عزيزي المغترب..
نبرة بلدنا مش مقدرانا ولو كنا لقينا كرامتنا في بلدنا مكناش سيبناها بلاش منها...
صحيح مفيش وجه للمقارنة بين اللي بتاخده برة واللي كنت بتاخده هنا بس الصحيح برضه واللي مش عايز تواجه نفسك بيه ان حضرتك ماتستحقش اللي بتاخده ده لانك لا جهبذ ولا وحيد عصرك ولا تخصص نادر ولا اخترعت الذرة بل في منك عشرات الالاف في كل بلد هنا و في البلاد المحيطة. وكل الحكاية انك رحت بلد من اللي بيضربوا الارض تطلع جاز.
والدليل على كدة ان اول ما بيلاقوا تخصصك من اهل البلد بيقولولك باي باي ببساطة وبياخدوا ابن البلد وبنص الاجر بتاعك كمان.
و طبعا حضرتك واخد بالك ان اول ما الفلوس بتقصر معاهم بيقللوا العمالة ويقللوا الرواتب و يفرضوا الضرايب ويزودوا الاعباء ع الكل حتى على اهل البلد.
هياها يعني واحمد زي الحج احمد وهنا زي هناك. و كل الحكاية وفرة فلوس مش كفاءة حضرتك خالص مهما كنت كفء ولا حتى احترام مواطنين.. و سفسطة فارغة.
ده غير ان حضرتك لو رحت اي بلد غربي هتلاقي فلوس واحترام بس للي بيشتغل بحق ربنا مش اللي بيزوغ والا اللي بينام في الشغل و عايز حوافز ع الخساير اللي بيسببها في موقع عمله. وكفاءة حضرتك دي ممكن تشغلك هناك كاشير والا في بنزينة مش اكتر.
طب ليه الكلام ده دلوقتي.؟ عشان حضرتك كل ما البلد تتقدم تتريق و تسفه وتحبط وتقول مفيش حاجة بتحصل ومفيش فايدة و مع ذلك عمال تشتري في عقارات و تحط فلوس في البنوك. لا عايز ترجع من برة ولا عايز اللي جوة يقب ويعيش هو كمان زي حضرتك.
على فكرة دي بلدك الاصلية ودول اهلك اللي بجد وانت راجعلهم ان عاجلا او اجلا فخليك ابن اصل واهي تبقى بجميلة.
2
-2
