لو كنت شبهي و من الناس اللي لما تعدي من قدام قصر فيضي باشا اللي واخد ناصية الشيخ ريحان مع شارع منصور في وسط البلد تقول يا سلام ايه الجمال ده وتتأمله في هدوء وفاتح باب خيالك عن زمنه وسُكانه، لو كان نفسك تدخله وتشوفه من جوة روح اليومين دول اتفرج على معرض سرد ٤ اللي بيعرض صور فوتوغرافية من بلاد عربية زي الاردن والمغرب والمغرب ولبنان وفلسطين جنب الصور الحلوة لمصر في التسعينيات وبالمناسبة هو معرض جميل جدا 

القصر من جوة واضح جدا عليه انه مغلق من سنين طويلة اوي 

رسمته وتقسيمته من جوة غريبة دهاليز صغيرة كدة ونمنمة واضحة في استخدام كل متر.. لكنه مناسب تقريبا للوقت اللي اتبنى فيه وعاش فيه فيضي باشا اللي مسك مدير مديرية اكتر من مكان في مصر بما يوازي دلوقتي منصب محافظ وبعدين اشترته الجامعة الأمريكية وعملته حضانة في الستينات لأولاد العاملين بها ودلوقتي بيتم تأجيره منهم نادرا وفتحه كمعرض 

القصر دورين جواه غرف كتير اوي وسلم خشب لكنه مغلق تخوفا من سقوطه ولما بتطلع الدور التاني بيبقى من سلم خلفى تقريبا كان مخصص للخدم .. 

انبسطت أن جت لى فرصة اشوف فيها مكان أتمني سنين يتفتح واشوفه .. كل شبر في مصر فيه حدوتة وجدران لو بتتكلم كانت حكت حواديت لا حصر لها