بحلم على الصعيد العام ......... و بحلم على الصعيد الشخصي
بحلم و الحلم مش حرام علشان اقدر أكمل حياتي و ما أموتش مقهورة

أحلام مشروعة ..... (1)


بحلم
برئيس مصري يبقى عارف واجباته قبل امتيازاته و فاهم ان الرئاسة دي تكليف مش تشريف و انه موظف في خدمة الشعب المصري لا فرعون و لا قائد ملهم

بحلم
بشرطة أفرادها آدميين مش كلاب مسعورة ....... اكتر فصيلين متشابهين في البلد دي الاخوان و الشرطة .. عندهم حالة سعار ضد أي حد من فيما عدا عشيرتهم

بحلم
المؤسسة العسكرية تنازل طواعية عن 20% من ال 40% اللي واخدها من دخل مصر القومي للمصريين لأن الفقر اللي رعى في جتت المصريين الغلابة هو اللي خلى الاخوان و السلفيين يقتاتوا على أحلام أهل مصر البسطاء و يستغلوهم و يقدروا يستقطبوهم

بحلم
الدعاة للدين - مش علماء الدين لأن الفرق بين الاتنين كبيييييير قوي - يعرفوا ان واجبهم هو هداية الناس لله و لدينه و بس و انه مش مفروض ينتقصوا من مكانتهم و مكانة الدين اللي بيحاولوا يهدوا الناس له بدب مناخيرهم في السياسة لأغراض و مطامع شخصية

بحلم
السياسيين يحاولوا يتعاملوا بنضافة و كل واحد فيهم يقول اللي في دماغه بصراحة و ما يسعاش الا لمصلحة مصر مش لمصالحة الشخصية

بحلم
الشباب الثائر يبقى عنده شئ من الوعي و القدرة على ربط المعلومات ببعض و معرفة التاريخ علشان يقدر يختار صح و تبقى خطواته موفقة