بحب عبير

انا بحب عبير قوي ... بحبها بجد 

بحبها من جوا ومن بره .

مش معنى كده اني متخيلة اني مبغلطش وخالية من العيوب.

انا عارفة ان عندي عيوب بس متعايشة معاها وبتعامل معاها صح.

عيوبي الشخصية دايما بشتغل عليها وبحاول ابقى حد افضل.. أقوى... اقدر ... اكثر مرونة.

بحاول دايما ابقى متزنة ومش بخاف ارجع للحق لو اقتنعت اني كنت على باطل.

ببذل أقصى ما في طاقتي علشان بجد اتطور باستمرار. 

اما عيوبي الشكلية

فالصراحة انا بحبها.

 لأنها جزء مني محبش اغيره او اقطعه

بحب التجاعيد اللي بتبان لما بضحك حولين عينيه

بحب مناخير بابا الكبيرة اللي مالية وشي

وبق ماما الجميل اللي ورثته

و كسرة عيني الشمال اللي بتفكرني قد ايه امي تعبت علشان انا اتولد وابقى موجوده.

بحب وزني سواء خاسة او تخنانه .

با ختصار بحب شكلي في كل حالاتي.

حب النفس حاجة جميلة بالمناسبة ومختلف تماما عن الأنانية.

الأنانية ممكن نخلي الإنسان يدوس ع الآخرين علشان نفسه ون وجه حق.

انما حب النفس بيمنع النفس تدوس على نفسها علشان حد بدون وجه حق.