رحم فارغ

خرجت نهلة ممسكة باختبار الحمل بخيبة وعيون دامعة

سلبي يا حسن سلبي للمرة الالف طيب لية بتتأخر وتعشمني ليه متجيش في معادها ليه بتخلف كل كام شهر والامل يتجدد تاني بعد مبكون دفنته انا تعبت تعبت اوي

خير يا حبيبتي انتي وجودك عندي بالدنيا واللي فيها مش انتي بنتي وحبيبتي ومراتي

حسن بطل تضحك عليا وعلى نفسك انا بعمل زيك كدا بالظبط

لما بقعد وسط اصحابي وولادهم بيجروا حواليهم بكابر واقول ياه دا انا مرتاحه م الصداع دا

انا جوزي عندي بأطفال الدنيا عايز معامله وطبطبه ببقا بكذب يا حسن ببقا بمثل اني مش هاممني بس انا ببقا نفسي اقوم احضن ولادهم انا بحبهم اوي والله بخاف حتى ابص عليهم اصل صحابي يخافوا مني على ولادهم انا تعبت من المكابرة وتعبت من الادوية والحقن انا بس كان نفسي احس بحركة طفل في بطني

كتيره يا حسن

نفسي اجرب تعب الحمل والسونار وانا بسمع صوت دقاته

تنهد حسن الحمدلله على كل شئ انا بحبك يانهله نفسي اشوفك مبسوطه من قلبك شوفي اي يفرحك ونعمله عايزه نعمل حقن تاني معنديش مانع الحمدلله ربنا مبارك في رزقنا وموسعها علينا

حقن تاني وحقن وشكشكه تاني وفي الاخر باظ عشان اي عشان التاكسي عطل بينا وروحنا متأخر كام ساعة متخيل يا حسن اتحملت قد اي وفي الاخر راح في الهوا

مقدر تعبك والله بس هنعمل اي دا ابتلاء ربنا لينا

(ويجعل من يشاء عقيمًا )

ربنا شاء بكدا هنعمل اي بس

قومي اغسلي وشك واحمدي ربنا وصلي وادعي مفيش حاجة كتيره عليه

قامت نهلة وتوضأت فهدات وصلت حتى سجدت فبكت وبكت حتى ابتلت سجادتها من دموعها دعت بكل ما اوتيت من قوة

(ربي لا تذرني فردًا)

يارب اجبر خاطري يارب نفسي في طفل يارب سامحني مش عارفه ارتب كلامي بس انت عارف انا عايزه اقول اي

انهت صلاتها وقامت فأحضرت عشاء شهياً وجلست مع حسن في سكون امام التلفاز متكئة على كتفه

حسن اسفه اني كل فتره بضعف وانكد عليك انا بحبك اوي و قعدتنا دي مع بعض وحياتنا الزوجيه المستقرة عارفه انه يتمناها كتير متجوزين ومخلفين انا ربنا عوضني بيك

انتي تعملي اللي انتي عيزاه وانا اسمع واخفف عنك لحد مترتاحي انتي حبيبتي يا نهله

مرت الايام رتيبة حتى دق جوال نهله

ازيك يا نهوله عامله اي وحشاني اوي

صفاء انتي وحشاني اكتر والله عاش من سمع صوتك

يلا مش هنتقابل النهارده في سبوع بنت ناديه

ماشاء الله هي نادية كانت حامل

ارتبكت صفاء

البت نادية دي زهايمر دي نست تكلم تلت تربع صحابنا تعزمهم كل م اكلم واحده الاقيها لسه متعرفش شكل ارقامكم ضايعه منها

حاولت نهلة تصديق الكذبة ومجاراتها

اه عارفه ناديه دماغها ضايعه

ابتلعت دموعها لتوقفها حتى لا تشعر صفاء

الو الو صفاء الصوت بيقطع

مثلت نهله ان المكالمه قد انقطعت لان الشبكه ضعيفه حتى لا تفضحها دموعها

اسندت راسها شوفت ياحسن نادية ولدت وعامله سبوع ومعزمتنيش كالعادة خافت تعزمني لاحسدها عشان حملت بعد الجواز ع طول ويمكن بتحاول تراعي مشاعري الله اعلم هلتمس ليها العذر

اكيد يا حبيبتي ناديه بتحبك انتي عارفه

اه زي ولاء ورانيا كانوا برده بيحبوني وبيراعو مشاعري

ابتسمت ساخرة

قوم نتمشى مخنوقه

تيجي نزور ماما كانت تعبانه امبارح

خشيت ان تظهر نهله خوفها من تلك الزيارة ومعرفة ما سيحدث فيها ككل زيارة فاشارت بالموافقه براسها

