تدخل لقصر الشوق
شمال ام الغلام
لها منا السلام
تمشى بذكر وتسبيح
فجاه تدخل يمين
خطوة اتنين تلاتة
اقف اقرا السلام
ايوه هناك مقام
فوقه يافطة قديمة
بتقول درب الطبلاوى
من قصر الشوق
اخر ام الغلام
شارع قصير بسيط
اخره ساح الكرام
احنى راسك وقول
لكم منا السلام
ادخل زور المقام
ستى الطاهرة الذكية
لكم منى السلام
نظرة قوية حادة
تخرج من البرواز
خشب وعليه قزاز
لكنه يوم عمرة
ماحجب عنا العزاز
ستى الطاهرة الذكية
يابنت اكرم ناس
حنى علينا بنظرة
نكون أغنى الناس
............
تضيق بينا الاماكن
وصدور وعقل الناس
نجرى على اعتابك
نلقى كتير جلاس
فى حضرة وساعة صفا
ننسى وشوش الناس
نشوف كل الرضا
فى رحاب ست الناس
امى الكريمة ياطاهرة
يابنت اطهر ناس
منى علينا بنظرة
لنكون اسعد ناس
وننسى كل الالم
ننسى غدر الناس
نطلب تطول الحضرة
ونقرا سورة الناس
نعيد ونزيد يسن
نوهب ثوابها لمين
ارواح الطيبين
نظرة ياال البيت
دا انا ليكم اشتكيت
وف حضنكم ارتميت
ايوه فيكم احتميت
ستى ياام الكرم
عشمان فى مقامك
ازور اقعد هناك
واسكن الجبل جارك
اخدم مقام جنابك
وابو الحسن كمان
نظرة رضا ياكرام
ليا اكون خدام
واقف على الاعتاب
نفسه فى نظرة رضا
تطفى نار الشوق
هناك فى قصر الشوق
اخر الشارع شمال
سكن القلب لخضر
قلب ستى الذكية
بنت السادة الكرام
دى ست طاهرة ذكية
وأصلها حسينية