أحلى أحلى

وبكرة جاى بأحلى رحلة
حعيشها فرحان طول حياتي
ودنيتي لازم حتحلى
قلبي مختار إنه يفرح
عمري ولا حظلم ولا اجرح
قلبي مِستني الليالي
تبتسم لحياتي تطرح
شجرة الفرحة اللي هى
حتلغي كل جراح ماضيه
وتزرع الفرحة في حياتي
وترسم الضحكة في عنيّه
ربنا بيقولي أُصبر
حلقى آخرة صبرى خير
بدعي ياما يارب أُستر
صحّي جوايا الضمير
أحلى أحلى
يارب كل حياتي تحلى
حعمل اللي عليّه واللي
باقي على رب العباد
قلبي حيحاول يحلّي
عمره على إيه العناد
ليه أعاندُه في الحياه
ليه أعيش في عذاب وآه
بدعي أفرح نِفسي أشرح
فرحتي للناس ويا
لما بلقى سنيني طارحة
ضحكتين وشعور بفرحة
وقتها أنا بلقى نفسي
م الفرَح طاير فى لمحة
ربنا يتمم عليّه
فرحتي ويديمها ليّه
قلبي مشتاق للشعور دا
أصلُه بينسّي الأسية
ربنا واقف معايا
وقلبي فيه بيظن خير
بحمدُه في طول الحكاية
وبشكرُه ياما وكتير
إنه عمره ماسابني اضيع
كان تملي معايا واقف
قلبي جواه الربيع
بس ياما بيبقى خايف
بس حلمُه وأملُه خلوا
قلبي لسه شديد وواقف