انواع الناس الي بتبعت طلبات صداقة

انواع الناس الي بتبعت طلبات صداقة
ودول مالهمش جنس يعني ممكن تكون بنت راجل بنت مسترجلة أو راجل منسون وات ايفر
عادي ماهي الحرية كانت من الجهة البحرية حاليا بقت جنوبية شرقية غربية والدنيا ريشة في هوا سيادتك المهم نصنف ونرص ✍️
الصنف الأول (سوما العاشق) وده لتيف زريف بشكل مخيف تحس كده أنه داخل بس علشان يرش حنان مش الي هو أنا ???????? دي مشاعر بتدلدق وصور قلوب وورود وكلمات مش من العالم بتاعنا خالص.
وده بيحب الصنف كله كل نون النسوة الأحياء منها والاموات وتقريبا بيبعت للكل بيحب يفرح البنات جدا وده صنف مسالم بنسيبه عادي مفيش منه ضرر أليف يعني ????

*نيجي للصنف التاني وده الغالب ( النحنوح) وده داخل يشقط وش .
يبدأ بشكرا لقبول الصداقة وممكن نتعرف وفيهم واحد أنا شخصيا بيجبلي تلبك معوي اول ما اشوف اول كلمة بيقولها لما يقول ( هاي) ببقى عاوزة أأقوله نحنوح وملزق الاتنين وياسلام لو جه بعد هاي ممكن نتعرف أقسم بالله ده بقا لو قدامي هضربه.????????
وده طبعا لو سبتيه هيتكاثر ومش هيسكت أبدا عاوز يشوفك حزينة ليه ومتأثر بأي حاجة تنزليها كأنه مستنيكي وروحه حبت روحك وقلبه فيكي اتشعلق ويادلع دلع ???????? على رأي الشحرورة

* الثالث ( التايه) وده ياعيني تقريبا مامته قالته خليك قاعد هنا لحد ما أرجع لك، لكن هو حب يتفرج على العالم الأزرق ومادام فيه بنات خير وبركة ميضرش.
ده بقا أول ما يشوف بروفايل واحدة يبعت طلب صداقة يدوب تقبل تلاقيه في الماسنجر زي ما تفتح الباب فجأة تلاقي محصل الكهربا أو بتاع الغاز في وشك قضاء وقدر يعني ????
طيب ده بيعمل ايه ده يدخل يقولك انتي مين؟! تقوليله: حضرتك مين:
فيقولك: جئت لا أعلم من أين؟ ولكني أتيت أبصرت صورتك فأتيت .مع إحترامنا لعبد الوهاب
تقوليله : طيب حضرتك عاوز ايه؟!
يقولك :أتعرف على حضرتك ؟
فتاخدك العزة وتقوليله حضرتك تابع الي بكتبه على صفحتي وكل حاجة عني موجودة .
يقولك : هو انتي بتكتبي؟!
ساعتها يابنتي بتتحولي لإبتسام الهبلة???????????? وبقك بيتفتح غصب عنك ????ودماغك تبقى في رجلك .????
يعني هو داخل وخلاص مالوش دعوة بقا بتكتبي بتتشقلبي ، بتبيعي سبح هو أي تاء تأنيث راشق .

*"الرابع وده بقا اسمه ( الرايق) هو داخل ينام بيدخل ياخد كنبه ويفتح باب الاكونت علشان الطراوة وياخد القيلولة.
بتشوفيه صدفة مرة يبعت لك تعملي اعجاب بصفحته الي هي معدية 20 الف متابع وهو بيكتب عسل لبن تمر هندي وعاوز سي فريست وممكن يحذفك لو معملتيش لأ ماهو مش علشان نايم على الكنبة عندك تفتكري الرؤوس اتساوت اصحي يا كاتبة .

*الخامس ( المثقف ) وده ممكن يكون كاتب زي حالاتك وممكن يكون قارئ أو من المهتمين بالقراءة ودول بقولهم ربنا يكتر من أمثالكم والله، مجرد وجودهم ومتابعة كتاباتهم أو متابعتهم ليكي بهجة ماهو لازم حاجة تحلي المرار إلي فوق ده وإلا كل واحدة هتمسك القلم الي بتكتب بيه وتمشي تغرزه في عين إلي يقابلها .

وفي الآخر تا تا تا ????????
* نصيحة لكل صديقة أو صديق عندي *
خلي الصفحة ده مجرد نافذة تعرف فيها ناس ليها قيمة شخصية أو ثقافية ، يعني الفيس عمره ما هيديك القيمة الي انت عاوزها ولا كتر الأصدقاء دول هم على القلب أقسم بالله. وكل شوية بدخل أعمل حملة من غير شوشرة بعمل لهم عملية تقليم
ماهم بيشفطوا الأكسجين ،????????
حافظ/ وحافظي على الناس الي بتدي طاقة إيجابية الناس الي مؤمنة بيكي بس قبل كل ده لازم تكوني مؤمنة بنفسك . وإن قلمك وثقافتك وإيدك بس هي الي يتسند عليها .
خلصت خلاص ????????