جالى سؤال من راجل سألنى سؤال يختلط بمشاعر تأنيب ضمير شديد مع إحتقار للذات
و كان السؤال هو
_ أستاذة هاميس أنا بخون مراتى ؟
و الغريب هو احساسى بالسعادة و النشوة فى هذة العلاقة ؟
و لكن جوايا تأنيب ضمير لأنى بحبها اوي و بغير عليها جداً ؟
و الأغرب أنا خايف تكتشف علاقتى بأنثى غيرها و تطلب الإنفصال ؟؟
بس السؤال هو ليه الراجل بيخون ؟
طبعاً الاجابه ف الأغلب هتكون من نوعيه أصلها ( نكديه ، مش مهتمه بيا ولا بنفسها ، عصبيه ، بتسمع كلام أمها ،،،، إلخ ) ناهيك عن الأعذار المصطنعة لتخدير الضمير !!
و لكن هو كان جواه عدم فهم و إدراك للتصرف دة !
و لما سألته هل حضرتك بتحب العشيقة التانية ؟؟
كان الرد لأ و لكن مجرد سعادة و انا معاها و لكن برجع أندم على العلاقة دى !!
تعالوا اتكلم معاكم عن سيكولوچيه الراجل فى الخيانه و هو أصلا بيخون ليه ؟
كل اللى حضرتك بتشعر بيه فى العلاقه مع عشيقة اسمها الحقيقى
• ( الوهم الكداب ) و هو أنك حاسس بالذكوريه أكتر و أن حضرتك معشوق الإناث .
• ( هروب من المسؤوليه ) و السبب إنك فالعلاقة مع انثى أخرى غير زوجتك فأنت مش شايل اى مسؤوليه زى ( بيت ،، أولاد ،، مصايف ،، تربيه ) ف حضرتك بالتالى ف علاقه خاليه من أى مسؤلية ، تقدر كدة تسميها رحله للوهم بدون حساب للنتائج .
• ( استدعاء هرمون الدوبامين ) المسؤل الاول عن السعادة حتى لو كانت سعادة وهميه و وقتيه .
• ( أزمة منتصف العمر ) و هنا بتكون حضرتك جواك شعور بأن العمر ضاع و إنت محبوس جوه مسؤليات كتير مش بتخلص ، فبالتالى الهروب لعلاقه وهميه هو الحل .
• ( الملل ) من المشاعر اللى حقيقي ممكن تسبب الفتور ف العلاقه الزوجيه .
فى حجة سمعتها كدة من راجل أو تقدر تقول كدة أنها سبب وهمى جداً و فخ بيقع فيه كل رجل !!
~ لكن انا حبيبتى ( عشيقتى ) فرفوشة .. لكن المدام ( نكديه ) ما هو من حقى اعيش سعيد شويه ؟؟
~ إحنا اتفقنا ف بدايه الموضوع أن الخيانه ف الأول و الاخر ما هى إلا هروب من المسؤوليه ليس إلا .
تعالى بقى معايا أقولك ليه مراتك نكديه على حد قولك أو حجتك !!!
~ مراتك مش نكديه عزيزى الرجل زى مانت شايف ، و لكن إحساس المسؤوليه عليها شديد من ( بيت ، و نادى ، و تربيه أبناءك ، توصيل للمدرسه ، حل مشاكل أولادك ، مصروف البيت إللى لازم يكمل لآخر الشهر لانها مقدرة تعبك و مجهودك ف شغلك ) .
تعالى بقى أسألك أنا كام سؤال و الرد اكيد هيكون عندك !!
• هل العشيقة شايفة حضرتك وأنت بتتخانق و بتصرخ ف وش مراتك ولا اولادك ؟؟ الاجابه لأ !
• هل العشيقة بتشوف حضرتك وأنت نايم و صوتك جايب لآخر الشارع ؟؟ الاجابه لأ !
• ياترى العشيقة شايفة حضرتك و أنت قاعد ف البيت بملابسك الداخليه اللى أغلبها مقطوع علشان توفر لأولادك المال ؟ بردو الاجابه لأ !
طبعا كل دة لأنك بتخرج معاها و جنابك على أكمل وجه و ريحة برفانك جايب لآخر المنطقة مش بس الشارع .
دة غير أن اسلوبك معاها ف الكلام كله مشاعر متوهجة و اطراء على جمالها و شياكتها!!
ف الوقت اللى كلفت نفسك و قلت للمدام نص كلمات الغزل و الاطراء دة هتكون طايرة من السعادة ،
دة غير كلمات التقدير اللى حقيقى هتلاقيها اغلى الكلمات المشجعة ليها .
سؤال مهم جدا ( هل حضرتك توافق بخيانه زوجتك ليك تحت مسمى أنها تعبانه منك او أن حضرتك نكدى ) ؟ مظنش إنك هتقبل !
تعالوا كدة طيب نتكلم عن حلول واقعيه لحياة زوجيه سعيده و دى لكل من الزوج و الزوجة .
بالنسبه للزوجه ...
١- الست الفرفوشة رزق فحاولى تكونى مبتسمة و سعيدة ف بيتك .
٢_ الاهتمام بالنظافة الشخصية ، حقيقى مهمة .
٣_ الراجل بطبعة بيحب التقدير ف اشكرى تصرفاته و قدرى مجهودة .
٤_ عدم مقارنته بأى راجل آخر حتى لو أخوكى .
٥_ اعتبريه طفلك المدلل طول ما هو ف البيت .
و إفتكر يا عزيزتى الزوجة أن الرجل بطبعة بيحب بعيونه .
و ليك بعض النصائح عزيزى الرجل .
١- الستات ف الطبيعى بتحب بأذنها بمعنى ( كلمات الغزل بتفرق معاها جداً ) .
٢_ أهتم بنفسك ف البيت زى ما بتهتم برونقك خارج البيت .
٣_ أشكرها على تعبها طول اليوم و بلاش جمله ( انتى بتعملى ايه طول اليوم ) ؟
٤_ احذر تقلل منها قدام أهلك أو أهلها .
~ عايزاك تتأكد أن العلاقة الزوجية مش مجرد عقد تم بينكم على ورق ، و لكن دة عهد بينكم قدام الله و الناس على حياة مشتركة و ناجحة .
~ و إتاكد كمان أن الرجل هو قائد الحياة الزوجية بالظبط زى روبان السفينه .
ف بأيدك توجه سفينتك لبر النجاه أو للهلاك .
فأختار يا قائد إلى اين ترسى سفينتك ف المجداف ف يدك يا قائد .
2
-2
