مساء الفل،

بعد بكرة بداية العام الدراسي الجديد، ربنا يجعله خير وبركة على أولادنا جميعًا. اليومين دول بنشوف ناس كتير بتوزّع شنط مدرسية على أسر محتاجة في مناطق مختلفة، وده شيء عظيم. لكن في خطوة تانية بسيطة ومؤثرة جدًا:

لو رُحت أي مدرسة حكومة قريبة منك، هتلاقي في أول أسبوع عدد كبير من الطلبة ما دفعوش المصروفات، وده ساعات بيأخر استلام الكتب أو يمنعها عنهم. تقدر تعدي الصبح وتطلب تدفع عن طفل أو اتنين، والمبلغ مش كبير: من حوالي 220 جنيه ولحد 550 جنيه للثانوي. اطلب إن الوصل يتسلم للطفل باسمه، والمدرسة غالبًا عارفة كويس مين ظروفه صعبة.

ولو حابب، ممكن تستنى أول أسبوع وبعدها تروح تسأل عن الطلبة اللي لسه متأخرين في السداد. أعرف ناس عملوا كده ولَقوا فعلاً كشوف بأعداد كبيرة من الطلبة اللي أهاليهم مش قادرين أو مأجلين الدفع.

المبلغ يمكن يبان صغير، لكنه عند أسر كتير عائق حقيقي. جرب تعمل الخطوة دي، هتفرق جدًا معاهم.. ومعاك أنت كمان.