نعيش شوية مع الشعر

حلمت في يوم وانا صاحي في عز الضهر شفت نجوم

وهعمل ايه بمفتاحي في باب م الصخر حجر مرجوم

كتير عراقيل وحبل طويل وتكتيفة وحمل هموم

بكام شومة وكام بومة و بَتعاند ومش مصدوم

لا بتأثر ولا اتكسر ولا عمري ما كنت بلوم

فاكرني ضعيف ونجمي خفيف بعيش اليوم مقضيها نوم

انا الانسان مهوش كسلان وهخطف حلمي لو مردوم

و دايما هبقى متفائل م هتشاكل مع اللي عايزني اعيش مهزوم

طريقي طويل وحملي تقيل وده احلى ما في المقسوم

ماليش في السهل شباب مش كهل وصوت الحق مش مكتوم

تحمسني و هتدوسني ف احباطك هتحبسني يا عيب الشوم

وركز فوق انا هناك فوق بعيد جدا عن البدروم

عينية باصة قدامي ومتمسك باحلامي لحد اما القيامة تقوم