جوة دماغي دوشة عشرين سنة، كلاب سعرانة بتجري ورا بعض..
مش عاوزة اتجوز، أحسن من سرمحة الشباب في الجامعة، مش عاوزة اتجوز خد شبكتك، لو أمك جرالها حاجة هيبقى أنت السبب، حاضر، يا رب أسقط في تالتة ثانوي، مسقطتش، حجزنا القاعة، الكنبة ديه حلوة! لاء ده ذوق عيال، انا عاوزة ماما، انت متجوزة يا حلوة! طول مانا دكتور في الكلية ديه مش هتطلعي منها، المعيدات بيعيطوا عليا، عملت تظلم فاتقالي نصيحة اسحبي ملفك ورقك مش هيطلع، حامل، حولي لأي كلية، أنت غبية متتكلميش خالص، في المطبخ من سبعة الصبح لبليل بطبخ واغسل مواعين في أجازاتي من الكلية ونور على الباب قاعدة تقولي يا ماما أطلعي بقى، ممكن ألعب على الترمبولين! احترمي سنك (١٩ سنة) وأنك بقيتي أم والناس بتتفرج دموعي بتنزل، ديه مش حياتي، عاوزة أكتب، كتبي بتختفي وكتاباتي بتتقطع، بتهته، صوري بتتمسح، ارقام اصحابي ورسايل بتتعبت متتصلوش على الرقم ده تاني، شغلي من البيت! لو مسبتهوش ابقى طالق، حاضر، الست ملهاش الا بيت جوزها واستحملي، البيوت ياما فيها شوفي اللي بيتطلقوا متبهدلين ازاي، تهويش طول الوقت، عاوزة اعيط، قلي حاجة كويسة فيا! طيبة بس، انت فاكرة نفسك ست ولا شكلك حلو!، هبيع دهبي عشان دراستك! وادفعي غرامة كمان عشان مليش نفس اكمل، أبوس رجلك بلاش ولادنا، ملكيش دراع يتلوي غير ولادك، حاضر حاضر، مين اللي بتضحك ديه!ديه ماما بتلعب مع خالد.. طب هاتيها، طالق عشان تعرفي تضحكي في غيابي كويس، رديتك، هشتكيكِ لأهلك، حاضر حاضر، هتجوز واحدة متجيش ضفر رجلك واجيبها هنا، لازم أكسرك ولو معرفتش هدعي ربنا يجيبلك اللي يكسرك، صورتي في المراية بتختفي، جروح كتير في جسمي وحروق بدون ما أحس وتشنجات، اغماءات مفاجٱة، نفسيتها تعبانة شوية، مجنونة، طول الليل ضغط، أعمل فيا اللي عاوزه ابعد عن الولاد لو سمحت، اول جلسة، عاوزة أمو. ت يا دكتور.. ادوية، ضرب في كتفي ولف على الدائري عشان معرفش أنط من العربية قولي قولتي ايه للدكتور عني لازم تقوليله انك مجنونة ويعالجك عشان تبقي مناسبة ليا انا زي الفل، انطقي احكي كل حاجة، عاوزة ماما، عملتي ايه! اغمى عليا، تعالي نخرج حاضر، عاوزة تجربي الترمبولين! فاكرة! طرت من الفرحة، مبسوطة! اه.. أنا مش مبسوط وهتجوزها واجيبها عندك، بص السما حلوة ازاي! سمعاني! ماما اتجننت.. عياطهم بعييييد بس السما حلوة اوي.. بلاش يشوفوني في التشنجات، جيالكم أهو.. لاء خلاص خليكي راجعين، خرجنا معاها يا ماما وروحنا المحل اللي نفسك تروحيه وبيأكلها في بوقها.. ولادي! أنا تعبانة.. استحملي عشان الولاد.. خدي الدوا بتاعك ولا هتتجنني!! بزق الحيطة وايدي ودراعي ازرقوا، يا دينا مش عارف اعالجك انت واقع عليكي عمارة ومتكسرة تحتها بتجيلي كل مرة اسوأ من الأول، اه انا مريض ومش هتعالج، شافوني في التشنجات! ماما أنت كويسة! ولادي بيروحوا مني، مش عارف هي هتستحملني زيك كدة ولا لاء انت قلبك أجمد منها، أطلع برة، عاوزة أتطلق، شهوووووور، عادة بقول كلام للصلح الأول بس واضح إنه شخص مش طبيعي فهنقول صيغة الطلاق على طول طالما متفقين عليه، مفيش عياط، ولادي في حضني، انا السمسار الدكتور كلمني وقال طلقك ومش بنقعد في الشقة مطلقات اخرك الشهردة، حاضر حاضر، خليهم يدخلوا انشالله مدرسة حكومة ولادي وانا حر فيهم، ولادي جنبي ومدخلوش لسة مدرسة وامتحانات الترم الاول قربت، شهور بلف في الشوارع والمديريات والمدارس عشان أعرف أنقلهم من مدرستهم لتجريبي، هدفع رشوة حاضر، نزيف، أنا تعبانة أوي، ليه مطلقتيش من زمان يا ماما!، صوتي بيرن لحد النهاردة في ودنها "اللي جريتي وراه سنين خدتيه وشوفي هيحصل فيك إيه، لو لمستي ولادي هشيلك من الدنيا" بعد سنين: سامحيني يا نور وقولي لماما تسامحني.. حجات كتير وسنين كتير بعدها حتى مينفعش تتكتب.. اللي بيطلق ليه بيسيب ولاده يا ماما! لا حنية ولا فلوس! القسوة بتتسرب لنفوسهم غصب عني... كبروا وفهموا وشايفين وفاهمين كل حاجة... عملت اللي أقدر عليه بس برجع لنقطة الصفر مع نفسي.. في وسط كل ده بقيت لوحدي حرفيا والقدر حرمني من الحضن الوحيد الصادق في حياتي وخلى بيني وبينها مسافات وبلاد.. حاضر حاضر..
أمتى كل ده ينتهي! عارفة إني مش هنسى ومش هعرف أفضي دماغي بس محتاجة ارتاح.
2
-2
