ياللي الحب في عرفك دين

أذن بيه فوق راية القلب
ده الجاحد هو المسكين
اما يعيشها جفاف مش حب
ما تقولش اهي ايام تتقضى
عيش بالحلم معاه و اتوضى
والفرح هتتمسك بيه
ما تقوليش اهو حلم وعدى
امشي ما بين الناس بسعادة
ده ف إسعادهم أغلى عبادة
و اللي شاربها مر و سادة
بحلاوتك  خليها زيادة
ابقى إمام ليهم في الخير
سوا في جوامع أو ف الدير
بقلوب صافية ف صفوف دافية
لا بتحقد  يوم و لا بتغير
شوف عمايلهم قول مش شايف
و السوء ف ظنونهم يتخالف
لو اغراب او حتى معارف
كله هيتعامل بضمير
من جمايلهم نظم سبحة
عد عليها و خليك فاكر
قدر اللي عشانك ضحى
خليك حلو ما تبقاش ناكر
وانسى الظلم وإطوي الصفحة
ولسان حالك  يفضل ذاكر
هيفيدك ايه تاخد حقك
والا تعاتبه وهو يعاتبك
سيب ربك يجازيك ويحاسبك
هيكون عوضك باللي يناسبك
و تقول دنيا واخرة يارب