قال لي صديق "يتوقع الانسان دوما انه يتعامل مع من هو مثله تماما .. و هذه إشكالية"

فكرتني جملته بتجربة لاتنسى غيرت حاجات كتير في حياتي وغيرتني بدرجة كبيرة
انا انتقائية للغاية بطبيعتي ، واتعودت اكون انتقائية اكتر في علاقاتي الشخصية
علشان كده مشاعري تجاه الأشخاص اللي بنتقيهم -كانت - ثابته دايمة ومستقرة للغاية
لا بتغير ولا بفرط في حد من الناس اللي بعتبرها ضمن دايرتي المقربة

لغاية ما عديت على أصعب موقف حصل في حياتي ... كانت المرة الوحيدة تقريبا اللي حد قدر يفقدني اتزاني وهدوئي ... وينتزع مني احساسي بالسعادة والأمان والطمأنينة

لغاية دلوقتي مش قادرة احس أني ممكن اثق في حد او أحس بالسعادة اللي بتخلي الانسان يصحى من النوم مفعم بالبهجة زي ما كنت متعودة من نفسي ... رغم احساسي بالرضا والسكينة والثقة في تدابير ربنا

علاقة صداقة... توائم روح زي ما اتعودت ااقول لنفسي
علاقة دامت اكتر من ٢٠ سنة .
علاقة _كنت احسبها _ مستقرة هادية ومرضية لأطرافها

لغاية ما اتغيرت توأم روحي فجأة وانقلبت على !
تخيلت ان السبب مشاكلها
سألت عن السبب .... استفسرت مرارا وتكرارا بطريقة وصلت لدرجة الحصار احيانا منها ومواجهتها بتصرفات لا اقبلها صدرت منها في حقي ... هى نفسها مكنتش هتقبلها لو صدرت مني
صرخت وعيطت .... شرحت لها احساسي بالوجع من تصرفاتها

كان الطبيعي واللي كنت مستنياه منها انها تشرح كل موقف زعلني زي ما حصل لما زعلت هى مني لاسباب مشابهة ظاهريا من سنين
بس هى معملتش كده .... يمكن لانها مش انا .... ويمكن لان احساسها بعلاقتنا وارتباطها بى كان مختتلف عن احساسي وارتباطي بيها

جرحت فى ... اتهمتني باللي مش فى .... انتقدتني ..... وحولت كل ميزة فى لعيب مش ميزة !
حتى تصرفاتي المحبة اللي كانت بتقربنا حولتها لشئ بشع
اتهمتني باني سبب كل حاجة وحشة في حياتها.. واني متلاعبة ومسيطرة!

فوجئت ..... اتخضت من كلامها
اتحول الحزن والاستنكار اللي كانوا ماليين قلبي من ناحيتها
لاحساس مدمر بالغضب منها ومن نفسي لاني مقدرتش العمر ده كله اشوف اللي جواها ده

السؤال اللي كان مجنني وقتها ... هى شايفاني كده فعلا؟! طب هو انا كده فعلا ؟! طب كل السنين دي ليه فضلت قريبة مني رغم ان اللي جواها وحش قوي يقتل اي مشاعر حلوة

اتهاماتها رجعتني سنين كتير لورا ..... رجعت لبداية علاقتنا
ابتديت اشوف شريط سينيمائي للتغيير اللي حصل في شخصيتي الاول علشان اعرف هل كل التهم اللي الصقتها بى دي فعلا سليمة ؟
بعدها ابتديت اشوف تصرفاتها هى معايا طول السنين دي واقيمها بعين العقل و الواقع مش بعين المحبة والخيال

و................... يتبع