فضفضة ملخبطة

"من لا يشكر الناس لا يشكر الله"

فأنا عاوزة أشكر بجد ناس كتير أوي هنا هم سبب في شعور جيد جدا وداعم، الناس اللي وجودي فرق في حياتهم وشايفني بشكل لطيف جدا وبيعبرولي عن ده بكلمة أو دعوة أو هدية على مدار سنين كتير وبدون مقابل.. بل وبيقنعوني إنه ردًا على شيء قدمته لهم وأنا والله ما عملت أي شيء غير إن لو بإيدي أشيل عن كل شخص عبء أي ألم مريت به وعانيت عشان أتخلص منه وبس عشان الحياة تكون أفضل لينا كلنا مش هتأخر فعلا..

أنا بعتذر لأي حد قصرت معاه خصوصا الفترة الأخيرة ومن ساعة ما بطلت كتابة وانعزلت عن الناس، أسفة إني مبقتش الشخص اللي عنده طاقة وسعة صدر زي زمان وبقيت بزق الناس بعيد عني بعنف وأحيانًا قسوة، أسفة برضو إني حاسة بالوحدة الشديدة في وجود ناس فعلا بتحبني وبيفرق معاها وجودي لاختلاف معنى الونس والحب والمشاركة العميقة بيننا وده والله مش جحود لنعمة القبول وحب الناس اللي ربنا رزقني بيها بدون حول مني ولا قوة لكن كل شيء له مزايا وعيوب..

بتجيلي هدايا كتير قيمتها في معناها وإدخال السرور لقلبي في مناسبات كتير وده بالنسبالي حاجة كبيرة جدا والله لكني مش بحب أذكرها عشان متعتبرش تشجيع لده ومش عاوزة أفتح الباب لده، لكني فعلا سعيدة بالبوكيه ده ومش بس عشان جميل جدا وعشان جالي في وقت غير طاقتي فيه ولكن عشان صاحب الهدية ومعناها بالنسباله فرقوا معايا أوي أوي وحسسوني إني ليا لزمة وكويسة وممكن حد يفتكرني ويدعيلي ويهتم بالتفاصيل عشان بس يخليني سعيدة زي ما بيزعم إني عملت معاه وأنا شايفة إني معملتش أي شيء والله..

أنا من امبارح وجوايا مشاعر مضطربة جدا وعكس بعض، بين ناس متمسكة بيا وناس متمسكة بيها وناس كنت عوزاهم موجودين لكن محصلش والعكس وكنت قولت ان المناسبات عموما بتفتح باب لانتكاسة عندي لما بيهاجمني الاكتئاب وينزع عن حياتي المعنى في لحظة ولكن ده اتغير امبارح الحقيقة فأنا ممتنة لليوم ده وللشخص ده فعلا..

فضفضة ملخبطة مش عارفة ليها لزمة ولا لاء بس أنا اللي محتاجاها. ♥️