصه معرفهاش."

قلتله:

– "خلاص تمام يا أستاذ جمال، تقدر تمشي. بس أي حاجة تفتكرها تعال وبلغنا."

قال وهو قايم:

– "حاضر يا باشا... ربنا يرحمه ويصبر أهله."