حبكبرصيابعيد - حوار ساخر

_حضرتك ايه الي انتي منزلاه ده؟!
_ الي هو ايه حضرتك مش فاهمة
_ كلام الحب والرومانسية
_ مالهم ايه المشكلة؟!
_حضرتك متجوزة!!!
_أيوه أنا مش فاهمة ايه السؤال؟ وايه وجه الاعتراض؟!
أأقتل جوزي وأبقى أرملة، طيب ساعتها أكتب رومانسية عادي ولا الأرملة لا تتعاطى الحب.
ولا أقولك أحسن من الطرطشة والدم، وهتطلع عليا سمعة اني مش كيوت ومفترية، وأنا الصراحة، صفة الكيوت دي بحاول أحافظ عليها لزوم الرومانسية وكده
_ حضرتك قولي هي الرومانسية ليها ميعاد؟ طيب بتيجي امته؟ ولا هي ساعة تروح وساعة تيجي????????
بلاش السؤال ده
بص لي كده واقفل بقك مباحث التموين بتمر وحاليا بياخدوا ضرايب على كل حاجة
_مازال حضرته متنح وقد يكون بقه وقع في جزمته.
ما هو الي غلطان، يعني يقع في ايدي أنا.....لا اله الا الله كان نفسه يفهم.
أسأله بابتسامة بلهاء :
حضرتك لو تفطمني علي الدور هجاوب ده أنا لهلوبة وهريح حضرتك ميصحش أسيبك تهري وتنكت.
_ لا أبدا، أنا قلت متجوزة
_ يادي الوقعة هما بيقفشوا في المتجوزين ولا ايه؟
_ لا يا أنسة افهميني
_أنسة ومتجوزة الاتنين.
هو حضرتك تعبان ولا سخن اهدي كده وخد نفسك النبي يا خويا ما حد واخد منها حاجة، روق روق يا راجل قطيعة الستات، والله هيجيبوا أجلكم.
_طيب بتكتبي رومانسية ليه هو انتي مراهقة؟
_ والله يا أستاذي مراهقة دي معدتش عليا، شوفت الخيانة فاتت جنبنا على رأي عبحليم.
طيب كانت قالت لي كنت هروح معاها، والله ياسي الأستاذ أنا مفتكرش من يوم ما وعيت على الدنيا وسموني سكينة وأنا كبيرة كده.
_ طيب حضرتك، هو الرومانسية والحب، ليهم وقت وميعاد، هو القلب بشيخ كده والمشاعر بيجيلها تجاعيد، قولي قولي يمكن أنا معرفش
وبعدين يا سيادة اللوز
أنا ست يعني كتلة مشاعر، كتلة حب وعطاء ربنا خلقني كده، علشان أقدر أحب وأغفر وأحتوى ولادي وجوزي والدنيا الي حواليا
_ومتنساش اني كاتبة يعني مرهفة الحس، مجنونة. الحب مداد قلمي، والمشاعر هي نبض حرفي
_ ينزل راسه الأرض كأنه بيحاول يدور على الرد تحت رجليه.
لكن هو فيه ستات كده ، انتي من كوكب تاني_ لا حضرتك كل الستات كده بس بتفاوت
فيه منهم بيقدر يعبر ومنهم بيدفن مشاعره ومنهم الي زي حضرتك اسم النبي حارسك وصاينك. عمل لمشاعرهم تجفيف بقت زي الوردة من غير روح، انسان بلا روح، بلا نكهة
_ هقول لحضرتك، المشاعر للست حياة، روح من غيرها صدقني، بتخسر كتير، وفي الآخر يقولوا نكدية، ياخي ماهو من الخلق الي بتشوفها، من الشخص الي بيمص روحها ويمنع عنها الحب نورالشمس الي بينور وشها وحياتها.