كتير حبوه  و ياما قالوا عن حبه

ولما سابوه عاشوا الفرحة و لا خبوا
هجيبله من القمر حتة و لا جابوا ولا ودوا
يلوموا عليه بافعالهم ما تهدوا  والا تتهدوا

يفوت اليوم  وراه اليوم بإيد ورا إيد ياخد طعنة
و سال دمه و لا اهتموا بحب كذوب مالوش معنى
حملت الهم من بدري و برضه بتشفي أوجاعنا
مفيش ضربة كانت لغريب. ضربنا بإيدنا ودراعنا

تعبت عشانا ياما كتير  و تعبك كله كان لينا
شوية عليك نقدم روحنا وولادنا و اهالينا
نموت احنا وتفضل عالي فوق الكل
يا سيد الكل.. يا ورد و فل.. وجودك أغلى شيء فينا

  في ناس على أرضه موهوبة بتبني من الأمل  إنجاز
تقدم روحها مكتوبة على ترابه وخدودها ملاذ
و غيرهم يرمي ميت طوبة على حيطانه فاكرها  إزاز
عقول خربانة معطوبة  تولع  في الوطن  بالجاز

وطنا الغالي كان محبوس ما بين كلمات ف أغنية
وفي الميزان تشوف أفعال ما تسواش شربة المية
عطيتهم حضن ويا أمان وما بخلتش بجنسية
قليل الأصل طبعه خسيس بيحفر للأصيل خية

يخون صاحبه في توب الوعظ يتخبى
يقدم للغريب لحمه ويستعمى و يستغبى 
دي أرض الخير ماهيش للغير و لا هي صفقة ولا هي لعبة
تعيش مطرود ومحني العود و أيامك تكون صعبة

لكن هو هيتقدم و يفضل في السما يعلي

يعدي اليوم وراه اليوم يكون  أحلى يكون أعلى
ومهما غضبت و اتشقلبت و فصَّلت من الجنان   زعلة
عليه الكل هيشاور و فوق علمه نئيد شعلة