_مرة زميلتي قالتلي بدون مناسبة الجملةدي حرفيا ( انا بحبك عشان انتي بتصلي)
استغربت جدا
وقلتلها يعني لو مش باصلي مش هتحبيني؟!
_سألت مرة بنتي بخباثة ودلع
بتحبيني ليه؟؟؟!
ردت عليا بكل براءة وقالتلي
_ عشان انتي ماما
طفلة صغيرة خلتني فكرت ساعة كاملة في جملة مكونة من تلات كلمات
غريب ان كلام طفلة صغيرة يكون فيه عمق يفتقده ناس كبار
شفت ناس تحب فلان عشان جميل وطيب وبيسمع الكلام وفجأة بس لمجرد إنه بيشجع الزمالك وهم بيشجعوا الاهلي يكون ده سبب كافي ان المحبة تنقص حبة!!
شفت اللي بيستمر في حبك لحد ما يسمع رأيك في فلان اللي هو مبيحبوش
لما تقوله ليه يا عم ده انسان كويس
او تقوله على صديقه المفضل انه تقيل على قلبك...
اد ايه ربنا بيخلقنا ع الفطرة والطفل اللي لسا متلوثش بخبث الحياة بيعرف يحب صح( الحب الغير مشروط)
الغير محكوم ب (لأنك عملت) او لأنك (معملتش)
مفيش طفل هيفكر يقولك بحبك لأنك بتجبيلي حاجات حلوة
ولأنك بتاخديني تفسحيني
ومبحبكيش لانك ضربتيني و مسبتنيش احط ايدي في فيشة الكهربا
بحبك لأنك ماما بتساوي بحبك لأنك انتي بكل سلبياتك وايجابياتك
باكدج على بعضه يا تاخده يا تسيبه...
محتاجين نرجع أطفال ونرفض اننا نكبر
عشان نعرف نحب صح ونتحب صح
ف لو بتحتاج اللي يحبك لأنك انت زي ما انت
حب غيرك لأنه هو زي ما هو
وربنا يزيدنا محبة..
#monaelokda منى العقدة
2
-2
