بسم الله الرحمن الرحيم
السلام عليكم

كلتلك أنسى باب الزعل
الباب مسدود وضاع مفتاحه
كفر الزعل بين الاخوان
مثل شجره زعلت تفاحه
أحذرك ابيوم ايغرك الحال
لاتكطع الجذر صعبه اصلاحه
معروف الصديق حتى لو زعلان
مثل الطبيب ايداوي جراحه
نعم للصديق لا ترده ابلا
الصديق ورده وبعطرها فواحه
ينبعلك فرح لو للفرح عطشان
ويشهد لفرحك وتشهد افراحه
لتفكر أتبيع صديقك بلأموال
وتصير طير أمكسره أجناحه
وياهو الجاي أيضربك بالحجار
مثل شجره بالدرب نواحه
الصديق العالم أيحفضك بالألوان
لون الوفى والصبر أسلاحه
ومو كل صديق علم ينكال
اهوايه اعلام بألوانها جراحه
أحذرك من صديق أبليه مضمون
تاليتك تصير هدف لرماحه
الصديق يحفضك صباحك وليل
وبريح الامان تحيطك ارايحه
صديقك يعرفك ابنظرة اعيون
لاتخجل دمع عيونك اتصارحه
اوفك لو سمعها - والصدك ينكال -
ايهد الجبل من قمته لسفاحه



اتمنى ان تكون مصطلحاتها الشعبيه سهله على الجميع واي استفسار ارجو التبليغ :)
ملاحظه مهمه القصيده تم اهدائها الى الصديق الغالي -خلدون سعدون - :)

انتضر تعليقاتكم على احر من الجر
تحياتي للجميع
:)