صباح الملبن السايح في كحكاية

وبسكوته أخدها الحب 

فدابت شوق في كوباية 

وضحكة طفل لمح بعنيه

فراشة بلون خدود الورد

رفع إيده يلاحقها

كما الصوفي في حلقة ذكر 

بجناحه وروحه البكر  

نسي الصندل المتضفر بعرق أمه 

بيتزحلق يروح يشرب 

عرق مساكين 

ودموع من العينين باينين

على الدنيا الي مش دنيا 

وعلى القلب الي اتقسم نصين 

وبنت واقفة تتزوق على مراية 

بضحكة بريئة شايفة الدنيا دي جنة 

على كفوفها آثار حنة

بترسم قلب دايب دوب في كراسة 

رموشها تفوت كما رصاصة 

بتمشي تنشر البهجة 

وترمي بإبتسامة حب 

على الماشيين بمية لهجة 

عراقي مصري لبناني 

فلسطين بتدوب في شرياني 

وكله تغرقه الزحمة 

ولحم يلم على لحمة 

وشمس تحن وتجن 

وأخر اليوم بنتجمع 

نلضم من الحنين عناقيد 

وشمع في لمة الأحباب 

في عيد الحبايب عيد 

ونتجمع بدون مواعيد 

ماهي الأرواح بتتلاقى 

ويوم ما تلاقي شبيه روحك 

ده يوم العيد