⛵ركبت سفينة الايام ومش خايف لا يوم تغرق

⛵وكل تكالي ع الرحمن وهوصل أيوة انا مصدق

⛵مقضتش الحياة احلام ده يا ما جبيني كان يعرق

⛵ومهما الموج اخدني لفوق ف حبل كريم ومتشعلق 

⛵وبالاسباب شراعي حجاب لحد الصبح ما يشقشق

⛵مكلَّتش يوم لو الريح تقوم ايديها بإيديا.. تغرب..تشرق

⛵و ياما عشت مد و جزر . ف كل حالاتي بسترزق

⛵و ده دراعي صاحبي ووياك يا صاحبي اكيد كت هتفرق

⛵لابحكي في محكي لسان حالي يحكي كلام مش مذوق

⛵بدَور في مينا ترَسِّي السفينة .. تايه واخينا قاعد يبحلق

⛵وكل زادي عيش او زبادي و يوم رح أزأز ف بندق وفسدق

⛵وهيلا يا ريس وخليك كويس ده بحر غدار ماهوش فندق

⛵انزل حمولتك تخفف حمولتي ضميرنا لو حي بالحب ينطق

⛵وع الشط بلطية..عارف مين هي حبيبة القلب وما يعشق

⛵مراتي حياتي وام لبناتي ف بعادي عنهم النار بتحرق

⛵هموم قلبي تغسل مفيش يوم تكسل تحبأ تدبأ

⛵تفرق تمرأ و يوم لما تُرزق توسع تشبرأ

⛵ودعوة من امي تنسيلي همي تجددلي دمي تخليني أجرأ

⛵بوشي البشوش و من غير رتوش هاخدهم في حضني واجمع ما افرق