الكتابة أسلوب راقٍ يُهذب بها العقل ويزداد علمًا وإدراكًا
الكتابة بها تعلو مكانة الفرد بين مجتمع سادت فيه المفاسد ودركت فيه الفتن في دروك ظلام الجهل، الكتابة تهذب النفس من اللغو ومن الهوا.
الكاتبه " هند حمدي" في حوار صحفي لجريدة حِبر الحياة
حيث تُعرَض موهبتها إلي النور ويلمع بريقه في عنان السماء.
محتاج نبذه تعرفيه عن حضرتك.
هند حمدي كاتبة وروائية
بكالوريوس تربيه، امين مساعد الثقافة والفنون في حزب مصر اكتوبر
بدي كورسات كتابة للأطفال اون لاين وفي مركز الثقافة بطنطا
كيف بدأت رحلتك مع الكتابة؟ وما هو الدافع الرئيسي الذي جعلك تختار أن تكون كاتباً؟
الرحله بدأت بشغفي بالقراءة وبعد مده بدأت بكتابة يومياتي وخواطر والدافع أني مكنتش بعرف اعبر عن اللي جوايا إلا بالكتابة وده اللي خلاني استمر وبدأت بالخواطر
هل كان هناك كتاب أو كاتب معين أثر فيك ودفعك إلى الدخول في عالم الكتابة؟
دكتور احمد خالد توفيق كنت بقرأ كل رواياته وهو اللي خلاني اخي القرايه ثم بعدها الكتابه
ما هي الموضوعات التي تجد نفسك مشدوداً للكتابة عنها؟ وهل هناك قضايا معينة تحب أن تتناولها في أعمالك؟
بحب أكتب عن كل حاجه والكتابة الأقرب لقلبي هي النوع الواقعي اللي الكتابة فيه بتعبر عن أشخاص حقيقين عايشين معانا، واكتر شئ بحب أتناوله في الكتابة القضايا الإجتماعيه وبحب أكتب عن فلسطين
تعتمد على التخطيط المسبق عند كتابة رواياتك أو مقالاتك، أم تترك القلم يتدفق بحرية؟
اول ما الفكرة تجيلي بخطط ليها كويس الأول علشان منساش نقطه أتكلم فيها وبعد كده أكتب بقى براحتي بس لازم التخطيط المسبق
كيف تصف أسلوبك الكتابي؟ وهل تأثرت بأساليب كتابية معينة أو حاولت تطوير أسلوبك بشكل فريد؟
هو أنا بحب اترك القارئ هو اللي يصف أسلوب كتاباتي ولكن ما يقال لي أن أسلوبي هو السهل الممتنع
اتأثرت بناس كتير اوي ومنهم زي ما قولت دكتور احمد خالد توفيق والكاتبة ريم بسيوني وأحمد الجندي
وطورت أسلوبي عن طريق القراءة المستمرة والتعليم من خلال كورسات على يد أساتذة كبار
ما هي أكبر تحدياتك ككاتب؟ وكيف تمكنت من تجاوزها؟
اوقات كتير كنت بفقد الشغف وبفكر مكملش في الكتابة بس تجاوزت الفتره دي بدعم اصدقائي والقراء اللي متابعين ما اكتبه رجعوني عن قراري بالإبتعاد وشجعوني أني أستمر
حدثنا عن أعمالك المنشورة حتى الآن.. هل هناك عمل محدد تشعر أنه يعبر عنك أكثر من غيره؟
عندي تلت روايات ورقيه شروق وميلاد فرح وإيموشيا والمجموعات اللي اشتركت فيها مع مجموعه من الأدباء عطر الكلمات واللؤلؤ المنثور واريج غزة ورونق الكلمات
وكل عمل منهم فيه جزء من روحي ومشاعري في وقت معين فهتلاقي شروق خدت من قلبي مشاعر الوحدة وفرح مشاعر إزاي تكون قادر تقف على رجلك بعد ما بتقع سنين كتير وإيموشيا خد مني الصمت اللي بقى جزء من روحي، فكل حاجه بكتبها بيكون فيها حته مني ومن شخصيتي
