لو شريط حياتك مر قصادك ؟

في سؤال واجابته في فيلم غيروا رد فعلي بعد ما شفتهم في مشهد جميل

 السؤال كان:

لو شريط حياتك مر قصادك من البداية للنهاية وحبيت تغير حاجة فيه

 الحاجة دي هتكون ايه؟

البطل كان رده:

يمكن كنت هحاول اعبر عن اللي جوايا اكتر .... يمكن

المشهد ده اثر على وغيرني بطريقة رهيبة

بسببه بس إتعودت قبل ما اقطع علاقتي باي حد اعبر عن كل حاجة جوايا 

.... كل حاجة ..... بعنف وبهدوء ... بقوة وبضعف ... بسرعة وببطء

كل حاجة وجعتني أو جرحتني أو حتى حسستني بالإهانة

وبسببه اتعلمت اطلب احتياجاتي بطريقة مباشرة واضحة وصريحة ومحددة واستنى فترة كفاية يمكن تتم الاستجابة ليها

وادي للي قدامي فرصة واتنين يحاول يسترضيني وينسيني 

وأشوف عرضة ولا خلاص مبقتش عاوزة 

المشهد ده علمني اعمل كل حاجة ببطء 

 احب ببطء واكره ببطء 

اهتم ببطء وافقد اهتمامي بنفس البطء

اتعلق ببطء وافقد الشغف ببطء

وده علشان ما الومش نفسي واتخيل في يوم أن الوضع كان ممكن يختلف لو بذلت مجهود أو تسامحت أو اتحملت اكتر