شكرا ضي رحمي

البوست ده بقالي شهور حرفيا بفكر أعمله ومحرجة ومكسوفة وخايفة طول الوقت أتحط في خانة استغلال الاسم ومحاولات الظهور والبروباجندا اللي بشوفها، لكن من لا يشكر الناس لا يشكر الله، وهو مش شكر على أد إنه حق وإعتراف بفضل للجميلة Dai Rahmy ❤️

من قبل حوالي سنة أنا كنت بكتب لنفسي ومع نفسي، ومكنش عندي أي ثقة في قلمي وملقتش أي تشجيع الحقيقة من أي حد يؤخذ برأيه، كنت مهزوزة وقلمي خايف وياما مسحت نصوص وياما سألت ناس أصحاب أقلام وهمية وأحبطوني وأتذكر كاتب قالي إيه القرف اللي بتكتبيه ده ديه مجرد شخبطة متتحطش في كتاب ولا تُقرأ، وقعدت بعدها 6 شهور مبكتبش، لحد ما ضي فتحتلي باب متخيلتهوش من التشجيع والدعم والمتابعة في بوست كتبت فيه إني من الكاتبات اللي بتحب تقرألهم وده كان بالنسبالي كافي جدددا ومذهل، ومن وقتها وبفضلها وأنا لقيت مردود حقيقي لكتاباتي عند كتاب وقراء حقيقيين مش من اللي بيوزنوا التفاعل بالكيلو، عرفت قيمتي الادبية وحررت قلمي وشاركت كل نصوصي اللي مكنتش بقدر أتكلم عنها وبقيت موجودة بالشكل اللي أنا عليه دلوقتي...

عاوزة أشكرك يا ضي ألف مرة لأنك متتخيليش إن بشيء بسيط في نظرك أنت عملتي معايا إيه وغيرتي شكل حياتي ونظرتي لنفسي وحطتيني في مكان وسط الكتاب مكنتش أعرف إني ممكن أوصله أو أوصله إزاي، وعاوزة أقولك إن كل نص بتكتبيلي رأيك عنه (وآه حفظاهم واحد واحد????) بميزهم عن باقي النصوص وبحس بمجرد تفاعلك من النص بسعادة وثقة في مستواه وبستنى وجودك حقيقي وبتكسف جدا أعملك منشن أو ابعتلك برضو أخد رأيك اللي محتجاه عشان مكونش سخيفة.

شكرا لوجودك الداعم اللطيف القوي ولجمال قلمك وترجمتك، ولأنك إنسانة جميلة مبقاش فيه زيها دلوقتي❤️❤️