كيف ترى دور الأدب في المجتمع اليوم؟ وهل تعتقد أن للأدب تأثيراً ملموساً في الواقع؟
دور الأدب هيفضل مهم طول ما أحنا عايشين بيجيله فترات بيتراجع وبيأثر بالسلب على حيات الناس بس بيرجع تاني وبقوة ومن أكتر الفنون تأثير على المجتمع وهنا تبقى الخطورة فرأي أنه سلاح ذو حدين لو اتوظف من الأديب بشكل لائق هيكون إيجابي والعكس صحيح
هل لديك طقوس معينة تتبعها عند الكتابة؟ وكيف تساعدك هذه الطقوس في التركيز والإبداع؟
أكيد لازم اكتب لوحدي تمامًا وهدوء تام علشان اعرف اركز من غير ما حد يفصلني
كيف تتعامل مع النقد؟ وهل تلقيت نقداً معيناً ساعدك في تطوير أسلوبك أو رؤيتك؟
النقد البناء بنبسط بيه جدا وبحس أن فيه ناس بتستغرب لاني أنا اللي بروح اطلب النقد بنفسي علشان اتعلم وأطور من كتاباتي
النقد اللي ساعدني في التطوير أنه أحد الكتاب نصحني أن الكتابة بالفصحى افضل من العامية لتحسين مستواي ككاتبة وأكون قادرة الدخول في المسابقات
ما هي رؤيتك لمستقبل الأدب في العالم العربي؟ وهل تعتقد أن الكتابة تواجه تحديات خاصة في هذا العصر؟
لكل فن من الفنون وقت بينحدر فيه للقاع ولكن بعد كده بيكون في أحسن حالاته وهكذا الأدب في المستقبل هينضج وهيكون مؤثر بشكل رهيب أن شاء الله
التحديات اللي بتواجهه الكتابة هي الذوق العام اللي أوقات كتير بتخلي الكاتب يكون مضطر يتماشى معه فيكتب حجات مش مقتنع بيها وغالبًا بتكون دون المستوى لإرضاء ذوق القارئ
هل هناك موضوعات أو أفكار تعتبرها محظورة أو تجد صعوبة في تناولها في كتاباتك؟
حاليا مش بحب اتكلم في السياسة لأني معرفتي بيها محدودة وأنا مش بحب اكتب عن حاجه إلا وانا عرفاها كويس بس يمكن في المستقبل اكتب عنها لما اقرا عنها واعرف أكتب عنها
كيف ترى تأثير التكنولوجيا ووسائل التواصل الاجتماعي على عملية الكتابة والنشر؟
هي سلاح ذو حدين حسب الاستخدام البشري ليها هل هيستخدمها أنه يطور نفسه ويحاول الانتشار من خلالها ولا هيستخدمها أنه يعمل لنفسه شعبيه ويكون في الأصل كاتب ضعيف معندوش اي خبره
ما هي النصيحة التي تقدمها للكتّاب الجدد الذين يسعون لدخول عالم الكتابة؟
القراءة والتعلم من خلال كورسات على. كتاب كبار وتقبل النقد والأبتعاد عن الأفكار التقليديه
ما هي مشاريعك القادمة؟ وهل هناك عمل جديد تعمل عليه حالياً؟
آخر مشروع طلع للنور هو إيموشيا هينزل أن شاء الله معرض الكتاب ٢٠٢٥
كيف توفق بين الكتابة والحياة الشخصية؟
وهل تجد صعوبة في تحقيق التوازن بينهما؟
بحاول أخلق لنفسي وقت محدد اكتب فيه وفي الغالب بيكون بليل لما الكل ينام في هدوء
اوقات كتير بجد صعوبه بس بحاول أحدد لنفسي ميعاد انهي فيه علشان ألتزم
في الختام، ما هي الرسالة التي تود توجيهها لجمهورك ومحبي الأدب؟
بلاش تقلل من مستوى كتاباتك علشان ترضى الذوق العام لأن البقاء للأقوى أدبيًا فلو عايز ما تكتبه يعيش للأبد ارتقى بما تكتب حتى لو محدش اهتم بيه دلوقتي بس الأدب الراقي هو اللي بيستمر
2
-2
