Obsessive Compulsive Disorder 

هقولكم حكايه حصلت لمجرد أنى أحاول أوضح ليكم معاناه مريض الوسواس القهرى .

من لسان صاحبتها بتحكي و تقول كنت مسافرة مع جوزى و اولادى إسكندرية و قمت الفجر جهزت الفطار و اتاكدت اكتر من مرة إن البوتاجاز مطفى ، و سافرنا و لكن و إحنا ف نص الطريق جالى فكرة حاولت بكل الطرق أبعدها عن بالى و هى 

" أنى نسيت البوتاجاز مفتوح " 

بتقول انها شغلت اغانى بصوت عالى ف العربيه علشان تشغل تفكيرها عن الفكرة المسيطرة عليها دى لكن هيهات الفكرة كل مادا بتسيطر اكتر و أكتر ، و للأسف طلبت من جوزها الرجوع علشان تتأكد ، و فعلا قدام قلقها الشديد اضطر جوزها للرجوع للبيت ، و إتصدمت طبعا لما شافت أن كله تمام و وسط غضب جوزها و زعل الأولاد بإنهاء الرحله !! 

أدركت أنها ف مشكله حقيقة اسمها ( الوسواس القهرى) و قررت انها تتعامل مع متخصص نفسي .

* إيه هو بقى مرض الوسواس القهرى ؟؟ 

هو ببساطة تعرض العقل لفكرة صعب جداً جداً التخلص منها إلا القيام بتصرف لطاعة الفكرة لمحاوله إنهاء الفكرة المتعبه ؟؟ 

زى ايه مثلا ؟؟ تعالى اقولك !!

* الأعراض :- 

١_ إنك تحس ان إيدك مش نضيفة ف تضطر للغسل المتكرر ليها على أساس التخلص من الاوساخ ؟ مع انها ف الأصل نضيفة !!

٢_ فكرة تانى أن البيت مش نضيف مهما تعبت ف نضافته ، لكن دائما فى فكرة إنه محتاج نضافة أكتر ، و دة طبعا يسبب المزيد من الإجهاد البدنى و كمان النفسي .

٣_ فكرة اصعب بكتير و هى العيب فالذات الالهيه .. و افكار تكفيريه أو ألحاديه عن وجود الله .. و دى دايما يقع فيها المقربون إلى الله و الأشخاص المتدينين .

٤_ حاله كمان و هى اللى بتكرر كلام بنفس الطريقة بعدد لا يحصى من المرات أثناء الصلاه و الدعوات ، و لسان حاله بيقول ممكن اكون نسيت صلاه أو دعوة .

٥_ فكرة كمان صعبه وهى التفكير ف اشياء و افكار غير لائقه جنسياً و دى فكرة غالبا بتيجى للشخص المتدين .

* امتى يظهر الوسواس القهرى ع تفكير الإنسان ..

غالباً ف سن المراهقه و مع الوقت السن بدون العلاج الحاله بتتفاقم و تزيد نسيباً إلى الحد الذى لا يحتمل .

* ايه هى درجاته ...

له درجات متفاوتة بين الضعيف و الشديد المسيطر على صاحبه بشكل لا يحتمل .

* هل الوسواس القهرى وراثه ؟ 

* للأسف اه لو فى تاريخ مرضى لأى من الاب أو الأم ف سهل وراثه الأبناء للوسواس القهرى .

* طرق الشفاء ..

من نفسك صعب الحقيقة لأنك كل ما بتحاول تهرب من الفكرة المسيطرة للأسف بترجع تانى و لكن مجرد ادراكك بالمشكله ف دة نص العلاج و النص التانى ف انت محتاج لمتخصص نفسي يساعدك لان الوسواس القهرى بيكون خلل ف كمياء المخ اللى بتحتاج ف بعض الأحيان إلى التدخل الدوائي .

حماكم الله من اى مرض سواء نفسى أو جسدى .