بالطبع لازم الاستقالة المسببة اللي تقدمت بيها لمدير عام ثقافة شمال سيناء واللي رفضها مجلس إدارة نادي الأدب المركزي لعدة أسباب أهمها :

١- اللي بيرأس النادي الفرعي هو نفسه اللي بيرأس النادي المركزي فمن فرعي لرئيسي يا قلبي لا تحزن فالقاصي والداني هو رئيس النادي وطبيعي هيرفضها. لأن لو أتوافق عليها لازم وبالقانون للوائح نادي الأدب إن المجلس ينحل ويتم تشكيل مجلس جديد بالتعيين او الترشيح وده طبعا مستحيل يتعمل . فالحكاية مش زي عضو محترم في مجلس إدارة المركزي بيقولهالي لما سألته عن قرار المجلس فقال لي :'' طبعا أترفضت لأنك أديب كبير قيمة وقامة ومينفعش نوافق عليها''. وانا واثق أنه بيقوللي كده عشان يرفع عنه الحرج مش أكتر ويكبر دماغه .

٢- رئيس النادي المحترم أقترف أخطاء ومخالفات جسيمة فلو اتناقشت بكل حيادية ومصداقية وأمانة مكنش أترفضت الاستقالة ومن سابع المستحيلات فالأدلة وللوقائع تدين رئيس النادي إدانة مباشرة بالقرائن الثبوتية ، واتحداه أنه يرد عليَّ في كل إداناتي بالدليل القاطع .

٣_شوية الناس اللي حولين منه دلوقتي لحاجه في نفس يعقوب واللي بتضحك عليه واللي بتقوله طنش وكبر دماغك وواقفه جنبه دلوقتي ، أقسم بالله العلي العظيم بمجرد ما يتشد في النيابة العامة لعدة مخالفات وادانات ضده هما أول ناس هتتخلى عنه وتهرب منه .

٤- حكاية ان رئيس النادي الهمام اللي عنده ضمير وبيخاف ربنا ساكت خالص وبيتفرج وسايب كل حاجه كده دي اسمها قصر ديل وعدم مقدرة على الرد ومعندوش حجة او دليل او منطق ضد كل ادانته . وسبق من أول ما أخد الرئاسة بالتزكية ولولا مجيئي وحضوري لما كان اكتمل العدد وبقينا نجري نمضي ناس في بيوتها عشان ياخد رئاسة النادي وبعدها بكم بيوم قام عمل محضر اجتماع ورشح واحد من النادي فيه صلة نسب بينه عشان يشارك في مؤتمر أدباء مصر بالاسماعيلية ولما عرفت بالصدفة وكان قاعد معانا مدير عام الثقافة فغضبت وهددت بانسحابي من مجلس ادارة النادي ووقتها مدير عام الثقافة قاله عيب كده وميصحش فاخدت بعضي ومشيت ، فقام خلى واحد يتصل بيا كان تلميذ عندي ووافقت على المقابلة على احدى المقاهي بالعريش رغم اني واثق ان وعوده كاذبه وغير صادقه لكن عشان محدش يلومني وافقت على مضض . وبعدها فوجئت بالمصائب والبلاوي منه ، فبعد وفاة عضو أمانة مؤتمر أدباء مصر عبدالقادر طلبت منه ترشيحي على اعتبار أنني لم أحصل عليها ولا مرة وكل من هب ودب حصل عليها عدة مرات باستثنائي فكنت لمجرد تسجل لي في سيرتي الذاتية أو أي حد يسد لكن رده كان لا يصدقه أحد فقال لما يكرموا أسرة المتوفي رغم أن لو الأمانة عايزة تكرمه لا دخل لي في ذلك ولا علاقة بطلبي . الحاجه التانية راح رئيس النادي المحترم يحضر اجتماع تحضيري في الاقليم لعقد مؤتمر أقليم القناة وسيناء ولم يرشح أحد أو يختار أحد مكانه . كل محاضر الاجتماعات اللي عملها وفبركها رئيس النادي أنا لم أوقع على أي قصاصة منها أو حصلت على أي مزية منه فيختار ويرشح ويستولى على ما يريد أولا هناك أدلة قاطعة ضده وقبل كل شئ ربنا شاهد عليه وعلى كل أقواله وأفعاله . وأخيراً طالما الأمور وصلت لباب مسدود يبقى مفيش حل الا أني أقدم بلاغ ومذكرة تفصيلية للنيابة العامة .

فمن سابع المستحلات أظل عضواً وسكرتيراً في مجلس إدارة يعج بالخبث واللؤم ومحاكاة المؤامرات والوقيعة وكله يحدث في الخفاء والغش من وراء ظهري ولا لي علم به على الاطلاق .

‏"فلا يليق بالعلاقات المسمومة إلا البتر، و مُجاملة الأفاعي جريمة."

والله على ما أقول شهيد وحسبي الله ونعم الوكيل .