كلنا أكيد في حياتنا دوقنا مرارة الفقد، ولما دة بيحصل بيأثر علينا وعلي نفسيتنا 

حسيت بمشاعر الفقد والتوهان واللغبطة والوجع والالم لما فقدت جنيني ومات في بطني قبل ولادته بشهور وبدل ما اشيله وافرح بيه بدفنه

كل اما افتكر وقتها ازاي فقدته وانا رايحة متابعة عادي واتوفى قدامي بعشر دقايق على جهاز السونار، لما الدكتور شك وطلعت عملت الاشعة ، نزلت ومكتوب فيها death,, وفاه

أول يوم واسبوع مر عليا عادي كله حوليا مش حاسة بحاجة ، بعد كدة بدأت اتعب جدا

واللي ساعدني اصبر واتجاوز المحنة دي، وجود اهلي والناس اللي بحبهم، وسماعي الدائم لسورة الضحي والشرح،الجانب الروحاني ليه أثر عظيم جدا، خصوصا سماع سورتي الشرح والضحي وقت الفقد الأزمات

بعمل ايه لما بفتكره؟!

واحدة صاحبتي كنت متفقة معاها على تارة تعملهالي بعد الولادة، لما ربنا استرد امانته استأذنتي لزعل قولتلها بالعكس اكتبي فيها الحديث ان ربنا هيرده لينا يوم القيامة ودة صبرني جدا وكان سبورتف اوي ولما ببصلها بافتكره وارتاح ويبرد قلبي ومتكوب عليه اسمه اللي كنا مختارينه

المؤسف في الموضوع اني اتشافت بشكل ظاهري قوية وثابتة وبضحك، لكني داخليا كنت بتألم وموجوعة وحصلي مضاعفات كتيرة

، فمهما كانت الصورة حلوة وربنا مدينا الثبات والقوة وقت الأزمات، دة مش معناها ان حياتنا حلوة، فيه تفاصيل مش متشافة بتوجعنا ،احنا بس بنتجاوز في صمت، ومش معناه ابدا إني مبحزنش

مش معني إني بشوف الدنيا بشكل ايجابي إني مبقعش، احنا بس بنرضي ونتعافي بحسن ظننا ويقينا بالله،

((احنا مش فراشات طايرين، احنا ناس عاديين))