بعد تناول الغداء عند ام حسن اخذت تتجاذب معهم اطراف الحديث

اسكتي يا نهله حلمت اني بشتريلك حلق عارفه دا معناه اي

دار بذهن نهله الاجابه دون ان تبدي بيها

قوليلي زي كل مره اني هحمل ومفيش ولا حلم حلمتيه واتحقق

فردت

لا يا ماما معناه اي

معناه انك هتحملي في بنت قريب

ابتسمت نهله على مضدد اااه يارب ان شاء الله

هو انتم مروحتوش للدكتور اللي بعته ليكم دا بنت صباح حملت على ايده انتم اللي كسلانين لو بس تروحو وتسمعوا الكلام نفسي افرح بخلفكم قبل م اموت

ربنا يفرحنا يا ماما قالتها نهله ثم ذهبت الى البلكون

ماما قولتلك بلاش السيرة دي مش كل مره تسمميها اللقمه وبعدين كسلانين اي احنا لفينا على دكاترة الدنيا

وانا كنت قولت اي يعني انتو هتربطوا لساني خلاص يا حسن اتجوز م اللي بيخلفوا كتير

التفت حسن سريعًا ليرى هل سمعت نهله ام لا

اي اللي بتقوليه دا ياماما انتي عارفه اني مقدرش اتجوز غير نهله

طيب يا حبيبي ربنا يهني سعيد بسعيدة

يلا يا ماما تسلم ايدك ع الاكل هنمشي الوقت اتاخر

الوقت اتاخر برده ولا كلامي اللي تقيل

قبل حسن راس امه ويدها

لا يا حبيبتي الوقت اتاخر

يلا يا نهله

لتذهب صباحًا عملها كمعلمة لغة انجليزية بمدرسة لغات ابتدائية

كان طلابها يحبونها حباً عظيماً فهي تحتويهم وتحبهم و تهاديهم دوماً

واثناء شرحها دق الباب

اتفضل

السلام عليكم ورحمة الله

انا ام تالا حضرتك اكيد مس نهله

ايوه يا حبيبتي انا مس نهله

تالا بتحبك اوي هي عامله اي معاكي

تالا دي شطورة وجميلة ربنا يحميهالك

دي مش بتبطل كلام عنك وعن حنيتك دا يا بخت ولادك بيكي انا عايزه اتعلم منك بجد

على كدا عندك كام طفل بقا

اشاحت نهلة بنظرها بعيدا واردفت قائلة

بس انا زعلانه من تالا

ليه كدا بس

محلتش الهوم ورك اللي غابت فيه

آسفه يا مس بس كانت تعبانه اوي

لا لو كدا يبقا سماح والف حمدالله على سلامتها

هربت نهله من السؤال بذكاء

وانهت عملها وعادت لمنزلها

حسن تيجي نروح عمرة

ياه ياريت بجد

خلاص نبدا نخلص الاجراءات ونسافر

وتيسرت الاجراءات بأقل من شهر وسافر حسن ونهله الى العمره وما ان تصل مطار الملك عبدالعزيز بجدة

حتى تشعر بغثيان وقئ

تكييف الطيارة كان عالي اوي اكيد خدت برد

نوصل مكه واجيبلك دوا ع طول انتي كويسه

اه الحمدلله احسن

وما ان انتهت نهله وحسن من الطواف دعت فيه الله انا يملا رحمها اطفال وان يكف الناس عن جرحها بقصد او بدون قصد

حتى اغشي عليها بين الصفا والمروة ونقلت بالاسعاف

مالها يا دكتور كل دا من شويه برده من الطيارة

لا برد من الطيارة اي مرات حضرتك حامل

قفز قلب حسن فرحًا ودمعت عيناه

حضرتك متأكد ارجوك اتأكد مفيش مجال للشك ممكن يحصل حاجة لو طلع الخبر مش صح يادكتور احنا بقالنا عشر سنين متجوزين ومرزقناش بأطفال ارجوك اتأكد

اللهم بارك انا متأكد وعملت سونار وزوجة حضرتك حامل في شهرين بالظبط وكيس الجنين ظاهر

سجد حسن شاكرا وباكياً لله

يارب اتيناك سعياً فأتتنا بشراك هرولة لك الحمد حتى ترضى ولك الحمد بعد الرضا ولم الحمد اذا رضيت

اخرج حسن أموالًا كثيرة ووزع على كل العاملين بالمشفى

دخل حسن على نهله

نهله الدكتور قالك

قالي لي خير قلقتني

انتي حامل يا حبيبتي حامل في الشهر التاني

انت بتقول اي

انت متأكد

اه والله

نظرت للسماء فرحة بل طار قلبها محلقاً يارب يارب انت كريم اوي يارب اخجلتني بكرمك سامحني على كل مرة فقدت الامل فيها يارب سامحني

وبعد تسعة اشهر رزق حسن ونهله

بسند طفل كالبدر ليلة اكتماله

لا تفقدوا الظن بكرم الله وجوده فالله عظيم كريم مجيب الدعوات