بعد ما بابا اتوفى كان نفسي اتصل بيه قوي واسمع صوته
وانا في داء غريب قوي عندي ......... عقلي بيحذف اي حاجة تزعلني قوي ومقدرش استحملها زي موت بابا مثلا
فلما حسيت اني عاوزة اسمع صوته عقلب حذف ان بابا كان عنده تليفون وله نمرة اصلا علشان مش متخيله ان لو رنيت ممكن حد يرد غيره .
حذف كمان كبر السن اللي بان على وش بابا وصوره وهو عيان وشكله وهو ميت .
مش بفتكر غير شكله وهو راجع فرحان بى علشان جبت درجات حلوة ومعاه هدية مجموعة قصص المكتبة الخضراء من دار المعارف .
او لما الجيلاتي كان بيقع مني وانا وهو راكبين عجلة ويروح يجيبلي غيره اكتر من 5 مرات من غير ما يزعقلي . ☺️
او لما كان بيزغزغني وانا عيله واعيط من كتر الضحك . 🥺
وحذف كمان كل موقف وحش ممكن يكون عمله وزعلني منه ، او كلمة مش لطيفة قالهالي في يوم من الايام .
مش بفتكره غير وهو في فترة سن الاربعين وشكله جميل ومتزن .
وعقلي مقتنع انه بوضعه ده عايش بس مش بيقدر يكلمني يطمن على وانا مش بعرف اوصل له وده بيخليني اعيش بطريقة مشاعري تقدر تستحملها .😌
تعديل :
لما بابا مات ملبستش اسود كمان
2
-2
