كانت مريم دكتورة تعيش فى قريه بسيطة و كان ليها حلم انها تكون دكتورة قلب مشهورة و جالها عرضين ف نظرها كانوا أصعب من بعض و هو انها تشتغل فى قريتها دكتورة بسيطة فى الوحدة الصحية أو إنها تسافر و تكمل حلمها ف بلد كبيرة و يكون ليها عيادتها الخاصة .
وهنا دخلت مريم أوضتها و مسكت ورقة و قلم و بدأت ف إنها تكتب كل عرض فيهم !
و أخيراً قررت مريم إنها هتسافر للبلد الأكثر شهرة و مساحة .
• هو إيه السبب وراء قرار مريم ؟
• و ايه اللى كتبته فى ورقتها و ساعدها على إختيارها ؟
و هو دة مقال النهاردة
كيفيــــــــه إختيار و صنع القرار !
فى البدايه أحب اقولكم إن مش كل حاجة ف حياتنا هى من صنع قرارتنا و حقيقى ملناش أى تدخل فيها زى مثلاً ( أهلك ، أسمك ، بلدك ، شكلك أو هيئتك الجسديه ) .
• و فى قرارات سهله و مش معقدة زى إنك تختار ( أكلك ، شُربك ، أصحابك ، هواياتك )
• و فى نوع تالت من القرارات حقيقى تبان فى بدايتها سهله و لكن لما تتعمق فى إتخاذ القرار هتلاقيه صعب و محتاج تفكير عميق ، و وقت طويل زى مثلاً انك تقرر تختار ( شريك حياتك ، تعليمك ، وظيفتك ، البلد اللى بتفضل تكمل حياتك فيها ) .
طيب هو ليه القرار مهم كدة ف حياتنا ؟
من أهمية إتخاذ القرار الناجح إنه هيوقفك على أرض صلبه و هيعلمك قوة الشخصية و عدم التردد .
دة كمان هيقربك جداً من تحقيق أحلامك و أهدافك .
ضيف كمان على كل دة إنه هيعزز ثقتك بنفسك و قوة شخصيتك ، لأنك هتكون محط أنظار الجميع و هتلاقى كلامك و أفكارك كلها محط إحترام للكل .
تعالوا بقى نتكلم شويه عن ...
هو أنا إزاى أخد قرار من غير ما أندم عليه ؟؟
سؤال مهم مش كدة !!
علشان تاخد قرار سليم من غير خوف أو تردد لازم يكون عندك شويه مقاومات بسيطة زى :-
١_ حدد هدفك بوضوح و شوف إنت عايز إيه بالظبط ( و ركز معايا على أنت عايز إيـــــه ) مش الناس عايزين إيه ، دة أولاً .
٢_ أجمع كل المعلومات عن القرار اللى عايز تاخده و دة زى ما قلنا علشان ماتندمش بعد كدة أو تكون متردد .
٣_ دايما خلى عندك بدائل بمعنى لو منفعش ( الإختيار ١ ممكن نختار ٢ ) .
٤_ فكر ف العواقب لكل فكرة علشان لو الهدف متحققش متحسش بالإحباط ، و تقول مش هكمل المشوار .
٥_ و مهم جداً كمان إنك لو مش هتنفذ قرارك يبقي متتعبش نفسك من البدايه و تحط اهداف ، لأن القرار لازم ينتهى بالتنفيذ .
٦_ قيم النتيجة اللى وصلت ليها ف صنع قرارك و نتاج أفكارك .
و الجزء الاخير دة مهم جداً و هو
٧_ صدق قلبك و مشاعرك لأن الحدس و المشاعر مش بتكدب ف لو لاقيت نفسك مرتاح للقرار كمل ، أما لو قلبك مش مرتاح يبقى أنهى قرارك فوراً .
كل دة جميل و عرفنا سوا إزاى نصنع قرار ناجح فى حياتنا .
طيب هو فى عيوب ممكن تقع فيها و إنت بتاخد قرارك ؟
أكيد آه لأن مفيش مميزات من غير وجود عيوب لكن الشاطر هو إللى بيستفيد من عيوبه و يتعلم منها .
من أخطاء إتخاذ القرار :-
• إنك تاخد قرارك بتسرع و من غير ما تاخد وقت كافى للتفكير .
• التردد الشديد لأنه بيضيع وقت .
• إنك كمان تتآثر بآراء الناس فى إتخاذ قرارك .. و أنا هنا بأكد تانى على إنه قرارك أنت و بس .
ف الآخر لازم تتعلم أن كل قرار هتاخدة هيكون خطوة جديدة و مهمة فى حياتك .
عايزاك كمان تتأكد بأن فن إتخاذ القرار هو فى حقيقته مجموعة من ( أفكار+ أهداف + حدس + ثقة بنفسك ... كل دة = نتائج ناجحة )
اتمنى يكون المقال مفيد للجميع .
دمتم بخير
2
-2
